އަލްޙަމްދުލިﷲ! ޔޫން އަށް ބޭސް ފަރުވާ ކުރެވޭނެ އިންތިޒާމް ހަމަޖެހިއްޖެ!
ފިލްމީ ތަރީ މުޙައްމަދު ޔުނާން ގެ ތުއްތު ދަރިފުޅު ޔޫން މުޙައްމަދު ޔުނާން އަށް ބޭސްފަރުވާ ކުރުމުގެ އިންތިޒާމްތައް އެންމެ ފަހުން ހަމަޖެހިއްޖެއެވެ.
ޔޫން ގެ މަންމަ ފަަތިމަތު ރިހުލާ (ރިހޫ) "ދެން" އަށް މައުލޫމާތު ދެމުން ބުނީ އާސަންދައިން މީގެ ކުޑައިރުކޮޅެއް ކުރިން ގުޅާފައި އިންޑިއާގެ ޓްރިވެންޑްރަމް އަށް ދެންދާ ފްލައިޓަކުން ޔޫން އަށް ޖާގަ ލިބިފައިވާކަން އަންގާފައިވާ ކަމަަށެވެ.
ޔޫންގެ ބޭސް ފަރުވާ ކުރަންދާ "ލިސީ ހޮސްޕިޓަލަކީ" އާސަންދަ ލިބޭ ހޮސްޕިޓަލަކަށް ނުވުމުން، އެންސްޕާ ގެ އެހީގެ ދަށުން ޔޫންގެ ބޭސް ފަރުވާ ހަމަޖެހޭނެ ކަމަށް އާސަންދައިން ބުނެފައިވާ ކަމަށް ވެސް ރިހޫ ބުންޏެވެ.
"ޓްރިވެންޑްރަމަށްދާ ފްލައިޓުން އާސަންދައިން އަޅުގަނޑުމެންނަށް ޖާގަ ދީފި. އެންސްޕާއިން ބޭސްފަރުވާގެ އެހީ ދޭނެ ކަމަށް ބުނެފަ އެބައިން. އެއީ އަޅުގަނޑުމެންނަށް ލިބުނު ވަރަށް ބޮޑު ރިލީފެއް. އަހަރުމެން ކުރީ ބޭކާރު މަސައްކަތެއް ނޫންކަން އިހުސާސް ވެއްޖެ." ރިހޫ ބުންޏެވެ.
ބޭސްފަރުވާއަށް އިންޑިއާއަށް ފުރަން އާސަންދައިގެ ފަރާތުން ފްލައިޓުން ޖާގަ ނުލިބިގެން އަދި އެއިންތިޒާމުތައް ހަމަނުޖެހިހެން އިއްޔެ ރިހޫ އާއި ޔުނާން ވަނީ ރައީސް އިބްރާހިމް މުޙައްމަދު ޞާލިޙު ދިރިއުޅުއްވާ މުލިއާގޭ ކުރިމައްޗަށް ގޮސް އަޑުވެސް އުފުލާފައެވެ. އެމަންޒަރު މީޑިއީތަކުން ވެސް ވަނީ އިއްޔެ ގެނެސްދީފައެވެ.
"އެގޮތަށް ކަންތައް ކުރަން ޖެހުނީ އަަޅުގަނޑުމެންގެ ދަރިފުޅަށް ބޭސްފަރުވާގެ ކަންކަން އަވަހަށް ހަމަޖައްސާ ދިނުމަށް. އިރާދަކުރެއްވިއްޔާ އެންމެ ބެސްޓް ޓްރީޓްމަންޓް މިހަމަޖެހުނީ. ޓްރިވެންޑްރަމަށް ގޮސްފައި ލިސީ ހޮސްޕިޓަލަށް ދަތުރު ކުރުމުގެ ކަންކަން ވެސް ވަނީ އެހޮސްޕިޓަލާއި ގުޅައިގެން ހަމަޖެހިފަ" ރިހޫ ބުންޏެވެ.
މީގެ އިތުރުން ރިހޫ އާއި ޔުނާން ވަނީ ޔޫން އަށް ބޭސްފަރުވާގެ ކަންކަން ހަމަޖައްސާ ދިނުމުގައާއި ފައިސާގެ އެހީވެސް ހޯދައި ދިނުމުގައި އެހީތެރިވެދިން އެންމެހާ ފަރާތްތަކަށް ވަރަށް ބޮޑަށް ޝުކުރު އަދާ ކޮށްފައެވެ.
"އެހީތެރިވެދިން ހުރިހާ މުއައްސަސާތަކަށާއި، އާއިލާގެ އެންމެންނަށާއި، ގާތް އެކުވެރިންނާއި، އާއްމު ރައްޔިތުންނަށް ވަރަށް ބޮޑަށް ޝުކުރު އަދާ ކުރަން. ޚާއްސަކޮށް އަޅުގަނޑުމެންގެ އަޑު ފޯރު ކޮށްދިނުމުގައި އެހީތެރިވެދިން މީޑިއާތަކަށް ވެސް ވަރަށް ބޮޑަށް ޝުކުރު އަދާކުރަން" ޔުނާން ބުންޏެވެ.
ޔޫން އަކީ އުފަންވީއިރު ވެސް ހިތުގެ މައްސަލަތަކެއް ހުރި ކުއްޖެކެވެ. އުފަންވިތާ ދެވަނައަށްވީ ދުވަހު ވެސް ގޮވައިގެން އިންޑިއާއަށް އެމަޖެންސީކޮށް ދާން ޖެހުން ކަމަށާއި ފުރަތަމަ ފަހަރަށް ވެސް ހިތުގެ އޮޕަރޭޝަނެއް އެއިރު ޔޫންގެ ކުރަން ޖެހުނު ކަމަށް ރިހޫ ބުނެފައިވެއެވެ.
"ބޭބީގެ ހިތުގެ ވާތްފަޅި އެއްވެސް ވަރަކަށް މަސައްކަތް ނުކޮށްގެން އެއިރު އޮޕަރޭޝަން ކުރީ. ވިހެއިރު ބޭބީގެ ނޭވާއަށް އުނދަގޫވެ ވެންޓިލޭޓަރަށް ލާން ޖެހުން. އޭގެފަހުން ބޭބީގެ އިކޯއެއް ހެދިއިރު އެނގުނީ ބޭބީގެ ހިތުގެ ވާތްފަޅި އެއްވެސް ވަރަކަށް މަސައްކަތް ނުކުރާކަމާ ލަންގްސް ސްޓިފް ވެފަ ވެސް ހުރިކަން. އެހެންވެ ވަގުތުން ފުރުވާލީ އިންޑިއާއަށް. ހާޓް އޮޕަރޭޝަން ކުރީ އިންޑިއާގެ އަމްރިތާ ހޮސްޕިޓަލުގަ. އެކޮޅުގަ އެއިރު ގާތްގަނޑަކަށް މަހެއްވަރު ހުންނަން ޖެހުން" ރިހޫ ކިޔައިދީފައިވެއެވެ.
އޭގެ ފަހުން މިއަހަރު ފެބްރުއަރީ މަހު އަނެއްކާވެސް އިންޑިއާއަށް ގޮސް އޮޕަރޭޝަނެއް ކޮށްފައިވެއެވެ. އަދި މިހާރު އަނެއްކާވެސް ވަނީ ހާލު އިތުރަށް ދެރަވާން ފަށާފައެވެ.
ޔޫން އަށް ފަރުވާ ކުރަން އަމްރިތާ ހޮސްޕިޓަލަށް ދިޔުމަށް އާސަންދަ ލިބުނެވެ.
ނަމަވެސް ކުރިން ޔޫން އަށް ފަރުވާކުރި ޑޮކްޓަރު ޑރ. ސުނިލް މިހާރު އިންނަވަނީ އަމްރިތާ އަކު ނޫނެވެ. އެޑޮކްޓަރު މިހާރު އިންނަވާ ލިސީ ހޮސްޕިޓަލަށް އާސަންދައެއް ނުލިބެއެވެ. އަމްރިތާގެ އެހެން ޑޮކްޓަރަކަށް ދެއްކި ކަމުގައިވިޔަސް، އެހެން ޑޮކްޓަރެއްގެ ކޭސްއަކަށްވުމުން އެމީހުންނަށް ރަނގަޅަށް ބަލަން ނޭނގޭނެތީ، އަމްރިތާގެ ޑޮކްޓަރުން އެވަރަށް ނުބަލާނެ ކަމަށް ޑރ. ސުނިލް ވެސް ވަނީ ބުނެފައެވެ.
