ދުޅަހެޔޮ އިސްތަށިގަނޑެއް ބޭނުންވާ މީހަކަށް އެނގުން މުހިންމު ބައެއް ކަންކަން!
އިސްތަށި ފޭބުމާއި އިސްތަށިގަނޑު ތުނިވުމަކީ އަޅުގަނޑުމެން ތެރެއިން ގިނަ ބަޔަކު ތަހައްމަލު ކުރަމުން އަންނަ ކަމެކެވެ. ޚާއްސަކޮށް ފިރިހެނުންނެވެ. އެކި ސަބަބުތަކާ ހުރެ އިސްތަށިގަނޑަށް މިފަދަ އެތައް ގެއްލުންތަކެއް ލިބެއެވެ. އޭގެ ތެރޭގައި ރަނގަޅު ކާނާ ނުކެވުމާއި، އުމުރުން ދުވަސްވުމާއި، އިސްތަށިގަނޑަށް ގެއްލުން ދެނިވި މާއްދާތައް ހިމެނޭ ބޮލުގައި ލާން ގެންގުޅޭ އެކިބާވަތް ބާވަތް ތަކުގެ ޖެލް ނުވަތަ ކްރީމް ބޭނުން ކުރުން ހިމެނެއެވެ.
ގުދުރަތީ ގޮތުން އިސްތަށިގަނޑު ވަރުގަދަ ކުރުމަށް ޓަކައި ގޭގައި ކުރެވިދާނެ ބައެއް ކަންކަން ފާހަގަ ކޮށްލާނަމެވެ.
ކުކުޅު ބިހަކީ، އިސްތަށިގަނޑަށް ވަރަށް މުހިންމު މާއްދާއެއް ކަމަށްވާ "ޕްރޮޓީން" ވަރަށް ގިނަ މިންވަރަކަށް އެކުލެވިގެންވާ އެއްޗެކެވެ. ކުކުޅު ބިސް ބޭނުންކޮށްގެން ހެއާ މާސްކެއް ތައްޔާރު ކުރުމަށް ފަހު، އާންމުކޮށް އެ ބޭނުން ކުރުމަކީ އިސްތަށިގަނޑު ވަރަށް ބޮޑަށް ވަރުގަދަ ކޮށްދޭނެ ކަމެކެވެ.
ހަމައެއާއެކު، އޮލިވް އޮއިލް، ނުވަތަ ޒައިތޫނި ތެލަކީ ވެސް އިސްތަށިގަނޑަށް ވަރަށް މުހިއްމު ފަރުވާއެކެވެ. ގަވައިދުން ޒައިތޫނި ތެޔޮ ބޭނުން ކޮށްގެން ބޮލުގައި މަސާޖު ކުރުމަކީ ވަރަށް ފައިދާވާނެ ކަމެކެވެ. އިސްތަށިގަނޑު ބޯކޮށްދީ، އިސްތަށި ފޭބުން ހުއްޓުވައިދޭނެއެވެ.
އެވޮކާޑޯއަކީ އިސްތަށިގަނޑު ކިފުޅިވިޔަ ނުދީ ހިފެހެއްޓުމަށް އެހީތެރިވެދޭ މޭވާއެކެވެ. އޭގައި ގިނަ އަދަދަކަށް "ވިޓަމިން އީ" އެކުލެވިގެން ވެއެވެ. އެވޮކާޑޯ ގާނައިގެން ޕޭސްޓެއް ހެދުމަށްފަހު ބޮލުގައި ހާކާށެވެ. ހަފްތާއަކު ދެފަހަރު އެގޮތަށް ކަންތައް ކޮށްފިނަމަ އިސްތަށިގަނޑުން އެދެވޭ ބަދަލެއް ފެންނާނެކަން ކަށަވަރެވެ.
ސިއްހީ މާހިރުން ބުނާގޮތުގައި އޮރެންޖަކީ ވެސް އިސްތަށިގަނޑަށް ބޭނުންވާ ގިނަ މާއްދާތަކެއް އެކުލެވިގެންވާ އެއްޗެކެވެ. އޮރެންޖް މިކްސަރުން ފުނޑާފައި ބޮލުގައި އުނގުޅާށެވެ. އަދި ގަޑިއެއްހާއިރު ބެހެއްޓުމަށް ފަހު ބޯ ރީއްޗަށް ދޮންނާށެވެ. އޮރެންޖުގައި ހިމެނޭ ވިޓަމިން ސީ، ޕެކްޓިން އަދި އެސިޑަކީ އިސްތަށިގަނޑަށް ވަރަށް މުހިންމު މާއްދާތަކެއް ކަމަށް ސިއްހީ މާހިރުން ވަނީ ހާމަ ކޮށްފައެވެ.
މީގެ އިތުރުން ގިނައިން ފެންބުއިމާއި ކަސްރަތު ކުރުމަކީ ވެސް، ވަރުގަދަ އަދި ދުޅަހެޔޮ އިސްތަށިގަނޑެއް ހޯދުމަށްޓަކައި ކުރަންޖެހޭ ވަރަށް މުހިންމު ކަމެކެވެ.
