ފޭސްބުކް ބޭނުންކުރާ 86،000 ދިވެއްސެއްގެ ޒާތީ މައުލޫމާތު ލީކު ކޮށްލައިފި
ރާއްޖޭގެ 86،000 މީހުން ހިމެނޭ ގޮތަށް ފޭސްބުކްގެ ޒާތީ މައުލޫމާތުތަކެއް ލީކް ކޮށްލައިފިއެވެ.
ގިނަ ބަޔަކު ބޭނުން ކުރާ ސޯޝަލް މީޑިއާ އެޕްލިކޭޝަނެއް ކަމުގައިވާ ފޭސްބުކްގެ 500 މިލިއަނަށްވުރެ ގިނަ މީހުންގެ މައުލޫމާތު ލީކު ކޮށްލައިފައިވާ ކަމަށް މިއަދު މައުލޫމާތު ލިބެއެވެ. އޭގެތެރޭގައި 86،000 ދިވެހިން ވެސް ހިމެނެއެވެ.
ބައިނަލް އަގުވާމީ މީޑިއާތަކުން ރިޕޯޓު ކޮށްފައިވާ ގޮތުގައި ލީކް ކޮށްލާފައިވާ މައުލޫމާތުތަކަކީ ފޭސްބުކްގައި ކުރިން އޮތް ސަލާމަތީ ގޮތުން ބަލިކަށި ތަންކޮޅެއްގެ ބޭނުން ކޮށްގެން 2019 ވަނަ އަހަރު ވަގަށް ނަގާފައިވާ މައުލޫމާތުތަކެކެވެ.
އެ މައުލޫމާތު ހޯދި މީހުން ކުރިން އުޅުނީ ޓެލެގްރާމް ބޮޓެއް ބޭނުންކޮށްގެން މައުލޫމާތު ވިއްކަން ކަމަށާއި ނަމަވެސް މި ފަހަރު އެ ހުރިހާ މައުލޫމާތެއް އިންޓަަނެޓަށް ދޫކޮށްލީ ބޭނުން ކޮންމެ މީހަކަށް ހިލޭ ލިބޭ ގޮތަށް ކަމަށް ވެސް ރިޕޯޓުތަކުން ބުނެއެވެ.
ލީކްކޮށްލި މައުލޫމާތުތަކުގެ ތެރޭގައި ފޭސްބުކްގައި މީހުން ބޭނުންކުރާ ފޯނު ނަމްބަރުތަކާއި، ބައެއް މީހުންގެ ޕްރޮފައިލްތަކާއި ގުޅިފައިވާ އީމެއިލް އެޑްރެސްތަކާއި އަދި މީހުން ތިބި ތަންތަނުގެ މައުލޫމާތުގެ އިތުރުން ބައެއް މީހުންގެ އައިޑީތަކާއި ފުރިހަމަ ނަން ވެސް ހިމެނެ އެވެ.
ލީކް ކޮށްލާފައިވާ މައުލޫމާތުތަކުގެ ތެރޭގައި ރާއްޖެއާއެކު 106 ގައުމެއްގެ މީހުން ހިމެނެއެވެ. އޭގެ ތެރެއިން އެމެރިކާ އާއި ޔޫރަޕްގެ ގިނަ އަދަދެއްގެ މީހުން ވެސް ހިމެނެއެވެ.
އެ ގޮތުން އެމެރިކާގެ 32 މިލިއަން މީހެއްގެ މައުލޫމާތާއި ޔޫރަޕްގެ 11 މިލިޔަން މީހުން އަދި އިންޑިއާގެ ހަ މިލިޔަން މީހުންގެ މައުލޫމާތު ވެސް ހިމެނެއެވެ.
