ޓީޗަރުންނަށް ދޭންވީ ހަދިޔާއަކީ ޙައްޤު ގަދަރާއި އިހްތިރާމް،އެކަށީގެންވާ މިންވަރެއްގެ އުޖޫރަ!
"ފަށާނީ ކޮން ވާހަކައަކުންކަމެއް ނޭނގޭ. އިހުތިރާމް ނުކުރާ ވާހަކަތޯ އެކަށީގެންވާ އުޖޫރައެއް ނުލިބޭ ވާހަކަތޯ؟ ގޮންޖެހުންތައް ބައިވަރު. އެކަމަކު އޮންނަ ލޯތްބެއްގެ ބޮޑުކަމުން ފަހަތަށް ފިޔަވަޅެއް އަޅާކަށް ބޭނުމެއް ނުވޭ" ޓީޗަރުންނަށް ދިމާވެފައިވާ ގޮންޖެހުންތަކުގެ ވާހަކަ އަހައިލުމުން ޓީޗަރަކު ބުންޏެވެ.
މުޖުތަމައުއެއް ބިނާކުރުމުގައި ޓީޗަރުންނަކީ އެންމެ އިސް ދައުރެއް އަދާކުރާ މީހުންނެވެ. ކޮންމެ ދާއިރާއެއްގެ ކޮންމެ ޝަހުސެއް ބިނާކުރުމުގައި ވެސް ޓީޗަރުންގެ ދައުރު ބޮޑެވެ. އެހެން ނަމަވެސް ޓީޗަރުންނަށް އެކަށީގެންވާ އިހުތިރާމާއި އެކަށީގެންވާ އުޖޫރައެއް ދިނުމުގައި އަދިވެސް މިވަނީ ނުކުޅެދިފައެވެ.
މިއީ އިހު ޒަމާނެއް ނޫނެވެ. ގްރޭޑު 10 ނިންމައިފައި ސްކޫލުތަކުގައި ކިޔަވައިދޭން ނިކުންނަ ޓީޗަރުންނެއް މިހާރު ނެތެވެ. އުނގަންނައިދިނުމުގެ މަތިވެރި ޒިންމާ އަދާކުރަން މިހާރު ނިކުންނަނީ އެންމެ ކުޑަމިނުން ޑިގްރީއެއް ހިފައިގެންނެވެ. ގިނަ ޓީޗަރުންނަކީ ފަސްޓް ޑިގްރީއަށްވުރެ މަތިން ތައުލީމު ހާސިލްކޮށްގެން މަސައްކަތަށް ނިކުންނަ މީހުންނެވެ.
ވޭތުވެދިޔަ އަހަރުތަކުގައި ޓީޗަރުންގެ އެންމެ ބޮޑު ކަންބޮޑުވުމަކީ އެކަށީގެންވާ އުޖޫރައެއް ނުލިބުމެވެ. މިވާހަކަ ދައްކަން ޖެހެނީ ސަބަބެއް ނެތިއެއް ނޫނެވެ. ޓީޗަރުންގެ ވަޒީފާއަކީ އެހެން ބައެއް ވަޒީފާތަކާއި ހިލާފަށް 8 ގަޑިއިރުން ނިންމައިލެވޭ މަސައްކަތެއް ނޫނެވެ. އެންމެ މަދުވެގެން 10 ގަޑިއިރު ސްކޫލުގައި ހޭދަކުރަން ޖެހެއެވެ. ގެއަށް އަޔަސް ގޭގައިވެސް މަސްއޫލިއްޔަތުތަކެއް މިވަނީ އަދާކުރަން ޖެހިފައެވެ. ހޯމްވޯކްތައް ތައްޔާރުކުރުމާއި ދަރިވަރުން ނިންމާ ހޯމްވޯކުތައް މާކު ކުރުމާއި މިހެން ގޮސް އެތައް ކަމެކެވެ. އިމްތިހާނަކާ ކައިރިވެއްޖެނަމަ 24 ގަޑިއިރު ވެސް އޮންނަނީ މަދުވެފައެވެ.
"ގިނަ ފަހަރު އިމްތިހާނެއް ކައިރިވެއްޖެނަމަ ނިދަން ލިބޭނީ ދެތިން ގަޑިއިރު. އެކްސްޓްރާ ކްލާސްތައް ނަގައިދޭން ބޭނުންވޭ. އެއްވެސް ކުއްޖަކަށް އެއްޗެއް ނޭނގި އޮވެދާނެތީ ކަންބޮޑުވޭ. ހާއްސަކޮށް އޯލެވެލް ނޫނީ އޯލެވެލް އިމްތިހާނެއްގައި މިކަންކަން ހިނގާނެ" ޓީޗަރަކު ކިޔައިދިނެވެ.
ޓީޗަރުންނަކީ އެމީހުންގެ ހިތްތަކުގައި ދަރިވަރުންނަށް ހާއްސަ ކުލުނަކާއި ގަދަރެއް ދެވިފައިވާ ބައެކެވެ. ދަރިވަރަކު މަތީ ވަނައެއް ހޯދުމުން ޓީޗަރުންނަށް ލިބޭ އުފާވެރިކަމަކީ މައިންބަފައިންނަށް ލިބޭ އުފާވެރިކަމާއި އެއްވަރުގެ އިހުސާސެކެވެ. މިހެންވުމުން ފަންނުވެރިންގެ ތެރެއިން ހިތުން މަސައްކަތް ކުރާ އެއްބަޔަކަށް ޓީޗަރުން ވެގެންދެއެވެ.
އެކި ފަހަރުމަތިން ޓީޗަރުންގެ މުސާރަ ބޮޑުކުރުމުގެ މަސައްކަތް ސަރުކާރުތަކުން ކުރިއެވެ. މިދިޔަ 10 ވަރަކަށް އަހަރުގެ ތެރޭގައި އެންމެ އެކަށީގެންވާ ބަދަލެއް ނައި ނަމަވެސް މުސާތަރައް ބޮޑު ކުރިއެވެ. އެކަށީގެންވާ މުސާރައިގެ އޮނިގަނޑެއް އެކުލަވައިލައި އެންމެ ފަހުން ނިންމީ މީގެ އަހަރެއްހާ ދުވަސް ކުރިންނެވެ. އެހެން ނަމަވެސް އަދިވެސް އެ އޮނިގަނޑަށް އަމަލުކުރާކަށް ނުފަށައެވެ. މިހާރު ސަރުކާރުން ބުނަނީ އޮނިގަނޑަށް އަމަލުކުރަން ނުފެށިގެން އުޅެނީ ކޮވިޑް-19ގެ ސަބަބުން ގައުމުގެ އިގްތިސޯދަށް ކޮށްފައިވާ ނޭދެވޭ އަސަރުތަކުގެ ސަބަބުންނެވެ.
ރާއްޖެއަކީ އަބަދުވެސް ކަން ކުރުމުގައި ތަރުތީބު އޮޅުވައިލާ ގައުމެކެވެ. މުސާރައިގެ އޮނިގަނޑުތައް އެކުލަވައިލުމުގައި ވެސް ކަން އޮތީ މިހެންނެވެ. ސިޔާސީ މަގާމަކަށް އައްޔަންކުރާ، ތައުލީމީ މާމޮޅު ސެޓްފިކެޓެއް ނެތް މީހާއަށް 25،000 ރުފިޔާއަށްވުރެ ބޮޑު މުސާރައެއް ކަނޑައެޅިފައި އެބަ އޮވެއެވެ. ގިނަ ފަހަރު އެމީހުން މަސައްކަތެއް ކުރަން ޖެހެނީ ކޮންމެވެސް މުނާސަބަތެއް އައުމުންނެވެ. ނޫނީ ކެމްޕެއިނެއް ފެށުމުންނެވެ. އަހަރުގެ އެހެން ދުވަސްތަކުގައި "ޗެކް އިން" ކޮށްފައި އިންނާނީ ކޮފީއެއްގައެވެ. ޓީޗަރުންނަށް މުނާސަބަތެއް ނޯވެއެވެ. އަބަދުވެސް އުޅެންޖެހެނީ މަސައްކަތުގައެވެ. އެކަމަކު ގެއަށް ގެންދަން މިލިބެނީ މަހަކު 12،000 އެއްހާ ރުފިޔާއެވެ. މިއީ ޑިގްރީ ފެންވަރުގެ ސެޓްފިކެޓެއް ހިފައިގެން މަސައްކަތަށް ނިކުންނަ ޓީޗަރުންނެވެ.
އިޖުތިމާއީ ހާލަތު އިންތިހާއަށް ގޯސް މާލެ ސިޓީގައި އުޅޭ ޓީޗަރުންގެ ވާހަކަވެސް ދައްކަން އެބަ ޖެހެއެވެ. ރާއްޖޭގެ ނިސްބަތުން އެންމެ ބޮޑެތި ސްކޫލުތައް މި ހުންނަނީ މާލޭގައެވެ. ނިސްބަތުން އެންމެ ގިނަ ދަރިވަރުން ވެސް ކިޔަވަނީ ރާއްޖޭގައެވެ. މާލޭ ސްކޫލުތަކަކީ އިންތިހާބަށް ބުރަ ބޮޑު ސްކޫލުތަކެކެވެ. މާލޭގައި މީހުން ދިރިއުޅެނީ ދަތި ހާލުގައިކަން އެންމެންނަށް ވެސް އެނގެއެވެ. ޓީޗަރުންގެ ހާލަތު ދެން ވަޒަން ކޮށްލާށެވެ. ދުވަހުގެ ބޮޑުބައި މަސައްކަތުގައި އުޅޭއިރު ވެސް ކުލި ދައްކައި ބިލުތައް ދައްކާފައި ރައްކާކުރާނެ ލާރިފޮއްޗެއް ނޯވެއެވެ. ގަދަރުވެރި ދިރިއުޅުމެއް އުޅެވޭނެ "ޗޮއިސްއެއް" ނޯވެއެވެ.
މިއަދު ފާހަގަކުރަމުން މިދާ ޓީޗަރުންގެ ދުވަހާ އެކު ޓީޗަރުންނަށް މާބޮނޑިއެއް ދިނުމަކުން ފުއްދައިލެވޭކަށް ނެތެވެ. ގައުމީ ފެންވަރުގައި ދޭންޖެހޭ އިހުތިރާމާއި ގަދަރު ވެސް ދޭން އެބަޖެހެއެވެ. މިވަގުތު އެންމެ އިސްކަމެއް ދީގެން ކުރަންޖެހިފައި އޮތް އެއްކަމަކީ ޓީޗަރުންގެ އުޖޫރަ އެކަށީގެންވާ މިންވަރަކަށް ގެނައުމެވެ. ޓީޗަރުންނަށް ދޭންޖެހޭ އަދި އެމީހުންނަށް ހައްގު ޝަރަފު ދިނުމަކީ މިއަދު އެންމެ މުހިންމު އެއްކަންތަކެވެ.
