މިރުސް ކެއުން: ސިއްހަތައް އެތައް ފައިދާތަކެއް ލިއްބައިދޭ!
ގިނަ ފަހަރަށް ގިނަ މީހުންނަށް ހީވެފައި އޮންނަ ގޮތުގައި ކުޅިކޮށް ކެއުމުން ހަށިގަނޑަށް އެކަމުގެ ނޭދެވޭ އަސަރު ކުރެއެވެ. އެހެން ނަމަވެސް ކުޅިކޮށް ކެއުމަކީ، ނުވަތަ މިރުސް ކެއުމަކީ ހަށިގަނޑަށް ސިއްހީ ގޮތުން އެތައް ފައިދާއެއް ލިއްބައިދޭ ކަމެއްކަން އެންމެ ފަހުގެ ދިރާސާތަކުން މިވަނީ ދައްކާފައެވެ.
މިރުސް ކެއުމަކީ ބަރުދަން ލުއި ކުރުމަށް އެހީތެރިވެދޭ ކަމެކެވެ. އެގޮތުން މިރުސް ކެއުމުން، މެޓަބޮލިޒަމް އަވަަސްކޮށްދެއެވެ. އެހެނީ ކާނާ ހަޖަމްވާލެއް އަވަސްވެދެއެވެ. އަދި މިކަމުގެ ސަބަބުން ބަރުދަން ލުއިކުރުމަށް އިތުރު އެހީއެއް ލިބިގެންދެއެވެ. އެހެންކަމުން ބަރުދަން ލުއި ކުރަން ބޭނުންވާ ނަމަ، މިރުސް ކެއުން ގިނަކޮށްލާށެވެ. އެހެން ނަމަވެސް މާ ގިނައިން މިރުސް ކެއުމަކީ ހަށިގަނޑަށް ގެއްލުން ލިބިދާނެ ކަމެއްކަން ހަނދާނުގައި ބެހެއްޓުމަކީ ވެސް މުހިންމު ކަމެކެވެ.
އާދަކޮށް މިރުސް ކެއުމަކީ، ހިތުގެ ބަލިތަކުން ރައްކާތެރިކޮށްދޭ ކަމެކެވެ. އެގޮތުން އާއްމުކޮށް މިރުސް ކާނަމަ، ހާޓް އެޓޭކް އަދި ހާޓް ސްޓްރޯކް ޖެހުމުގެ ފުރުސަތު ކުޑަކޮށްދޭ ކަމަށް ސިއްހީ މާހިރުން ވިދާޅުވެއެވެ.
އެމެރިކަން އެސޯސިއޭޝަން ފޮރ ކެންސަރ ރިސާޗްއިން ދާދި ފަހުން ކޮށްފައިވާ ދިރާސާއަކުން ދައްކާގޮތުގައި، މިރުސް ކާ މީހުންނަށް ކެންސަރު ޖެހުމުގެ ފުރުސަތު ކުޑައެވެ. މިރުހުގައި ހުންނަ ބައެއް މާއްދާތަކަކީ ކެންސަރ ސެލްތައް މަރައިލާ އެއްޗެއްކަން އެ ދިރާސާއިން ވަނީ ދައްކައިފައެވެ.
ލޭ މައްޗަށް ދިއުމުގެ މައްސަލައަކީ ރާއްޖޭގައި އެކި އުމުރުގެ މީހުންނަށް ކުރިމަތިވަމުން އަންނަ ސިއްހީ އަދި އެހާމެ ނުރައްކާ މައްސަލައެކެވެ. މިރުހަކީ، ލޭގެ ޕްރެޝަރ ދަށްކޮށްދިނުމަށް އެހީތެރިވެދޭ އެއްޗެކެވެ. މިރުހުގައި ގިނަ އަދަދަކަށް "ވިޓަމިން އޭ" އަދި "ވިޓަމިން ސީ" އެކުލެވިގެންވެއެވެ.
މިރުހުގެ އެކި ބާވަތްތަކުގެ ތެރެއިން ސިއްހީ ގޮތުން އެންމެ ގިނަ ފައިދާތައް ހަށިގަނޑަށް ލިއްބައިދެނީ ފެހި މިރުހުންނެވެ. އެހެންކަމުން ކެއުން އެންމެ ރަނގަޅީ ފެހި މިރުހެވެ. ފެހި މިރުހުގައި ގިނަ އަދަދަކަށް ވިޓަމިން ސީ އެކުލެވިގެންވެއެވެ. އޭގެ ސަބަބުން، ލޮލުގެ ފެނުން ރަނގަޅުކޮށްދެއެވެ. އަދި ގައިގެ ހަން ރީތި ކޮށްދިނުމުގެ އިތުރަށް، ހަށިގަނޑުގެ ދިފާއީ ނިޒާމް ވަރުގަދަ ކޮށްދިނުމަށް ވެސް ފެހި މިރުސް އެހީތެރި ވެދެއެވެ.
މީގެ އިތުރުން، ފެހި މިރުހުގައި އެކުލެވިގެންވާ އެންޓިބެކްޓީރިއަލް މާއްދާތަކުގެ ސަބަބުން، ހަމަށް ޖެހޭ އިންފެކްޝަންތަކުން މީހާ ސަލާމަތް ކޮށްދެއެވެ. އަދި އެހެނިހެން ގިނަ ފައިދާތަކެއް މިރުސް ކެއުމުން ހަށިގަނޑަށް ލިބެއެވެ. އެހެންކަމުން އާންމުކޮށް މިރުސް ކެއުމަކީ، ސިއްހަތަށް ފައިދާހުރި ކަމެކެވެ. އެހެން ނަމަވެސް ހަނދާންކޮށްދެމެވެ. މާގިނައިން ކުޅިކޮށް ކެއުމަކީ އެހައި އެދެވިގެންވާ ކަމެއް ނޫނެވެ.
