އަންމަޓީ ހައްޔަރު ކުރަން ހައިކޯޓުން އަމުރުކޮށްފި
ސީލައިފްގެ މެނޭޖިންގް ޑިރެކްޓަރ އަހުމަދު މޫސާ (އަންމަޓީ) ދޫކޮށްލަން ކްރިމިނަލް ކޯޓުން ކުރި އަމުރު ހައިކޯޓުން ބާތިލުކޮށް، އޭނާ ހައްޔަރުކުރަން އަމުރު ކޮށްފިއެވެ.
އައްމަޓީ ދޫކޮށްލުމަށް ކްރިމިނަލް ކޯޓުން އަމުރުކުރީ މިދިޔަ މަހުގެ 17 ވަނަ ދުވަހުގައެވެ. ނަމަވެސް ދައުލަތުން އެދުނު ފަދައިނަ ޝަރީއަތް ނިމެންދެން އޭނާ ބަންދު ކުރުމަށް ހައިކޯޓުން މިއަދު ވަނީ އަމުރު ކޮށްފައެވެ.
ޝަރީއަތް ނިމެންދެން އައްމަޓީ ބަންދު ކުރުމަށް ދައުލަތުން އެދިފައިވަނީ ތިން ކަމެއް ފާހަގަކޮށެވެ. އެއީ އޭނާގެ ފަރާތުން ހެކިންނަށް ނުފޫޒު ފޯރުވައިފާނެ ކަމުގެ އިހުތިމާލު އޮތުމާއި، ޝަރީއަތަށް ހާޒިރުނުވެ ފިލުމުގެ ފުރުސަތު އޮތުމުގެ އިތުރުން މުޖުތަމައަށް ނުރައްކާވާނެ ކަން ފާހަގަކޮށެވެ.
މިއަދު ހައިކޯޓުގައި ކުރިއަށްދިޔަ މި މައްސަލައިގެ އަޑުއެހުމުގައި، ރިޔާސަތު ބެލެހެއްޓެވި ފަނޑިޔާރު ހުސައިން ޝަހީދުގެ ރައުޔުގައި ފާހަގަކޮށްފައި ވަނީ މި މައްސަލާގައި ދައުލަތުގެ ފަރާތުން ހުށަހަޅާފައިވާ ހެކިންނަކީ އަންމަޓީގެ ކުރީގެ މުވައްޒަފުން ކަމަށެވެ. ނަމަވެސް އޭނާގެ ފަރާތުން މީގެ ކުރިން ހެއްކަށް ނުފޫޒު ފޯރުވިކަމުގެ އަމަލެއް ފެނިފައި ނުވާ ކަމަށާއި އަދި ދައުލަތުން ވެސް އެކަމަށް އިއުތިރާފްވެފައި ވާތީ އޭނާގެ ފަރާތުން ހެއްކަށް ނުފޫޒު ފޯރުވައިފާނެ ކަމަށް ނުދެކޭ ކަމަށް ވެސް އެރައުޔުގައި ވަނީ ފާހަގަކޮށްފައެވެ.
