ނަޝީދަށް ދިން ހަމަލާގެ ތަފްސީލް ހާމަ ކުރަން ބޭއްވި އެމްޑީޕީ ޤައުމީ މަޖިލިސްގެ ކޯރަމް ގެއްލި ވޯޓަކަށް ނޭހުނު
ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ)އިން މިރޭ ބޭއްވި އެ ޕާޓީގެ 182 ވަނަ ޤައުމީ ޖަލްސާގެ ކޯރަމް ގެއްލިއްޖެއެވެ.
އެމްޑީޕީއިން ވަނީ އެ ޕާޓީގެ ޤައުމީ މަޖިލީހުގެ ޖަލްސާތައް ކޮންމެ ހަފްތާއަކު އެއްފަހަރު ބޭއްވުމަށް ނިންމައިފައެވެ. އެއީ ރައީސް ނަޝީދަށް އަމާޒުކޮށް މެއި ހަވަނަ ދުވަހު ދިން ހަމަލާ ތަހުޤީޤް ކުރިއަށްދާ ގޮތް ބެލުމަށް އެ ޕާޓީން އުފެއްދި "މޭ ހައެއް" ކޮމެޓީގެ ހޯދުންތައް ޤައުމީ މަޖިލީހާ ހިއްސާ ކުރުމަށެވެ.
މިރޭ އެ ޕާޓީން ބޭއްވި ޤައުމީ މަޖިލީހުގައި ވަނީ މޭ ހައެއް ކޮމިޓީން މިދިޔަ ހަފްތާގެ ތެރޭގައި ކުރެވުނު މަސައްކަތުގެ ތަފްސީލް ހާމަކޮށްފައެވެ. އަދި މެންބަރުންނަށް ސުވާލު ކުރުމުގެ ފުުރުސަތު ވެސް ވަނީ ދީފައެވެ.
މިރޭގެ ޤައުމީ މަޖިލީހުގެ ޖަލްސާގައި ބައިވެރިވެފައި ވަނީ ޖުމްލަ 38 މެންބަރުންނެވެ. ޤައުމީ މަޖިލީހުގެ ކޯރަމަކީ 37 މެންބަރުންނެވެ. މި މަޖިލީހުގައި ޖުމްލަ 142 މެންބަރުން ތިއްބަވައެވެ.
މަޖިލީހުގައި މިރޭ މެންބަރުންނަށް ވާހަކަ ދެއްކުމުގެ ފުުރުސަތު ދިނުމަށް ފަހު، ދެ ހުށަހެޅުމަކަށް ވޯޓަށް އަހަން އުޅުނެވެ. އެއް ހުށަހެޅުމަކީ ޤައުމީ މަޖިލީހުގެ ޖަލްސާތައް ފިޒިކަލްކޮށް ބޭއްވުމެވެ. ވޯޓަށް އެހުމަށް ރިޔާސަތުން ބެލިއިރު ކޯރަމް ވަނީ ގެއްލިފައެވެ. ވޯޓަށް އަހަން ބެލިއިރު މަޖިލީހުގައި ތިއްބެވީ 34 ބޭފުޅުންނެވެ.
މިރޭގެ ޖަލްސާގައި ބައިވެރިވެ ވަޑައިގެންނެވި ބޭފުޅުން ވެސް ވަނީ ޖަލްސާގައި މެންބަރުންގެ އަދަދު މަދުވުމުން ނުރުހުން ފާޅުކޮށްފައެވެ. އަދި ކެބިނެޓްގެ އެއްވެސް ވަޒީރަކު ޖަލްސާގައި ބައިވެރިވެވަޑައިނުގަންނަވާކަން ބައެއް މެންބަރުން ފާހަގަ ކުރެއްވިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސް އިބްރާހީމް މުޙައްމަދު ޞާލިޙް ވަނީ މީގެ ކުރިން ބޭއްވި އެމްޑީޕީ ޤައުމީ މަޖިލީހުގެ ބައްދަލުވުމުގައި ބައިވެރިވެވަޑައިގަތް މެމްބަރުން އަދަދު މަދުވީ، އެބޭފުޅުންގެ ޚިޔާލާ މަޖިލީހަށް ހުށަހެޅިކަންތަކާ ތަފާތުވުމެއް ހުރެފައި، ރައީސް ނަޝީދުގެ ހުށަހެޅުމަކާ ސީދާ ދެކޮޅަށް ނިންމުމެއް ނިންމަން ޤައުމީ މަޖިލީހުގެ މެމްބަރުން ބޭނުންވެ ވަޑައިނުގަންނަވާތީކަމަށް ގަބޫލުކުރައްވާ ކަމަށް ވިދާޅުވެފައެވެ.
