ސަލްމާން މިސްކިތުގެ ޑިޒައިން ކޮޕީ ކުރި މައްސަލައިގައި ދައުވާ ކުރާނެކަމުގެ އިންޒާރު ދީފި: އިސްލާމިކް މިނިސްޓަރ
ރައީސް ޔާމީން އަބްދުލްޤައްޔޫމްގެ ވެރިކަމުގައި ބިނާކުރި ކިންގު ސަލްމާން މިސްކިތުގެ ޑިޒައިނަކީ ކޮޕީކޮށްފައިވާ ޑިޒައިނެއް ކަމަށާއި ކޮޕީރައިޓް މައްސަލައިގައި ދައުވާކުރާނެ ކަމަށް ބުނެ އިސްލާމިކް މިނިސްޓްރީއަށް ސިޓީއެއް ލިބިފައިވާ ކަމަށް އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވެއްޖެއެވެ.
މިނިސްޓަރ ޒާހިރު ވިދާޅުވީ، ކޮޕީކޮށްފައިވާ ކަމަށް ބުނެ ދައުވާ ކުރަން އިންޒާރު ދީފައިވަނީ މެލޭޝިއާގެ ކުންފުންޏަކުން ކަމަށެވެ. އަދި އެ ކުންފުނީގެ ޑިޒައިނެއް ކޮޕީކޮށްގެން ބޭނުންކޮށްފައިވާ ކަމަށާއި ގެނެސްފައި ވަނީ ކުޑަ ބަދަލެއް ކަމަށް ވެސް މިނިސްޓަރ ވިދާޅުވިއެވެ. މިނިސްޓަރ އިތުރަށް ވިދާޅުވީ، އެ ކުންފުނިން ފޮނުވި އިންޒާރުގެ ސިޓީއާ އެކު، އެ ކުންފުނީގެ މީހުންގެ އަތުގައި ހުރިހާ ލިޔެކިޔުންތަކާއި ހެކިތައް ފޮނުވައިފައިވާ ކަމަށެވެ
"އެ ބޭފުޅުންގެ ޒިނައިނެއް ނަގައިގެން ކޮޕީކޮށްގެން ބޭނުންކޮށްފައޭ އެ އޮތީ. ހަމަ ކުޑަ ބަދަލެކޭ ގެނެސްފައި އޮތީ. އެ ބޭފުޅުން އަތު ލިޔެކިޔުންތަކާއި ހެކިތައް އެބަހުރި. އެ ފޮޓޯތައް ވެސް އަޅުގަނޑުމެންނަށް ފޮނުވި ސިޓީގައި އެޓޭޗްކޮށްފައި އެބަހުރި." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އެ ސިޓީއާ ގުޅޭ މައްސަލަ މިހާރު އެޓަރނީ ޖެނެރަލްގެ އޮފީހާ ހަވާލުކޮށްފައިވާ ކަމަށެވެ. އަދި އެ ކުންފުނިން ރައީސް އޮފީހުގެ ތެރޭގައި ވެސް ބައްދަލުވުންތައް ބޭއްވި ކަމަށާއި އެ ފޮޓޯތައް ވެސް ހިއްސާކުރި ކަމަށް މިނިސްޓަރ ވިދާޅުވިއެވެ.
މި މައްސަލައިގައި މެލޭޝިއާ ކުންފުނީގެ ހައްޤު ހޯދުމަށް ޓަކައި މަސައްކަތްކޮށް، ކޯޓަށް ދާނެ ކަމަށް އެ ކުންފުނިން ފޮނުވި ސިޓީގައި ބުނެފައިވެއެވެ.
ސަލްމާން މިސްކިތް ހުޅުވުން ލަސް ވަނީ މިކަމާ ހެދިގެންތޯ ސުވާލު ކުރުމުން މިނިސްޓަރ ވިދާޅުވީ، މިސްކިތް ހުޅުވުން ލަސް ވަނީ ސައުދީގެ އޮފިޝަލުންގެ ވަފުދު ރާއްޖެ އައުން ލަސްވުމުން ކަމަށެވެ. އަދި ކިންގް ސަލްމާން މިސްކިތް ހުޅުުވާނެ ތާރީޚް ކަނޑައަޅާނީ ސައުދީގެ އޮފިޝަލުން ރާއްޖެ އައުމަށް ފަހު ކަމަށް އޭނާ ވިދާޅުވިއެވެ.
