ރިލްވާން މައްސަލައިގައި ހެކިބަސް ދޭ ފަރާތްތަކަށް ރައްކާތެރިކަން ދޭނެ ޕްރޮގްރާމެއް ރާވަނީ
މިނިވަން ނޫސްވެރިޔާ އަހުމަދު ރިލްވާން ޢަބްދުﷲ ވަގަށް ނަގައި ގެއްލުވައިލި މައްސަލައާ ގުޅިގެން ކުރިއަށް ގެންދާ ތަހުގީގަށް ހެކިބަސް ދޭ މީހުންނަށް ރައްކާތެރިކަން ލިބެން ޖެހޭ ކަމަށާއި އެ ކަމަށް ގޮތްތަކެއް ރާވަމުން އަންނަ ކަމަށް، ގެއްލުވައިލައިފައިވާ މީހުންނާއި މަރައިލައިފައިވާ މީހުންގެ މައްސަލަތައް ބަލަން މި ސަރުކާރުން އެކުލަވައިލި ރިޔާސީ ކޮމިޝަނުން މިއަދު ވިދާޅުވެއްޖެއެވެ.
ރިލްވާން ގެއްލުވާލިތާ މިއަދަށް މިވަނީ 7 އަހަރު ފުރިފައެވެ. މިއަދާ ގުޅިގެން އެ ކޮމިޝަނުން ނެރުނު ބަޔާނެއްގައި ވިދާޅުވެފައި ވަނީ، އެ މައްސަލައިގައި ކޮމިޝަނުން ކުރަމުންދާ ތަހުގީގުގެ އަމާޒަކީ އެ ޖަރީމާ ހިންގުމުގައި ކުޑަ ނަމަވެސް ބައިވެރިވުމެއް އޮތް ހުރިހާ އެންމެން ޝަރީއަތުގެ ކުރިމައްޗަށް ގެނައުން ކަމަށެވެ.
ނަމަވެސް މި މައްސަލައިގެ ތަހުގީގު ހިންގުމުގައި ގިނަ ހުރަސްތަކެއް ހުރި ކަމަށާއި އޭގެ ތެރެއިން އެއް ކަމަކީ މައުލޫމާތު އެނގޭ މީހުން ހެކިބަސް ދިނުމަށް ޖެހިލުންވާ މައްސަލަ ކަމަށް އެ ކޮމިޝަނުން ފާހަގަ ކުރައްވައިފައިވެއެވެ. އަދި އެ މައްސަލަ ހައްލު ކުރުމުގެ ގޮތުން ކަމާބެހޭ މުއައްސަސާތަކާ ގުޅިގެން މަސައްކަތްތަކެއް ކުރަމުން އަންނަ ކަމަށް ރިޔާސީ ކޮމިޝަނުން ވިދާޅުވިއެވެ.
"މީގެ ސަބަބުން ޖިނާއީ އަދުލުގެ ނިޒާމަށް ރައްޔިތުން ކުރާ އިތުބާރު އިތުރުވެ، މައްސަލަތަކުގައި ހެކިބަސް ދޭން ބޭނުންވާ ފަރާތްތަކުން، ހެކިބަސް ދިނުމުގައި ޖެހިލުންވުން ކުޑަ ކުރެވިގެންދާނެ ކަމަށް ކޮމިޝަނުން ދެކެން،" މަރު ކޮމިޝަނުން ނެރުނު ބަޔާނުގައި ވިދާޅުވެފައިވެއެވެ.
އެ ބަޔާނުގައި އިތުރަށް ވިދާޅުވެފައި ވަނީ، މި މައްސަލައިގައި ހެކިބަސް ދޭ މީހުންނަށް ރައްކާތެރިކަން ދިނުމާ ގުޅޭ ޕްރޮގްރާމެއް ބޭރުގެ ކަމާ ގުޅޭ ތަޖުރިބާކާރުންގެ އެހީތެރިކަމާ އެކު އެކުލަވައިލަމުން އަންނަ ކަމަށެވެ. އެ ޕްރޮގްރާމް ކުރިއަށް ގެންދާނީ ރާއްޖޭގެ އިޖުތިމާއީ، ސިޔާސީ، ދީނީ އަދި އާބާދީގެ މައްޗަށް ރިއާޔަތް ކޮށްގެން ކަމަށް ވެސް އެ ކޮމިޝަނުން ވިދާޅުވެފައިވެއެވެ.
