އުއްތަމަ ފަނޑިޔާރުގެ ގެކޮޅުގެ ސެކިއުރިޓީ ބްރީޗްވި ގޮތް ބެލުމަށް މައްސަލައެއް
ދިވެހި ރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާންގެ ގެކޮޅުގެ ސެކިއުރިޓީ ބްރީޗްވި ގޮތް ދެނެގަތުމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު މަޖިލީހަށް މައްސަލައެއް ހުށަހަޅައިފިއެވެ.
އެ މައްސަލައިގައި ބުނެފައި ވަނީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މިހާރު ވެސް ގެންދަވަނީ އެމަނިކުފާނުގެ ފުރާނަފުޅަށް އަމާޒުކޮށް 6 މެއި 2021 ވަނަ ދުވަހު ދީފައިވާ ނުރައްކާތެރި ޓެރަރިސްޓް ހަމަލާގެ ޒަހަމްތަކަށް ފަރުވާ ހޯއްދަވަމުން ކަމަށެވެ. އަދި ރައީސް ނަޝީދުގެ ފުރާނަފުޅަށް އަމާޒުކޮށް ހަމަލާ ދެވިފައި ވަނީ ސެކިއުރިޓީ ބްރީޗްވުމުން ކަމަށާއި މިހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމެޓީން ހިންގުނު ޕާލިމަންޓަރީ އިންކުއަރީން އެންމެ ބޮޑަށް ފާހަގަ ކުރެވުނު އެއް ކަމަކީ 6 މެއި ގައި ހަމަލާ ދެވިފައި ވަނީ ސަލާމަތީ ޚިދުމަތް ފޯރުކޮށްދިނުމުގައި ބަލަންޖެހޭ ކަންކަން ބަލަންޖެހޭ މިންވަރަށް ބެލިފައިނުވާތީ ކަމަށެވެ.
މީގެ އިތުރުން ދައުލަތުގެ ތިން ބާރުގެ ތެރެއިން ދެ ބާރުގެ ވެރިންގެ ސެކިއުރިޓީ ބްރީޗްވުމަކީ މުޅި ރައްޔިތުންގެ ސެކިއުރިޓީއާ މެދު ސުވާލު އުފެދޭކަމެއް ކަމަށާއި އުއްތަމަ ފަނޑިޔާރުގެ ގެކޮޅަށް ވަންނަން މަސައްކަތްކުރީ މަސްތުވާތަކެތީގެ ސިކާރައަކަށް ވެފައިވާ ފަރާތެއްކަމުގައި ބުނެ ކަންކަން ނިންމައިލެވޭ ވަރަށްވުރެ މިފަދަ ކަންކަން ސީރިއަސްކޮށް ނަގަންޖެހޭ ހިސާބަށް މިހާރު ޤައުމުގެ ހާލަތު ގޮސްފައި ވާ ކަމަށް ވެސް މަޖިލީހަށް ސިރާޖު ހުށަހެޅި މައްސަލައިގައިވެއެވެ.
ސިރާޖު ހުށަހެޅުއްވި މި މައްސަލަ ބަލައިގަނެ މަޖިލީހުގައި ވަނީ ބަހުސްކޮށްފައެވެ. އިއްޔެ ބޭއްވި ރައްޔިތުންގެ މަޖިލީހުގެ ޖަލްސާގައި ހޯމް މިނިސްޓަރ އިމްރާން ވަނީ އުއްތަމަ ފަނޑިޔާރުގެ ގެކޮޅަށް ވަތް މީހަކީ ވެސް މަސްތުގެ ހާލަތުގައި ހުރެ އެގެއަށް ވަނުމަށް މަސައްކަތް ކުރި މީހެއްކަމަށް ވިދާޅުވެފައެވެ. މިކަމާ ގުޅިގެން ސިރާޖު ވިދާޅުވީ “ހޯމް މިނިސްޓަރު ވަރަށް ފަސޭހައިން ދަންނަވާލީ އެއީ ދެން ބޮއެގެން މިއުޅޭ ކުއްޖަކު ކޮށްލި ކަމެކޭ” އަދި އެ ހިސާބަށް ކަންކަން ގެންދިއުމަކީ ބަލައިގަނެވޭނެ ކަމެއް ނޫން ކަމަށް ސިރާޖު ވިދާޅުވިއެވެ.
Ads by STO
