ދީނަށް ފުރައްސާރަކޮށް ދެކެވޭ ވާހަކައިން މާބޮޑަށް ނަފުރަތު އުފެދޭ: އަނީސާ
އިސްލާމް ދީނަށް ފުރައްސާރަކޮށް ދެކެވޭ ވާހަކައިގެ ސަބަބުން މި މުޖްތަމައުގައި މާބޮޑަށް ނަފްރަތު އުފެދޭކަމަށް ކުރީގެ މިނިސްޓަރ އަނީސާ އަހުމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ނައިބުކަން ވެސް ފުރުއްވައިފައިވާ އަނީސާ ވިދާޅުވީ ސެކިއުލަރިޒަމްއަށް ތާއިދުކޮށް ދެކެވޭ ވާހަކައާ ދެކޮޅަށް ހިޔާލު ފާޅު ކުރުމަކީ ނަފުރަތު އުފެއްދުން ކަމުގައިވާ ނަމަ، އިސްލާމްދީނަށް ކުރާ ފުރައްސާރައިގެ ސަބަބުން އުފެދޭ ނަފުރަތު މާބޮޑު ވާނެ ކަމަށެވެ.
"ސެކިއުލަރިޒަމްއަށް ތާއީދު ލިބޭގޮތަށް ދެކެވޭ ވާހަކައާ ދެކޮޅަށް ޚިޔާލުފާޅު ކުރުމަކީ ނަފުރަތު އުފެއްދުންކަމަށް ބަލާނަމަ ގަބޫލުކުރަން ޖެހޭ ޙަގީގަތަކީ އިސްލާމްދީނަށް ފުރައްސާރަކޮށް ދެކެވޭ ވާހަކައިގެ ސަބަބުން މިމުޖުތަމަޢުގަ އަދި މާބޮޑަށް ނަފުރަތު އުފެދޭނެކަން" އަނީސާ ކުރެއްވި ޓްވީޓެއްގައި ވިދާޅުވިއެވެ.
އާންމުތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުމާއި، ސިފަކުރުމުގައި ބައިވެރި ވުމާއި މުސްލިމަކަށް ކާފަރެއްކަމުގެ ތުހުމަތު ކުރުމަކީ ކުށަކަށް ހެދުމަށް ގާނޫނުލްއުގޫބާތަށް އިސްލާހު ގެނައުމަށް ރައްޔިތުންގެ މަޖިލީހަށް ތުޅާދޫ ދާއިރާގެ މެމްބަރު ހިސާން ހުށައެޅުއްވި ބިލާއެކު ސޯޝަލް މީޑިޔާ ހޫނުވެ އެބިލާ ދެކޮޅަށް ދަނީ ބޮޑު ކެމްޕެއިންއެއް ކުރަމުންނެވެ. އަދި އެބިލް އަނބުރާ ނެންގެވުމަށް އެދި 101 އިލްމްވެރިއެއްގެ ސޮޔާ އެކު ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިޙްއަށް ވަނީ ޕެޓިޝަނެއް ހުށައަޅައިފައެވެ. މީގެ އިތުރުން ވެސް އެބިލާ ދެކޮޅަށް ކައުންސިލްތަކުން ދަނީ ބަޔާންތައް ނެރެމުންނެވެ.
ރައްޔިތުންގެ މަޖިލީހަށް ސަރުކާރުން ފޮނުވި ބިލާ މެދުގައި އިލްމުވެރިން ފާޅުކުރަމުންދާ ކަންބޮޑުވުންތައް ހައްލު ކޮށްދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވި ކަމަށް އަދާލަތު ޕާޓީން ވަނީ ވިދާޅުވެފައެވެ.
ތެދުފިލެއް ދިވެހިން އެއްމެނަފުރަތުކުރާ އެއްމެރުޅިގަދަވާ މައްސަލައަކީ އިސްލާމްދީނަށްފުސައްސާރަކުރުން