މާދަމާ ގެންނާނެކަމަށް ފުލުހުން ވިދާޅުވި 13 އަހަރުގެ ކުއްޖާގެ ހަށިގަނޑު، މިއަދު ގެނެސްފި
ރަހީނުކޮށް ހުޅުމާލޭ ދެވަނަ ފިޔަވަހީގައި މަރައިލި އުމުރުން 13 އަހަރުގެ ކުއްޖާގެ ހަށިގަނޑު، އިންޑިއާއިން ޕޯސްޓްމޯޓަމް ހެދުމަށް ފަހު މިއަދު މާލެ ގެނެސްފިއެވެ.
މީގެކުރިން "ދެން" އަށް މައުލޫމާތު ދެއްވަމުން ފުލުހުން ވިދާޅުވީ، ކުއްޖާގެ ހަށިގަނޑު ރާއްޖެއަށް ގެންނަނީ މާދަމާ ކަމަށެވެ. ނަމަވެސް ފަހުން ނޫސްވެރިންނަށް މައުލޫމާތު ދެއްވަމުން ފުލުހުން ވިދާޅުވީ ޕޯސްޓްމޯޓަމް ހެދުމަށް ފަހު ކުއްޖާގެ ހަށިގަނޑު މިއަދު މާލެ ގެނެސްފައިވާ ކަމަށެވެ.
ކުއްޖާގެ ހަށިގަނޑު، ޕޯސްޓްމޯޓަމް ހެދުމަށް އިންޑިއާއަށް ފޮނުވައިފައި ވަނީ މި މަހުގެ 5 ވަނަ ދުވަހުއެވެ.
އުމުރުން 13 އަހަރުގެ އެ ކުއްޖާގެ ކަށުނަމާދު އޮތީ މިއަދު މަޣްރިބް ނަމާދަށް ފަހު، މަސްޖިދުލް ތަޢާވުން (އާސަހަރާ މިސްކިތު) ގައެވެ.
މި ކުއްޖާ މަރައިލައިފައި އޮއްވާ ފެނިފައި ވަނީ މިދިޔަ ޖޫން މަހުގެ 22 ވަނަ ދުވަހުއެވެ. ޕޯސްޓްމޯޓަމް ހެދުމަށް ޓަކައި ކުއްޖާގެ ހަށިގަނޑު ރާއްޖެއިން ބޭރަށް ފޮނުވައިފައި ވަނީ އެ ކުއްޖާ މަރުވެފައި އޮއްވާ ފެނުނުތާ 19 ދުވަސް ފަހުންނެވެ. ފުލުހުން ވިދާޅުވީ ހަށިިގަނޑު ފޮނުވުން ލަސްވީ އޮފީސްތައް ބަންދުވުމާ އެކު އިދާރީގޮތުން ދެ ގައުމުގެ ދެމެދުގައި ފުރިހަމަ ކުރަން ޖެހޭ މުއާމަލާތްތަކެއް ފުރިހަމަ ނުކުރެވިގެން ކަމަށެވެ.
ކުއްޖާ މަރައިލި މައްސަލައިގައި ވަނީ އުމުރުން 17 އަހަރުގެ ކުއްޖަކާއި 27 އަހަރުގެ މީހަކު ހައްޔަރު ކޮށްފައެވެ. އެތަނުން 17 އަހަރުގެ ކުއްޖާ 15 ދުވަހަށް ބަންދު ކުރަން މުއްދަތު ޖެހި އިރު، 27 އަހަރުގެ މީހާ ބަންދު ކޮށްފައި ވަނީ ޝަރީއަތް ނިމެންދެކަށެވެ.
