ސިވިލްސާވަންޓުންނާ ދޭތެރޭ ސަރުކާރުން އަމަލު ކުރަމުން ދަނީ ދެވަނަ ދަރަޖައިގައި:އިދިކޮޅު
ދިވެހި ސިވިލް ސަރވިސްގެ މުވައްޒަފުންނަކީ ދިވެހި ސިވިލް ސަރވިސް ޤާނޫނުގައި ބުނާ ފަދައިން ސަރުކާރު ހިންގުމުގެ މައިގަނޑު މަސައްކަތްތައް ކުރާ މުވައްޒަފުންކަމަށް ވީނަމަވެސް އެ މުވައްޒަފުންނާ މެދު ރައީސް އިބްރާހީމް މުޙަންމަދު ޞާލިޙްގެ ސަރުކާރުން ފެށުނީއްސުރެ މިއަދާ ހަމައަށް ވެސް ޢަމަލުކުރަމުން ދަނީ ދެވަނަ ދަރަޖައިގެ މުވައްޒަފުންގެ ގޮތުގައިކަމަށް އިދިކޮޅު ކޯލިޝަނުން ބުނެފިއެވެ.
މުސާރައިގެ ފަރަގު ކުޑަކުރުމަށް ގޮވައިލާ ސިވިލް ސާވަންޓުން އިއްޔެ އިހްތިޖާޖު ކުރަންފަށައިފައި ވާއިރު އިދިކޮޅުން ނެރުނު ނޫސްބަޔާނެއްގައި ބުނީ އެމްޑީޕީގެ ސަރުކާރެއް އަންނަ ކޮންމެ ފަހަރަކު އެ މުވައްޒަފުންނަށް ލިބިދޭ ޢިނާޔަތްތައް ކަނޑައިލުން ނުވަތަ އުނިކޮށްލުން ފަދަ ކަންކަން ހިންގާފައިވާ ކަމަށާއި އެގޮތުން 2008 ވަނަ އަހަރު އިންތިޚާބުވި އެމްޑީޕީގެ ސަރުކާރާއެކު ސިވިލް ސަރވިސް މުވައްޒަފުންގެ މުސާރަތައް އުނިކޮށްލިކަމަށާއި އެމުސާރަތައް އިޢާދަކޮށްދިނުމަށް ކޯޓުތަކުން ޙުކުމް ކުރުމުން ވެސް ރައީސް ނަޝީދުގެ އޭރުގެ އެމްޑީޕީ ސަރުކާރުން އެކަން ކޮށްފައި ނުވާކަމަށެވެ.
އިދިކޮޅުގެ ބަޔާނުގައި އިތުރަށް ބުނީ ދިވެހި ސިވިލް ސަރވިސްގެ މުވައްޒަފުންގެ މުސާރައާއި ޢިނާޔަތްތައް ރަނގަޅު ކޮށްދޭނެ ކަމަށް މަތިމައްޗަށް ވަޢުދުވެގެން އިންތިޚާބުވި ރައީސް އިބްރާހީމް މުޙަންމަދު ޞޯލިޙުގެ މިހާރުގެ ސަރުކާރުން އެވަޢުދުތައް ފުއްދުމުގެ ބަދަލުގައި ފެނިގެންދަނީ މަތިމައްޗަށް ސިޔާސީ މަޤާމުތައް އުފައްދައި ދައުލަތުގެ ޚަޒާނާ އެމަނިކުފާނުގެ އަމިއްލަ ޖާހު ބޮޑުކުރުމަށް ހޭދަކުރާ މަންޒަރުކަމަށާއި އެއްވެސް މަސްއޫލިއްޔަތެއް އަދި މަސައްކަތެއް ނެތި ސިޔާސީ އެތައް މަޤާމެއް އުފައްދައިފައިވާކަމަށެވެ.
"ވެރިކަމަށް ވަޑައިގަތުމަށް މިއަދުގެ ރައީސް ވަޢުދުވެވަޑައިގެންނެވި "އެންމެ ކުޑަ އުޖޫރަ"ވެފައި ވަނީ ސިވިލް ސަރވިސް އާއި އެހެނިހެން ދާއިރާތަކުގެ މުވައްޒަފުންގެ އެއިރަކު ފާޅުކުރާ ކަންބޮޑުވުންތައް މައިތިރިކުރުމަށް ސަރުކާރުން ތަޅާ ބޯޅައަކަށެވެ. ދިވެހި ސިވިލް ސަރވިސްގެ ޤާނޫނާއި ވަޒީފާއާ ބެހޭ ޤާނޫނާއި ޚިލާފަށް ދިވެހި ސިވިލް ސަރވިސް މުވައްޒަފުންގެ ޙައްޤުތަކަށް އަރައިގަތުން އިންތިހާއަށް އިތުރުވެއްޖެއެވެ." އިދިކޮޅުގެ ބަޔާނުގައި ބުނެފައިވެއެވެ.
ދަށް ފަންތީގެ މުވައްޒަފުންގެ މުސާރަ ބޮޑުކުރުމާއި މިނިމަމް ވޭޖު ކަނޑައެޅުން އަވަސް ކުރަން ސަރުކާރަށް ޕްރެޝާ ކުރުމަށް ސިވިލް ސާވަންޓުން ފަށައިފައިވާ ހިމޭން އިހްތިޖާޖްގައި މިއަދު މަސައްކަތް ނުކުރާ ދުވަހެއްގެ ގޮތުގައި ކަނޑައެޅުމުން އާންމުންނަށް ލިބެން ޖެހޭ ޚިދުމަތްތަކަށް ވަނީ ބުރޫ އަރައިފައެވެ.
ހުރިހާ ސަރުކާރަކަުންވެސް ސިވިލް ސަރވަންޓުންނަށް އުނދަގޫކުރަނީ. މިހާރު ހިޔާ ފްލެޓްދޫކޮށްލި މީހުންނަށް ވިނަރެސްފްލެޓަށް ޝަރުތުހަމަވާނެގޮތެއްވެސް ނެތް. ހައުސިންގ މިނިސްތާރީން ޖަވާބެއްނުދޭ. ނޫސްވެރިންމިކަމާވެސް އުޅެބަލަ.