ފޮނަދޫން ދެ ދަރިވަރުން ކޮވިޑަށް ފައްސި ވެއްޖެ، އެކަށީގެންވާ ފިޔަވަޅު ނާޅާތީ ބެލެނިވެރިންގެ ކަންބޮޑުވުން

ލ.ފޮނަދޫގައި ހުންނަ ލ.އަތޮޅު ތައުލީމީ މަރުކަޒުގައި ކިޔަވަމުން އަންނަ ދެ ދަރިވަރަކު ކޮވިޑް-19އަށް ފައްސިވެއްޖެއެވެ.

Ads by MWSC

ފޮނަދޫން މިހާތަނަށް ޖުމްލަ 8 މީހަކު ބައްޔަށް ފައްސިވެފައިވެއެވެ. އޭގެ ތެރެއިން 3 މީހުންނަކީ އެރަށާ އިންވެގެން އޮންނަ ކައްދޫ އެއަރޕޯޓްގައި މަސައްކަތް ކުރަމުން އަންނަ މީހުންނެވެ.

ފޮނަދޫ ޓާސްކްފޯސްއިން "ދެން"އަށް މައުލޫމާތު ދިން ފަރާތަކުން ވިދާޅުވީ، ފައްސިވެފައިވާ ދަރިވަރުންނަކީ ކައްދޫ އެއަރޕޯޓުން ބަލި ޖެހުނު މީހުންނާ އެއްތާވި މީހުން ކަމަށެވެ.

މިކަމާ ގުޅިގެން މިހާތަނަށް އެ ރަށު ސްކޫލުގެ 2 ކްލާހެއްގެ ހުރިހާ ދަރިވަރުން ވަނީ ކަރަންޓީންކޮށްފައެވެ. އަދި އިތުރު ދަރިވަރުންނަށް ވެސް ކަރަންޓީންވުމަށް އަންގަމުން އެބަދެއެވެ. މީގެ އިތުރުން 5 ޓީޗަރަކު ވެސް ކަރަންޓީންވުމަށް އަންގަވައިފައިވާ ކަމަށް މައުލޫމާތު ދިން ފަރާތުން ހާމަކުރެއެވެ.

800 އެއްހާ ދަރިވަރުން ކިޔަވަމުން އަންނަ އަތޮޅު ތައުލީމީ މަރުކަޒުން ދަރިވަރުތަކެއް ކޮވިޑް-19އަށް ފައްސިވުމާ ގުޅިގެން ސްކޫލުން އެކަށީގެންވާ ފިޔަވަޅު އަޅާފައިނުވާތީ އެރަށު ބެލެނިވެރިންދަނީ ކަންބޮޑުވުން ފާޅު ކުރަމުންނެވެ.

"ޑައިރެކްޓް ކޮންޓެކްޓްވި ޓީޗަރުން މިއަދު ކްލާސްތަކަށް ކިޔަވައިދެން ދިޔަ. އިއްޔެ އެ ދަރިވަރުން ބައްޔަށް ފައްސިވިކަން އެނގުމުން ވެސް ޓީޗަރުން ކަރަންޓީނެއް ނުކުރޭ. މިއަދު ވެސް ކިޔަވައިދެން ދިޔަ. އެ ޓީޗަރުން ކިޔަވައިދިން އިތުރު ކްލާސްތަކަށް ވެސް" އެރަށުން ވާހަކަ ދެއްކި ބެލެނިވެރިޔަކު ބުންޏެވެ.

ފައްސިވި މީހުންނާ އެއްތާވުމުގެ ސަބަބުން ލ.އަތޮޅު ތައުލީމީ މަރުކަޒުގެ 40އަށް ވުރެ ގިނަ ދަރިވަރުން ވަނީ ކަަރަންޓީންކޮށްފައެވެ. ސްކޫލު ދަރިވަރަކު ބައްޔަށް ފައްސިވުމާ ގުޅިގެން ސްކޫލުގެ ކިޔެވުން ކުރިޔަށް ގެންދާތީ ބެލެނިވެރިންވަނީ ކަންބޮޑުވުން ފާޅު ކޮށްފައެވެ.

"އަސްލު ވަރަށް ދެރަ މި ގެންދާގޮތް. އެދަރިވަރުންނާ ކޮންޓެކްޓްވާނެދޯ ހަމަ ގިނަ ދަރިވަރުން. ސްކޫލުގައި ބޭނުން ކުރާނެ ފާޚާނާ، ފެންބޯ ތަން ފަދަ ތަންތަން، އެއީ ހުރިހާ ދަރިވަރުން އެއްކޮށް ބޭނުން ކުރާނެ ތަންތަން. އެންމެ ދުވަހަކަށް ބަންދުކޮށްލާފައި، ކޮންޓެކްޓް ޓްރޭސިންގް ހަދާލިނަމަ" ކަންބޮޑުވުން ހިއްސާ ކުރަމުން އެރަށުން ވާހަކަ ދެއްކި އިތުރު ބެލެނިވެރިޔަކު ބުންޏެވެ.

މިކަމާ ގުޅިގެން ސްކޫލްގެ ޕްރިންސިޕަލް އަބްދުالله ނަސީހަށް ގުޅައިލުމުން ވިދާޅުވީ، ސްކޫލުން އަމަލު ކުރަމުންދަނީ އެޗްޕީއޭގެ ގައިޑްލައިންތަކާއި އެޑިއުކޭޝަން މިނިސްޓްރީ އަދި ރަށުގެ ސިއްޙީ މަރުކަޒުގެ އިރުޝާތުގެ މަތިން ކަމަށެވެ. އެހެން ނަމަވެސް އިތުރު ތަފްސީލް ދެއްވުމަށް އުޒުރުވެރިވެވަޑައިގަތެވެ.

ފޮނަދޫން ގިނަ ބަޔަކު ކޮވިޑް-19 އަށް ފައްސިވެފައިވީ ނަމަވެސް އެރަށް މޮނިޓަރިންގެ ހާލަތަށް ގެނެސްފައެއް ނުވެއެވެ. އަދި ސްކޫލް ކިޔެވުން ވެސް އާއްމު ހާލަތުގައި ކުރިޔަށް ދިޔަ ގޮތަށް ކުރިޔަށް ގެންދިއުމަށް ވަނީ ނިންމައިފައެވެ. ކަރަންޓީންކޮށްފައިވާ ކްލާސްތައް ކުރިޔަށް ގެންދިއުމަށް ނިންމައިފައި ވަނީ އޮންލައިންކޮށެވެ.