އިންޑިއަން ހައި ކޮމިޝަން ގޮއްވައިލާނެ ކަމަށް ބުނި މީހާ އެމްޑީޕީން ވަކިކޮށްފި
ރާއްޖޭގައި ހުންނަ އިންޑިއަން ހައި ކޮމިޝަން ގޮއްވައިލާނެ ކަމަށް ބުނި ކަމުގެ ތުހުމަތުގައި ހައްޔަރުކޮށްފައިވާ މީހާ އެމްޑީޕީން ވަކިކޮށްފިއެވެ.
އެމްޑީޕީން މިރޭ ނެރުނު ނޫސް ބަޔާނެއްގައި ބުނެފައި ވަނީ އިންޑިއާ ހައި ކޮމިޝަން ގޮއްވައިލާން އިންޒާރުދީ ޓްވީޓްކޮށްފައިވާ ކަމުގެ ތުހުމަތުގައި ފުލުހުން ހައްޔަރު ކޮށްފައިވާ މުޙައްމަދު އިނާދުގެ މައްޗަށް ފުލުހުން ހިންގާ ތަޙުޤީޤަށް ބަލައި ، މުޙައްމަދު އިނާދު އެމްޑީޕީން ވަކިކުރުމަށް އެ ޕާޓީގެ ފިޔަވަޅު އަޅާ ކޮމިޓީން މިއަދު ވަނީ ނިންމައިފައިވާ ކަމަށެވެ.
އެމްޑީޕީން އިތުރަށް ބުނެފައި ވަނީ ރާއްޖޭގައި ހުންނަ އިންޑިއާގެ ހައި ކޮމިޝަން ގޮއްވައިލާނެ ކަމަށް ބުނެ ޓްވީޓްކުރި މައްސަލައިގައި އެމް.ޑީ.ޕީއިން އިންތިހާއަށް ކަންބޮޑުވުން ފާޅުކޮށް، އެކަން ހަރުއަޑުން ކުށްވެރި ކުރާ ކަމަށެވެ.
ޓެރަރިޒަމް ފަދަ ބޮޑެތި ކުށްތަކަކީ އެމްޑީޕީއިން އެއްވެސް މިންވަރަކަށް ބަލައިގަންނާނެ ޖަރީމާއެއް ނޫން ކަމަށާއި، މިފަދަ ނުރައްކާތެރި ކަންކަން ކުރާނެކަމުގެ އިންޒާރުދީ، އަދި މީހުންނަށާއި، މުދަލާއި ތަކެއްޗަށް ގެއްލުން ދިނުމަށް ގޮވައިލާ މިފަދަ ކުށްތަކަށް ތަރުހީބު ދިނުމަކީ ޖިނާއީ ކުށެއްކަމުން، މިފަދަ ކުށްތަކަށް އަރައިގަންނަން އިންޒާރުދީ، އަދި ހިތްވަރު ދޭ ފަރާތްތަކާ މެދު އަވަސް އަދި ފުރިހަމަ ތަޙްޤީޤެއް ހިންގައި، ކުށްވެރީންނަށް ހައްޤު އަދަބު ލިބިދިނުމަށް ކަމާ ބެހޭ މުއައްސަސާތަކަށް އެ ޕާޓީން ވަނީ ގޮވައިލައްވައިފައެވެ.
