ކަރަންޓީނުން ބޭރުގައި ތިބި ދެމީހަކު ކޮވިޑަށް ފައްސިވެ ލަންދޫ މޮނިޓަރިންއަށް!
ނ. ލަންދޫގައި ކަރަންޓީނުން ބޭރުގައި ތިބި ދެމީހުން ކޮވިޑް-19 އަށް ފައްސިވެ މުޅި ރަށް މޮނިޓަރިންއަށް ލައިފިއެވެ.
ލަންދޫ ކައުންސިލްގެ ރައީސް އަބްދުލް އަޒީޒް މުހައްމަދު “ދެން” އަށް މައުލޫމާތު ދެއްވަމުން ވިދާޅުވީ، އަލާމާތްތައް ފެންނަން ފެށުމުން ޑޮކްޓަރަށް ދައްކައި ކަރަންޓީނު ވާން އެންގީ ކަމަށެވެ. އަދި ކޮވިޑަށް ޓެސްޓު ކުރީ ޑޮކްޓަރުގެ އެންގުމުން ކަމަށް ވެސް އޭނާ ވިދާޅުވިއެވެ.
މީގެ އިތުރުން ކޮންޓެކްޓް ޓްރޭސިންގެ މަސައްކަތް ވަރަށް ފުރިހަމައަށް ކުރިއަށް ދާ ކަމަށާއި، މިހާތަނަށް 25 ސާމްޕަލް އެއް ނެގިފައިވާ ކަމަށް ވެސް އަބްދުލްއަޒީޒް ވިދާޅުވިއެވެ. އަދި ރަށް މިހާރު މޮނިޓަރިންގެ ހާލަތަށް ލެވިފައިވާ ކަމަށް ވެސް އޭނާ ވިދާޅުވިއެވެ.
ފަހަކަށް އައިސް ރާއްޖޭގައި ކޮވިޑަށް ފައްސިވާ މީހުންގެ އަދަދު އަންނަނީ ބޮޑުތަނުން އިތުރު ވަމުންނެވެ. އެގޮތުން ފަހަކަށް އައިސް ކޮންމެ ދުވަހަކު ވެސް ކޮވިޑަށް ފައްސިވާ މީހުންގެ ޖުމުލަ އަދަދު ވަނީ 1000 އިން މައްޗަށް ގޮސްފައެވެ. އަދި މިހާތަނަށް މި ބަލީގައި 100 އަށް ވުރެ ގިނަ މީހުން ވަނީ ނިޔާވެފައެވެ.
