ނ.ކެނދިކުޅުދޫން ބަޔަކު ފައްސިވެ ރަށް މޮނިޓަރިން އަށް
ނ. ކެނދިކުޅުދޫން ރެންޑަމްކޮށް ނެގުނު ސާމްޕަލްތަކެއް ކޮވިޑަށް ފައްސިވެ، ރަށް މޮނިޓަރިންއަށް ލައިފިއެވެ.
ކެނދިކުޅުދޫ ކައުންސިލުން ބުނީ އެ ރަށުގައި މުދާ އުފުލުމަށް މާލެ ދަތުރުކުރާ ދޯންޏެއް ކަމުގައިވާ "ފުރަމާ (މަހުރޯދި)" ދޯނިން 5 މީހަކު މި މަހުގެ 7 ވަނަ ދުވަހު ކޮވިޑަށް ފައްސި ވެފައިވާކަމަށެވެ. އެއީ އެ ރަށުން ފައްސިވި ފުރަތަމަ ކޭސްތަކެވެ.
އޭގެ ފަހުން އެ ދޯނީގައި މަސައްކަތް ކުރާ އިތުރު 3 ދިވެހިންގެ ސާމްޕަލް ނަގައި، އެމީހުންގެ ނަތީޖާ ވެސް ވަނީ ފައްސިވެފައެވެ. އަދި އެ ފަރާތްތަކާ ޑައިރެކްޓް ކޮންޓެކްޓުވި 3 މީހަކު ވެސް ވަނީ ކޮވިޑަށް ފައްސިވެފައެވެ.
މިކަމާ ގުޅިގެން އެ ރަށު ކައުންސިލުން ވަނީ ފުރަމާ (މަހުރޯދި) ދޯނިން ދަތުރުކުރި އެއްވެސް ފަރާތަކާއި ކޮންޓެކްޓް ވެފަވާ ފަރާތެއްވާ ނަމަ ލަސްނުކޮށް ކެނދިކުޅުދޫ ޞިއްޙީ މަރުކަޒަށް އެންގުމަށް އިލްތިމާސްކޮށްފައެވެ. އަދި އަބަދުވެސް މާސްކް އަޅައި ގައިދުރުކަން ބެހެއްޓުމަށް ސަމާލުކަން ދެއްވުމަށާއި، ގިނަމީހުން އެއްވެ އުޅޭ ތަންތަނަށް ނުދިއުމަށް އަންގާފައެވެ.
މީގެ އިތުރުން ކޮންމެހެން ދާން ޖެހިއްޖެ ޙާލަތެއްގައި މެނުވީ ގެއިން ބޭރަށް ނުދިއުމާއި ކޯވިޑް-19 ރޯގާގެ އެއްވެސް އަލާމާތެއް (ރޯގާޖެހުން، ހުންއައުން، ގައިގަ ރިއްސުން، ވަހާއި ރަހަޔަށް ބަދަލުއައުން، ބޮލުގައި ރިއްސުން) ފެނިއްޖެނަމަ ލަސްނުކޮށް ޞިއްޙީ މަރުކަޒަށް މަޢުލޫމާތު ދިނުމަށް އިލްތިމާސް ކޮށްފައި ވެއެވެ.
ރާއްޖޭގައި އަނެއްކާ ވެސް ކޮވިޑް-19 ގެ ހާލަތު ވަނީ ގޯސްވެފައެވެ. އަދި ފައްސިވާ އަދަދުތައް ވަރަށް ބޮޑަށް އިތުރެވެ. އިއްޔެ އެކަނި ވެސް ރާއްޖެއިން 1216 މީހުން ފައްސިވެފައިވެއެވެ. އެޗްޕީއޭގެ އެންމެ ފަހުގެ ތަފާސް ހިސާބުތަކަށް ބަލާއިރު މިހާރު ޖުމްލަ 48 ރަށެއް ވަނީ މޮނިޓަރިން ހާލަތަށް ގެނެވިފައެވެ.
Ads by STO
