36 ދުވަސް ފަހުން ގޮއިދޫ މޮނީޓަރިން ހާލަތުން ނަގައިފި

ށ. ގޮއިދޫގައި އިއުލާންކުރި މޮނީޓަރިންގެ ހާލަތު ، 36 ދުވަސް ފަހުން މިދިޔަ އަންގާރަ ދުވަހު އުވައިލައިފިއެވެ.

Ads by MWSC

ގޮއިދޫ މޮނިޓަރިން ހާލަތަށް ލެވުނީ ބަލީގެ އަލާމާތްތައް ހުރެގެން ޓެސްޓު ކުރި މީހެއް ފައްސިވުމާ ގުޅިގެން މިދިޔަ މެއި މަހު 11 ވަނަ ދުވަހުގައެވެ. ގޮއިދޫ މޮނީޓަރިންގެ ހާލަތު އުވައިލައިފައިި ވަނީ އެރަށް އާންމު ހާލަތަށް ގެނައުމަށް ޓަކައި ނެގުނު 65 ސުންކުގެ ނަތީޖާ ނައްސިވުމާ ގުޅިގެންނެވެ.

އެ ރަށުން ފައްސިވެފައިވަނީ 36 މީހުންނެވެ. އަދި 34 މީހުން މިހާރު ވަނީ ބަލިން ފަސޭހަވެފައެވެ. މިއާ އެކު އެ ރަށުގައި ހަރަކާތްތެރި ވޭދަނައިގެ ގޮތުގައި 4 މީހެއް ވެއެވެ. އެ ރަށުން ޖުމްލަ 700 ސާމްޕަލް ވަނީ ނަގައިފައެވެ.

ކޮވިޑް-19ގެ ވޭދަނަތައް ފެނި، މޮނީޓަރިންގެ ހާލަތުގައި މިވަގުތު ރާއްޖޭގެ 63 ރަށެއް އެބައޮތް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ވަނީ ވިދާޅުވެފައެވެ.

ކޮވިޑްގެ ހާލަތު ވަަރަށް ބޮޑަށް ގޯސްވެ ކޮވިޑް ޖެހޭ މީހުންނާއި ބަލީގައި ނިޔާވާ މީހުންގެ އަދަދު ވަރަށް ބޮޑަށް މަތީގައި ހުރުމަށް ފަހު މިދިޔަ ހަފްތާއެއްހާ ދުވަހު ވަނީ އެ ނަންބަރުތައް ދަށްވާން ފަށައިފައެވެ. ނަމަވެސް މިދިޔަ ދުވަސްތަކުގައި ގިނަ ރަށްތަކަކުން ކޮވިޑް ވޭދަނަތައް ފެނި އެ ރަށްތައް ވަނީ މޮނިޓަރިންއަށް ލައިފައެވެ.