އަނިޔާވެރިވުމަށް ގޮވައިލުމަކީ ޖިނާއީ ކުށެއްކަން ފުލުހުން ހަނދާންކޮށްދީފި
އިންޑިއާ ކޮމިޝަން ގޮއްވައިލާނެ ކަމަށް ބުނި މައްސަލައާ ގުޅިގެން ސޯޝަލް މީޑިއާގައި މިގޮތަށް ޚިޔާލު ފާޅުކުރުމަކީ ޖިނާއީ ކުށެއްކަން ފުލުހުން ހަނދާން ކޮށްދެއްވައިފިއެވެ.
ފުލުހުން މިރޭ ނެރުއްވި ބަޔާނެއްގައި ވިދާޅުވެފައި ވަނީ ރާއްޖޭގައި ހުންނަ އިންޑިއަން ހައި ކޮމިޝަން ގޮއްވައިލާނެ ކަމަށް ބުނެ ޓްވީޓު ކޮށްފައިވާ މައްސަލައާ ގުޅިގެން ކޯޓު އަމުރެއްގެ ދަށުން އުމުރުން 42 އަހަރުގެ ދިވެހި ފިރިހެނަކު މިރޭ ހައްޔަރު ކޮށްފައިވާ ކަމަށެވެ. އަދި މި މައްސަލަ ސީރިއަސް މައްސަލައެއްގެ ގޮތުގައި ދިވެހި ފުލުހުންގެ ޚިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުން ދާއިރު، މި އިންޒާރާ ގުޅިގެން އިންޑިއަން ހައި ކޮމިޝަނާއި ޗައިނާ އެމްބަސީގެ ސެކިއުރިޓީ މިހާރު ވަރުގަދަ ކޮށްފައިވާ ކަމަށް ވެސް ފުލުހުން ވިދާޅުވެފައިވެއެވެ.
"ސޯޝަލް މީޑިއާއާއި އެ ނޫން ވެސް ވަސީލަތްތައް ބޭނުން ކޮށްގެން މީހުންނަށް އަނިޔާވެރިވުމަށާއި މުދަލަށާއި ތަކެއްޗަށް ގެއްލުން ދިނުމަށް ގޮވައިލުމާއި އެފަދަ އަމަލުތަކަށް ތަރުހީބުދޭ ފަރާތްތަކުން އެކުރަނީ ޖިނާއީ ކުށެއްކަން ހަނދާންކޮށްދެމެވެ. އަދި އެފަދަ އަމަލުތައް ހިންގާ ފަރާތްތަކުގެ މައްސަލަ ތަހުގީގުކޮށް އަޅަންޖެހޭ ފިޔަވަޅުތައް އަޅާނެ ވާހަކަ ދަންނަވަމެވެ." ފުލުހުންގެ ބަޔާނުގައި ވިދާޅުވެފައިވެއެވެ.
މީގެ އިތުރުން ފުލުހުން ވިދާޅުވީ، ރާއްޖޭގައި ގާއިމް ކޮށްފައި ހުންނަ ބޭރު ޤައުމުތަކުގެ މިޝަންތަކުގެ ސަލާމަތާއި ރައްކާތެރިކަން ބެލެހެއްޓުމަކީ ރާއްޖޭގެ ސަލާމަތީ ބާރުތަަކުގެ މައްޗަށް ލާޒިމު ކަމަކަށްވީ ހިނދު، ދިވެހިރާއްޖެއާއި އަވައްޓެރި ޤައުމުތަކާ ދެމެދު އޮންނަ ގުޅުމަށާއި، ބޭރު ޤައުމުތަކުގެ މިޝަންތަކުގެ ރައްކާތެރިކަމަށް ބުރޫ އަރާ ގޮތަށް ކުރާ ކަންކަމަށް ހިތްވަރު ލިބޭ ގޮތަށް، އެފަދަ ކަންކަން ދިފާއުކޮށް ބައެއް އޮންލައިން ނޫސްތަކުން މައުލޫމާތު ފަތުރަމުންދާ ދިޔުމަކީ ފުލުހުން ވަރަށް ކަންބޮޑުވާ ކަމެއް ކަމަށެވެ.
