70 އިންސައްތަ އޮފީސްތަކުގައި މަސައްކަތެއް ނުކުރޭ، ސިވިލް ސާވެންޓުން ތިބީ ހަޅުތާލުގައި

ދަށް ފަންތީގެ މުވައްޒަފުންގެ މުސާރަ ބޮޑުކުރުމާއި މިނިމަމް ވޭޖު ކަނޑައެޅުން އަވަސް ކުރަން ސަރުކާރަށް ޕްރެޝާ ކުރުމަށް ސިވިލް ސާވަންޓުން ފަށައިފައިވާ ހިމޭން އިހްތިޖާޖްގައި ބައިވެރިވުމުގެ ގޮތުން މިއަދު 70އިންސައްތަ އޮފީސްތަކުގައި މަސައްކަތް ނުކުރާ ކަަމަށް ސިވިލް ސާވެންޓުންގެ ހައްޤުގައި މަސައްކަތް ކުރާ ޖަމިއްޔާއެއް ކަމަށްވާ ދިވެހި ސިވިލް ސާވެންޓްސް އެސޯސިއޭޝަންއިން ހާމަކޮށްފިއެވެ.

Ads by Hajj Corporation

"ދެން"އަށް މައުލޫމާތު ދެމުން އެ ޖަމިއްޔާގައި މިހަރަކާތުގައި އިސްކޮށް ހަރަކާތްތެރިވާ ފަރާތަކުން ބުނެފައި ވަނީ، ހަރުތާޅު ކުރުމުގެ ބޭނުމަކީ އެމީހުންގެ ޑިމާންޑްތައް ސަރުކާރަށް އިއްވުން ކަމަށެވެ. މި އިހްތިޖާޖުތަކުގައި އެންމެ ފުރަތަމަ ސިވިލް ސާވެންޓުން އިއްޔެ މަަސައްކަތަށް ނިކުމެފައި ވަނީ ކަޅު ހެދުމުގައެވެ. އޭގެ ފަހުން މިއަދު ގިނަ އޮފީސްތަކެއްގައި އެމީހުން ވަނީ މަސައްކަތް ހުއްޓައިލާފައެވެ.

"70އިންސައްތަ އޮފީސްތަކުގެ މުވައްޒިފުން ވަނީ މަސައްކަތް ހުއްޓައިލާފައި. ބައެއް މީހުން ސަލާމުގައި ތިބި އިރު،. ދިޔަ މީހުންވެސް އިހްތިޖާޖް ކުރުމުގެ ގޮތުން މަސައްކަތްވަނީ ހުއްޓައިލާފައި" ޖަމިއްޔާގެ އޮފިޝަލް ވިދާޅުވިއެވެ.

ސިވިލް ސަރވަންޓުންގެ ޑިމާންޑްގެ ތެރޭގައި ލިވިން އެލަވަންސް ލިބޭނެ ގޮތް ހަމަޖައްސައިދިނުމާއި ހުރިހާ މަގާމުތަކަށް ސެޓްފިކެޓުގެ ކުރިއެރުން ލިބޭނެ ގޮތް ހަމަޖައްސައިދިނުން ހިމެނެއެވެ. އޭގެ އިތުރުން ސްކޫލްތަކުގެ އިދާރީ މުވައްޒަފުންނަށް އިތުރު އެލަވަންސެއް ހަމަޖައްސައިދިނުމަށް ވެސް ސިވިލް ސަރވަންޓުން ދަނީ ގޮވައިލަމުންނެވެ.

ދިވެހި ސިވިލް ސާވެންޓްސް އެސޯސިއޭޝަންގެ ފަރާތުން ވާހަކަ ދައްކަމުން އޭނާ އިތުރަށް ބުނެފައި ވަނީ، ބައެއް ފަރާތްތަކުން މި އިޙްތިޖާޖްގައި ބައިވެރިވުމަށް ޖެހިލުންވާ ކަމަށާއި ބައިވެރިވެއްޖެ ނަމަ ފިޔަވަޅު އަޅާނެ ކަމަށް ބިރު ގަންނަ ކަމަށް ބުންޏެވެ.

"މިއީ އަހަރެމެން އެންމެންގެ ހައްޤުގައި ކުރާ ކަމެއް. ވަރަށް ގިނަ ދުވަސް ވެއްޖެ އަހަރެމެންގެ ހައްޤުތަކުގެ ވާހަކަ ނުދައްކާ ތިބޭތާ. އިޙްތިޖާޖް ކުރުމަކީ ވެސް ޤާނޫނުން ލިބޭ ހައްޤެއް" އޮފިޝަލު ބުންޏެވެ.

ސިވިލް ސާވެންޓުން އިޙްތިޖާޖް ކުރަން ފަށައިފައިވާއިރު، މިދިޔަ ހަފްތާގައި ޤައުމީ އެއަރލައިން މޯލްޑިވިއަންގެ ޕައިލެޓުންގެ މުސާރަ އިއާދަކޮށްދީފައި ނުވާތީ، ޕައިލެޓުން ހަޅުތާލު ކުރަން ނިންމާފައިވަނިކޮށް ރައީސް ޞާލިޙް ވަނީ އެ ބޭފުޅުންނާ ބައްދަލު ކުރައްވާ މުސާރައަށް ހެޔޮ ބަދަލެއް ގެންނަވާނެ ކަމަށް ވިދާޅުވެފައެވެ.