މީސް މީޑިއާގައި ސިޔާސީ އެއްވެސް ޕޯސްޓަކަށް ކޮމެންޓްކޮށް ލައިކް ދީފައެއް ނުވާނެ: ދާއޫދު
މީސް މީޑިޔާގައި ސިޔާސީ އެއްވެސް ޕޯސްޓަކަށް ކޮމެންޓްކޮށް އަދި ލައިކް ދީފައިވެސް ނުވާނެ ކަމަށް ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ދާއޫދު ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީން ޖަލަށް ލީ މުޑުދާރުކޮށް ޖުޑީޝަރީއަށް އަތްބާނައިގެން ކަމަށް ވިދާޅުވެ ރައީސް ޔާމީންގެ ގާނޫނީ ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ކުރެއްވި ޓްވީޓަކަށް، ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ދާއޫދު ލައިކް ކުރިކަމަށް ބުނެ ސަރުކާރަށް ނިސްބަތްވާ ގިނަ ބަޔަކު އަންނަނީ އޭނާ އަށް ފާޑު ކިޔަމުންނެވެ.
މިކަމަށް ރައްދު ދެއްވަމުން ދާއޫދު ވިދާޅުވީ އޭނާ އަށް އެނގިގެން މިފަދަ ނާތަހުޒީބު އެއްވެސް ޢަމަލެއްކޮށްފައިނުވާނެ ކަމަށާއި ކޮށްގެން ހުރި ފުލުހުންގެ ހުވަޔާއި ޚިލާފުވާނެ ފަދަ އެއްވެސް ޢަމަލެއް ނުކުރާނެ ކަމަށެވެ.
ސޯޝަލް މީޑިޔާގައި ސިޔާސީ އެއްވެސް ޕޯސްޓަކަށް އަޅުގަނޑު ކޮމެންޓްކޮށް އަދި ލައިކް ދީފައި ނުވާނެއެވެ. އަޅުގަނޑަށް އެނގިގެން މިފަދަ ނާތަހުޒީބު އެއްވެސް ޢަމަލެއްކޮށްފައިނުވާނެއެވެ. އަޅުގަނޑު ކޮށްގެން ހުރި ފުލުހުންގެ ހުވަޔާއި ޚިލާފުވާނެ ފަދަ އެއްވެސް ޢަމަލެއް އަޅުގަނޑު ނުކުރާނަމެވެ. pic.twitter.com/rEXADoKaeM
— Mohamed Dawood (@Dawoodseli) July 28, 2020
ޖަމީލް ކުރެއްވި ޓްވީޓްގައި ވިދާޅުވެފައިވަނީ، ހުރިހާ ކަމެއް ބޮއްސުންލައިފި ކަމަށާއި އިދިކޮޅު ލީޑަރު ޖަލަށްލީ މުޑުދާރުކޮށް ޖުޑިޝަރީއަށް އަތްބާނައިގެން ކަމަށެވެ.
ޖަމީލްގެ އެ ޓްވީޓުގައި އިތުރަށް ވިދާޅުވެފައި ވަނީ މިހާރު ދިމާކޮށްފައި ވަނީ މިނިވަންކަން ވިއްކާލަން ކަމަށެވެ. އިދިކޮޅު ފަރާތްތަކުގެ މުޒާހަރާ ކުރިއަށްދާނެ ކަމަށާއި އިރާދަކުރެއްވިއްޔާ ނަތީޖާ ފޮނިވާނެ ކަމަށް ވެސް ޖަމީލް ވިދާޅުވިއެވެ.
"ހިލާ ޤައުމު ވިއްކައެއް ނުލެވޭނެ. ކުރިންވެސް ނިމިދިޔައީ ގަދަބަސް ބުނަނިކޮށް." ޖަމީލް ވިދާޅުވިއެވެ.
ަޖަމީލުގެ އެ ޓްވީޓަށް ލައިކް ކޮށްފައިވާ ކަމަށް ބުނެ ދައޫދާއި މެދު ފިޔަވަޅު އެޅުމަށް އެމްޑީޕީގެ ބައެއް އެކްޓިވިސްޓުން އަންނަނީ ގޮވާލަމުންނެވެ.
