މޯލްޑިވްސް ސިވިލްސާވަންޓްސް އެސޯސިއޭޝަނަކީ ރަޖިސްޓްރީ ނުކުރާ ފަރާތެއްކަމަށް ބުނުމުން ރައްދު ދީފި
ދިވެހި ސިވިލް ސަރވަންޓްސް އެސޯސިއޭޝަންގެ ނަމުގައި މީސްމީޑިއާގައި މިހާރު ޙަރަކާތްތެރިވާ ފަރާތަކީ، ގަވާއިދުން ރަޖިސްޓްރީކޮށްފައިވާ ޖަމިއްޔާއެއް ނޫންކަމަށް ސިވިލް ސާވިސް ކޮމިޝަން އޮފް މޯލްޑިވްސްއިން ބުނުމުން އެ ޖަމްއިއްޔާއިން އެކަމަށް ރައްދުދީފިއެވެެ.
ސިވިލް ސާވިސް ކޮމިޝަނުން ނެރުނު ނޫސްބަޔާނަށް ރައްދުދީ މޯލްޑިވްސް ސިވިލް ސާވަންޓްސް އެސޯސިއޭޝަނުން ނެރުނު ބަޔާނެއްގައި ބުނެފައި ވަނީ ދިވެހި ސިވިލްސާވަންޓްސް އެސޯސިއޭޝަންގެ ނަމުގައި ހިންގާ ހަރަކާތްތެރިވަމުންދާ ފޭސްބުކް ޕޭޖަކީ ވެސް އެ ޖަމްޢިއްޔާއިން ހިންގާ ޕޭޖެއްކަމަށެވެ.
"މޯލްޑިވްސް ސިވިލްސާވަންޓްސް އެސޯސިއޭޝަންއަކީ 22 ފެބްރުއަރީ 2009ގައި ރަޖިސްޓަރީކޮށް ހިންގަމުންދާ ރަޖިސްޓްރީ ނަމްބަރ 2009/25/9/T ޖަމްޢިއްޔާއެކެވެ. ދިވެހި ސިވިލްސާވަންޓްސް އެސޯސިއޭޝަން ގެ ނަމުގައި ހިންގާ ހަރަކާތްތެރިވަމުންދާ ފޭސްބުކް ޕޭޖަކީ މިޖަމްޢިއްޔާއިން ހިންގާ ޕޭޖެއްކަމުގައި ދަންނަވަމެވެ." މިބަޔާނުގައި ބުނެފައިވެއެވެ.
މިބަޔާނާބެހޭ ގޮތުން "ދެން"އަށް މައުލޫމާތު ދެއްވަމުން މޯލްޑިވްސް ސިވިލް ސާވަންޓްސް އެސޯސިއޭޝަނުގެ އޮފިޝަލަކު ވިދާޅުވީ ސިވިލް ސާވިސް ކޮމިޝަން އޮތީ ފެއިލްވެފައި ކަމަށާއި މިއަދު ސިވިލް ސާވަންޓުން ކުރަމުން އެދަނީ ކޮމިޝަނުގެ ބޭފުޅުންގެ މަސައްކަތް ކަމަށެވެ.
"މިއަދު ހަގީގަތުގައި އަޅުގަނޑުމެން މިކުރަނީ އެބޭފުޅުންގެ މަސައްކަތް. ސިވިލް ސާވިސް މުއައްޒަފުންގެ ހައްގުތައް ހޯދައިދޭން ޖެހޭނީ އެބޭފުޅުން. މިސަބަބުތަކަށް ޓަކައި އަޅުގަނޑުމެން ހުރިހާ ސިވިލް ސާވަންޓުން ނިކުމެ މިތިބީ މިކަން ހައްލު ނުވަނީސް މަސައްކަތަށް ރުޖޫއަ ނުވާ ގޮތަށް" އޮފިޝަލު ވިދާޅުވިއެވެ.
މޯލްޑިވްސް ސިވިލް ސާވަންޓްސް އެސޯސިއޭޝަނުން އިސްވެ އޮވެ ސިވިލް ސާވަންޓުން މިހާރު ކުރިއަށްގެންދާ އިހްތިޖާޖްގައި މިއަދު ވަރަށް ގިނަ މުއައްޒަފުން ވަޒީފާއަށް ވެސް ނުނިކުމެއެވެ. އެކަމުގެ ސަބަބުން ބައެއް އޮފީސްތަކުގެ ހިދުމަތް މެދުކެނޑި ބައެއް ހިދުމަތްތަކަށް ވަނީ ބުރޫއަރައިފައެވެ.
މިއަދު ސީއެސްސީއިން އާއްމުކުރި ނޫސްބަޔާނެއްގައި ވިދާޅުވީ މިހާރަކަށް އައިސް، އެކި ނަންނަމުގައި ވަކި ބަޔަކު ނޭނގޭގޮތަށް، ކޮމިޝަނުގެ "ލޯގޯ" ބޭނުންކޮށްގެން، ސިވިލް ސަރވިސްގެ މުވައްޒަފުންގެ ހައްޤުތައް ދިފާޢުކުރުމަށް ޓަކައި ކަމުގައި ބުނެ، ބައެއް ފަރާތްތަކުން ސޯޝަލް މީޑިއާގެ އެކިއެކި އޮޅިތައް މެދުވެރިކޮށް ޙަރަކާތްތެރިވަމުންދާ ކަމަށާއި މި ގޮތުން "ދިވެހި ސިވިލް ސަރވަންޓްސް އެސޯސިއޭޝަން"ގެ ނަމުގައި މީސްމީޑިއާގައި މިހާރު ޙަރަކާތްތެރިވާ ފަރާތަކީ، ގަވާއިދުން ރަޖިސްޓްރީކޮށްފައިވާ ޖަމިއްޔާއެއް ނޫންކަމަށެވެ. އަދި މިފަދައިން ވަކި ބަޔަކު ނޭނގޭ ފަރާތްތަކުން ހިންގާ ޙަރަކާތްތަކާއި، ދެމުންދާ އިރުޝާދުތަކާ އެއްގޮތަށް ސިވިލް ސަރވިސް މުވައްޒަފުން އަމަލުނުކުރުމަށް ކޮމިޝަނުން އިލްތިމާސްކުރާ ކަމަށާއި ސިވިލް ސަރވިސް މުވައްޒަފުންގެ ކަންބޮޑުވުންތަކާއި ޝަކުވާތައް ހިއްސާކުރުމަށް ސިވިލް ސަރވިސް ކޮމިޝަނުގެ ދޮރު އަބަދުވެސް ހުޅުވިފައި ހުންނަ ހިނދު، ޤާނޫނުން ލިބިދޭ ހައްޤުތައް ބޭނުން ކުރުމުގައި ވެސް، ސަރުކާރުގެ އިދާރާތަކުން ދެމުންދާ ޚިދުމަތްތައް މެދުނުކެނޑޭނެގޮތަށް އަމަލުކުރުމަށް ސިވިލް ސަރވިސްގެ ހުރިހާ މުވައްޒަފުންނަށް ކޮމިޝަނުން ނަސޭޙަތްތެރިވާކަމަށެވެ.
ތިޔަ ސިވިލް ސާވިސް ކޮމިޝަނަކީ ހަމައެކަނި ފޯމު ފުރާ ބައެއް.
ތިތަނަށް ކިޔަން އެންމެ އެކަށީގެންވާ ނަމަކީ “ސިވިލް ސާވިސް ފޯމުފުރާ ކޮމިޝަން” (ސީ.އެފް.ސީ).
ސިވިލް ސާވިސް ކޮމިޝަން އިން ކޮށްދޭ ކަމެއް ނެތް…. ސިވިލް ސާވިސްއިން ދޭ ތަމްރީނެއް ވެސް ނެތް މިހާރު…40000 ނަގައިގެން ސަޅިދެއްކުން ކުރާ ކަމަކީ
މިނިވަން މުވައްސާސާތަކުގެ ނަމުގައި ސަރުކާރުން ބަހައްޓާފައި ހުންނަ ނަންބޯޑުތަކުގެ ނިވަލުގައި އުޅޭ ސިޔާސީ މީހުން ހީކުރާގޮތުގައި އެމީހުން މިނިވަން މުވައްސަސާގެ ނަންބޯޑުގެ ބޭނުންކޮށްގެން ހިންގާ ސިޔާސީ ކަންކަން ރައްޔިތުންނަށް އޮޅުވާލެވޭނެކަމަށް! މިރާއްޖޭގައި މަސްތުވާތަކެތި ބޭނުންކުރާމީހުން އެ އެއްޗެހި ބޭނުންކުރަމޭ ބުނަން ލަދެއް ބިރެއް ނެތް ފަދައިން، މިނިވަން މުވައްސަސާތަކުން ސިޔާސީ ޙަރަކާތް ހިންގާކަށްވެސް ލަދެއް، ޖެގިލުމެއް ނުވޭ، މިޙާލަތަށްގޮސްފަވާ ޤައުމެއްގައި ލިބޭނެ އިންސާފު ވިސްނާލި ކޮންމެ މީހަކަށް ތަޞައްވަރު ކުރެވޭނެ. ޤައުމު ބީވެދާކަށް ތަނެއްނެތް.