ޑްރައިވިންގ ލައިސެންސް ދިނުން ވަގުތީގޮތުން މެދުކަނޑައިލައިފި
ކޮވިޑް-19ގެ ކޭސްތައް ރިކޯޑް އަދަދަކަށް ރާއްޖޭގައި ގިނަ ވެފައިވާތީ ޑްރައިވިން ލައިސެންސް ދިނުން ވަގުތީ ގޮތުން މެދުކަނޑައިލައިފިއެވެ.
ޓްރާންސްޕޯޓް މިނިސްޓްރީ އިން މިއަދު ބުނީ ކޮވިޑް019ގެ ހާލަތު އިތުރަށް ގޯސްވެފައި ވާތީ އަޅާ ރައްކާތެރިކަމުގެ ފިޔަވަޅެއްގެ ގޮތުން އެއްގަމުގައި ދުއްވާ އިންޖީނުލީ އުޅަނދުތަކުގެ ޑްރައިވިން ލައިސެންސަށް އަލަށް އެދޭ ފަރާތްތަކަށް އެ ޚިދުމަތް ދިނުން ވަގުތީ ގޮތުން ހުއްޓާލައިފައިވާ ކަމށެވެ.
ޑްރައިވިންގ ލައިސެންސް ދޫކުރުން ހުއްޓާލީ ކިހާ ދުވަހަކަށް ކަމެއް މިނިސްޓްރީން ހާމަ ކޮށްފައެއް ނުވެއެވެ.
މީގެ އިތުރުން ޓްރާންސްޕޯޓް މިނިސްޓްރީން ބުނީ އަލަށް ލައިސެންސް ނަގަށް ބޭނުންވާ މީހުންނަށް އެ ޚިދުމަތް ހުއްޓާލި ނަމަވެސް މުއްދަތު ހަމަވެފައިވާ ލައިންސެންސް ކާޑު އައު ކޮށްދިނުމުގެ އިތުރުން އެ މިނިސްޓްރީން ދެމުންދާ އެހެނިހެން ޚިދުމަތްތައް ލިބޭނެ ކަމަށެވެ.
މިއަހަރުގެ ކުރީ ކޮޅުގައި ވެސް ކޮވިޑް ކޭސްތައް އިތުރުވުމާ ގުޅިގެން ޑްރައިވިން ލައިސެންދަށް އަލަށް އެދޭ ފަރާތްތަކަށް އެ ޚިދުމަތް ދިނުން މެދުކަނޑާލިއެވެ. އެކަމާ ގުޅިގެން އާންމުން ވަނީ އެ މިނިސްޓްރީ ކައިރިއަށް އެއްވެ ކަންބޮޑުވުން ފާޅު ކޮށްފައެވެ. އެމީހުންގެ ކަންބޮޑުވުމަކަށްވީ ލައިސެންސް ނުނެގި ތިއްބާ ދުއްވުމުން ޖޫރިމަނާ ކުރުމެވެ. އެކަމާ ގުޅިގެން އެޗްޕީއޭ އާއި ޓްރާންސްޕޯޓް ގުޅިގެން ގައިޑްލައިންތަކެއް ހަދާ ލައިސެންސްގެ ޚިދުމަތް ފެށިއެވެ.
