ކޮވިޑް-19 ހާލަތު ގޯސްވެ،ހަތަރުވަނަ ފަހަރަށް ފޮނަދޫ މޮނިޓަރިންނަށްލައިފި
ލ.ފޮނަދޫން ކޮވިޑްގެ ފައްސި ވޭދަނަތަކެއް ފެނުމާ ގުޅިގެން އެ ރަށް މޮނިޓަރިންގެ ހާލަތަށް ގެނެސްފިއެވެ. މިއީ މިރަށް މޮނިޓަރިންނަށް ގެނެވުނު ހަތަރުވަނަ ފަހަރެވެ.
އެރަށު ސިއްޙީ މަރުކަޒުން އާއްމުކޮށްފައިވާ ތަފާސްހިސާބުތަކުން ދައްކާ ގޮތުގައި މިހާތަނަށް އެ ރަށުން 14 މީހަކު ވަނީ ބައްޔަށް ފައްސިވެފައެވެ. މީގެތެރޭގައި ސްކޫލުގެ ދެ ދަރިވަރުން ވެސް ހިމެނެއެވެ. ސްކޫލު ދަރިވަރަކު ބައްޔަށް ފައްސިވުމާ ގުޅިގެން ދަރިވަރުންނާއި ސްޓާފުން ހިމެނޭހެން މިހާތަނަށް 84 މީހަކު ވަނީ ކަރަންޓީންކޮށްފައެވެ.
ފޮނަދޫން މި ފަހަރު ކޮވިޑްގެ ފައްސި ވޭދަނަތަކެއް ފެނިފައި ވަނީ މިދިޔަ ހަފްތާ އާދިއްތަ ދުވަހުއެވެ. އެ ދުވަހު އެރަށު ފްލޫ ކްލިނިކަށް ދެއްކި މީހަކު ވަނީ ފައްސިވެފައެވެ. އޭގެ ފަހުން އެ ރަށާ އިންވެގެން އޮންނަ ކައްދޫގައި މަސައްކަތް ކުރާ ބަޔަކު ބައްޔަށް ފައްސިވެފައިވެއެވެ. ފަހުން ބަލި ޖެހިފައި ވަނީ އެމީހުންނާ އެއްތާވި ބަޔެކެވެ.
އެންމެ ފަހުގެ އަދާހަމައަށް ބަލާއިރު، މިހާރު ރާއްޖޭގެ 19 ރަށެއް މޮނިޓަރިންގައި އެބައޮތެވެ. މިއަދު ފޮނަދޫގެ އިތުރުން ދ.މާއެނބޫދޫއާއި މ.ވޭވަށް ވެސް ވަނީ މޮނިޓަރިންގެ ހާލަތަށް ގެނެސްފައެވެ.
