ހައްޔަރުކުރަން ޖެހޭ ވަރުގެ ކަމެއް ނުކުރޭ، ބިރުދެއްކިޔަސް ފަހަތަށް ނުޖެހޭނަން: އަދުރޭ
ހައްޔަރުކުރަން ޖެހޭ ވަރުގެ ކަމެއް މުޒާހަރާގެ ބައިވެރިން ނުކުރާ ކަމަށާއި ބިރުދެއްކިޔަސް ފަހަތަށް ނުޖެހޭ ކަމަށް ޕީއެންސީގެ ރައީސް އަބްދުއްރަހީމް އަބްދުއްﷲ ވިދާޅުވެއްޖެއެވެ.
މިރޭ މާލޭގައި ބާއްވާ މުޒާހަރާގެ ތެރެއިން ޕެޕާ ސްޕްރޭގެ އަސަރުކޮށްގެން މާވަށު ދާއިރާގެ މެމްބަރު މުހައްމަދު ސައީދަށް ހޮސްޕިޓަލުގައި ފަރުވާ ދީފައެވެ. އަދި މުޒާހަރާގެ ތެރެއިން ޕީއެންސީގެ ކައުންސިލު މެންބަރު އަޙްމަދު ނަރީޝު ވަނީ ހައްޔަރުކޮށްފައެވެ.
މުޒާހަރާ މިރެޔަށް ނިންމާލާފައިވާއިރު މުޒާހަރާގެ ބައިވެރިން ވަނީ ރައީސް އިބްރާހިމް މުހައްމަދު ސޯލިހުގެ އިސްތިއުފާ އަށާއި، ވައުދުތައް ފުއްދުމަށާއި ރައްޔިތުންނަށް އަނިޔާ ނުކުރުމަށް ގޮލާފާފައެވެ. އަދި ޖަލަށްލާފައިވާ ކުރީގެ ރައީސް އަބްދުﷲ ޔާމީން މިނިވަން ކުރުމަށް ވެސް މުޒާހަރާގެ ބައިވެރިން ވަނީ ގޮވާލާފައެވެ.
މުޒާހަރާ ނިންމާލަމުން އަދުރޭ ވިދާޅުވީ ފުލުހުންނަކާ ދިމައެއް ނުކުރާ ކަމަށާއި އެ މީހުންގެ ސަފުތަކެއް ފަޅައެއް ނުލާ ކަމަށެވެ. އަދި ބާރުގެ ބޭނުންކޮށް މުޒާހަރާ ރޫޅާލާ، މީހުން ހައްޔަރުކުރަނީ ބިރުދައްކަން ކަމަށާއި ބިރަށް ފަހަތަށް ނުޖެހޭނެ ކަމަށެވެ.
"ކިތަންމެ ބިރެއް ދެއްކިނަމަވެސް ރައްޔިތުން ނިކުންނަންޏާ އަޅުގަނޑުމެން ނިކުންނާނަން،" އަދުރޭ ވިދާޅުވިއެވެ.
އިދިކޮޅުން މިދިޔަ އާދީއްތަ ދުވަހު ވެސް މިފަދަ މުޒާހަރާއެއް ކޮށްފައިވާއިރު، ފުލުހުން މިރޭ ވަނީ މި މުޒާހަރާ ފެށުމުގެ ކުރިން ކޮވިޑް-19 އަށް ފައްސިވާ މީހުން އިތުރުވަމުންދާތީ މި ހާލަތާއި އެކަށީގެންވާ ގޮތްތައް ބޭނުންކޮށްގެން ހިޔާލުފާޅުކުރަން އިލްތިމާސްކޮށްފައެވެ.
