ޕާޓީތަކުން ގާނޫނާއި ގަވާއިދަށް ބޯލަނބައިގެން ސިޔާސީ ހަރަކާތް ހިންގުމަށް އަކްރަމް އިލްތިމާސްކޮށްފި
ސިޔާސީ ޕާޓީތަކުން ގާނޫނާއި ގަވާއިދުތަކަށް ބޯލެނބުމަށް އިލެކްޝަންސް ކޮމިޝަނުގެ ނައިބު ރައީސް އަހްމަދު އަކްރަމް އިލްތިމާސް ކުރައްވައިފިއެވެ.
އަކްރަމް މިހެން ވިދާޅުވީ ރާއްޖޭގައި ކޮވިޑްގެ ހާލަތު އަނެއްކާވެސް ގޯސްވެ ގިނަ ބަޔަކު ފައްސިވަމުންދާ މިދަނޑިވަޅުގައި އިދިކޮޅު ޕީޕީއެމް/ ޕީއެންސީން ކުރަމުންދާ މުޒާހަރާތަކަށް އިޝާރާތް ކުރައްވައެވެ.
އެގޮތުން އަކްރަމް ކުރެއްވި ޓްވީޓެއްގައި ވިދާޅުވީ ކޮވިޑްގެ ހާލަތު ރަނގަޅު ކުރުމަށް މަސައްކަތް ކުރަމުން އަންނަ މިދަނޑިވަޅުގައި ސިޔާސީ ޕާޓީތަކުން ސިޔާސީ ހަރަކާތްތައް ހިންގަންވާނީ ގާނޫނުތަކާއި ގަވާއިދުތަކަށް ބޯލަނބައި އިންސާނީ ކަރާމާތައް އިސްކަންދީގެން ކަމަށެވެ.
"ކޮވިޑްގެ ހާލަތު ގޯހުން ގޯހަށް ދާއިރު، ﷲގެ އިރާދަފުޅާއިއެކު މި ހާލަތު ރަނގަޅު ކުރުމަށް އެނެމެން އެކުގައި ތެދުވާންޖެހޭ، ސިޔާސީ ޕާޓީތަކުން ސިޔާސީ ހަރަކާތް ހިންގަންވީ ޤާނޫނުތަކާއި ޤަވާއިދުތަކަށް ބޯލަބައި އިންސާނީ ކަރާމާތާއި ސަލާމަތަށް އިސްކަންދީގެން" އަކްރަމް ވިދާޅުވިއެވެ.
Covid ge haalathu goahun goahah dhaairu, Allah ge iraadhafulhaai eku mi haalathu rangalhu kurumah ehmen ekugai thedhuvan jehey, siyaasee party thakun siyaasee harakaaithah hinganvaanee gaanoonuthakaai gavaaidhu thakah boalabaa insaanee karaamaathaai salaamathah iskandheegen.
— Ahmed Akram (@akram4535) July 28, 2020
ކޮވިޑް ފެތެރުން ކޮންޓްރޯލްކޮށް އާންމު ސިއްހަތު ރައްކާތެރިކުރުމަށް އަޅާ ފިޔަވަޅެއްގެ ގޮތުން އެޗްޕީއޭ އިން ވަނީ މާލޭގައި ގިނަ މީހުން އެއްވެ ނޫޅުމަށް އިލްތިމާސްކޮށްފަ އެވެ. އަދި ފުލުހުން ވެސް ވަނީ އެޗްޕީއޭގެ އެންގުމާ ހިލާފަށް މަގުމައްޗަށް އެއްވެ އިޖުތިމާއީ ގައިދުރުކަމަށް ބެލުމެއްނެތި ބައެއް މީހުން މާސްކު ވެސް ނާޅައި އެއްވުންތައް ކުރިއަށްގެންދާ ކަމަށް ބުނެފައެވެ.
