އެސްޓީއޯއިން ވިއްކާ ތެލުގެ އަގު އަނެއްކާ ވެސް ބޮޑުކޮށްފި

ދުނިޔޭގެ ތެލުގެ ބާޒާރަށް އައި ބަދަލާ އެކު އެސްޓީއޯއިން ވިއްކާ ތެލުގެ އަގު އަނެއްކާ ވެސް ބޮޑުކޮށްފިއެވެ.

އެ ކުންފުނިން ނެރުނު ބަޔާނެއްގައި ބުނި މި ބަދަލާއެކު އެފްއެސްއެމްއިން ކުރިން 10.27ރ.އަށް ލިބުނު ޑީސަލް ލީޓަރެއް މިއަދުން ފެށިގެން ލިބޭނީ 10.95ރ.އަށް ކަމަށެވެ. އަދި ކުރިން 9.74ރ.އަށް ލިބުނު ޕެޓްރޯލް ލީޓަރެއް މިހާރު ލިބޭނީ 10.72ރ. އަށް ކަމަށް އެ ކުންފުނިން ބުންޏެވެ.

ދުނިޔޭގެ ތެލުގެ ބާޒާރުގައި ތެޔޮ ފީފާއެއްގެ އަގު ވަނީ 75.20 ޑޮލަރަށް އަރައިފައެވެ. އެއީ ދިވެހި ރުފިޔާއިން ބަލާނަމަ 1،159 ރުފިޔާ 5 ލާރިއެވެ. މީގެ ކުރިން ދުނިޔޭގެ ބާޒާރުގައި ތެޔޮ ފީފާއެއް ވިއްކަމުން އައިސްފައި ވަނީ 71 ޑޮލަރަށެވެ. އެއީ ދިވެހި ރުފިޔާއިން ބަލާ ނަމަ 1094 ރުފިޔާ 82 ލާރިއެއެވެ.

އެސްޓީއޯއިން ވިއްކާ ތެލުގެ އަގު މިދިޔަ ޖޫންމަހުގެ 20 ވަނަ ދުވަހު ވެސް އުފުލުނު އިރު އޭގެ ކުރިން ޑީސަލް ލީޓަރެއް ވިއްކީ 9.79ރ. އަށެވެ. އަދި ޕެޓްރޯލް ލިޓަރެއް ވިއްކީ 8.85ރ. އަށެވެ.

ދުނިޔޭގެ ބާޒާރުގައި ތެލުގެ އަގަށް އަންނަ ކޮންމެ ބަދަލަކާ އެކު ރާއްޖޭގެ ތެލުގެ ބާޒާރަށް އެކަމުގެ އަސަރުތައް ކުރެއެވެ.