ރޯދައަށް ހުރެ ކޮވިޑް-19ގެ ބަލިމީހުންނަށް ޚިދުމަތް ކުރުމުގައި ދެމިހުރި މާބަނޑު ނަރުހެއް
މިއީ އިންޑިއާގެ ގުޖްރާތުގައި މަސައްކަތްކުރާ ނަރުހެއްގެ ވާހަކައެވެ. އިންތިހާ ދަރަޖައަށް ކޮވިޑް-19 އެ ގައުމުގައި ފެތުރިފައިވާއިރު، އޭނާ ބަލި މީހުންނަށް އެ ޚިދުމަތް ކުރަނީ ގައުމަށް ޓަކައި މަގަތު ސަފުގައި ހުރެއެވެ. އޭނާގެ ވާހަކަ ޚާއްސަ ވަނީ އޭނާ ހަމައެކަނި ނަރުހަކަށް ވުމަކުން ނޫނެވެ.
އޭނާ މި މަސައްކަތުގައި އެތައް މަހެއް ވެއްޖެއެވެ. އެންމެ ފުރަތަމަ އިންޑިއާއިން ކޮވިޑް-19ގެ ކޭސްއެއް ފެނުމާއެކު ވެސް އޭނާ ގައުމަށް ޚިދުމަތް ކުރަން ފެށިއެވެ. މި ޚިދުމަތްތެރިޔާއަށް އޭނާ ބަނޑުބޮޑުކަން އެނގުނީ ވެސް ކޮވިޑް-19ގެ ބަލި މީހުންނަށް ޚިދުމަތް ކުރަން އުޅުނު ދުވަސްވަރުއެވެ.
މިހާރު އޭނާގެ ބަނޑަށް ހަތަރު މަހެވެ. ނަމަވެސް އެކަމުގެ ސަބަބުން އޭނާ އެންމެ ފިޔަވަޅެއް ވެސް ފަހަތަކަށް ނާޅައެވެ. އޭނާ ހުރީ ސާބިތުކަމާއެކު ކޮވިޑް-19 ޖެހިފައިވާ ބަލި މީހުންނަށް އެހީތެރިވެދިނުމުގައެވެ. އަދި މި ނިމުނީއެއް ވެސް ނޫނެވެ. އޭނާއަކީ މުސްލިމަކަށް ވުމާއެކު މިހާރު އެ މަސައްކަތް ކުރަނީ މާބަނޑު ހާލު، ބަރަކާތްތެރި ރަމަޟާން މަހުގެ ރޯދައަށް ވެސް ހުރެގެންނެވެ.
އޭނާ ގަބޫލު ކުރާ ގޮތުގައި މިފަދަ މާތް މަހެއްގައި ގިނަ ބަޔަކަށް އޭނާގެ އެހީތެރިކަން ފޯރުކޮށްދެވުމަކީ ވަރަށް ބޮޑު ނަސީބެކެވެ. އެގޮތުން ވަރުބަލިކަމެއް ނެތި، އެ މަަސައްކަތުގައި އޭނާ ކޮންމެ ދުވަހަކު 8 ގަޑިއިރު ހޭދަ ކުރެއެވެ.
ގުޖްރާތުގައި މިދިޔަ 24 ގަޑިއިރުގެ ތެރޭގައި ވެސް 13،804 މީހުން ކޮވިޑަށް ވަނީ ފައްސިވެފައެވެ.
Ads by STO
