ކޮވިޑް-19: ބަލީގެ އަލާމާތްތައް ހުންނަ އިނގިރޭސިވިލާތުގެ މީހުން އައިސޮލޭޓް ވާންޖެހޭ މުއްދަތު އިތުރުކޮށްފި!
އިނގިރޭސިވިލާތުގައި ކޮވިޑް-19 ގެ އަލާމާތްތައް ފެންނަ މީހުން އެހެން މީހުންނާއި އެކަހެރިވެގެން ހުންނަންޖެހޭ މުއްދަތު އެޤައުމުން އިތުރު ކޮށްފިއެވެ.
ބަލީގެ އަލާމާތްތައް ހުންނަ މީހުން ކުރިން އެހެން މީހުންނާއި އެކަހެރިވާން ޖެހެނީ ހަތް ދުވަހަށެވެ. ނަމަވެސް މިހާރު 10 ދުވަހަށް އެކަހެރި ވާންޖެހެއެެވެ.
މިބަދަލު ގެނައީ އެޤައުމުގައި އަނެއްކާވެސް ކޮވިޑް ފެތުރުން އިތުރުވެދާނެތީ، ކޮންޓްރޯލް ކުރުމުގެ ގޮތުން މިނިސްޓަރުންގެ ވެސް ލަފާގެ މަތިންކަމަށް އިނގިރޭސިވިލާތުގެ އެންމެ އިސް މެޑިކަލް އޮފިސަރުން ބުނެފައިވެއެވެ.
ބަލީގެ އަލާމަތްތައް ކަމުގައި އެޤައުމުން ފާހަގަ ކޮށްފައިވަނީ ކެއްސުމާއި، ހުން އައުމާއި، އެއްޗެހިން ވަސް ނުދުވުމާއި އެއްޗެހިން ރަހަ ނުލުމެވެ. އިނގިރޭސިވިލާތުން މިއަލާމާތްތައް ފެންނަ ކޮންމެ މީހަކުވެސް މިހާރު 10 ދުވަހަށް އެކަހެރިވާން ޖެހެއެވެ.
މިއީ ދުނިޔޭގެ ސިއްޙަތު ޖަމިއްޔާއިން ދީފައިވާ އިރުޝާދުގެ ދަށުން ގެނެސްފައިވާ ބަދަލެއް ކަމަށް ވެސް އޮފިސަރުން ބުނެފައިވެއެވެ.
"މިއީ ގެންނަން ވަރަށް މުހިންމު ބަދަލެއް. މިއީ މިބަލިން އެންމެން ވެސް ރައްކާތެރިކުރުމުގެ ގޮތުން އެޅި ފިޔަވަަޅެއް. ޚާއްސަކޮށް ކުރިއަށް ދެން އަންނާނެ ފިނިމޫސުމުގައި މިބަލި އިތުރަަށް ފެތުރިދާނެކަމުގެ ފުުރުސަތު ވެސް ބޮޑު" މެޑިކަލް އޮފިސަރެއް ބުނެފައިވެއެވެ.
