އަރިދަފުސް ރޯގާ ޖެހިގެން މި މަހު 11008 ވޭދަނަ ރިޕޯޓު ކޮށްފައިވޭ
އަރިދަފުސް ރޯގާ ޖެހިގެން މި މަހު 11008 ވޭދަނަ ރިޕޯޓު ކޮށްފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން މިރޭ ނެރުނު ބަޔާނެއްގައި ބުނެފައި ވަނީ މިދުވަސްވަރު އަރިދަފުސް ރޯގާ ޖެހިގެން ރިޕޯޓު ކުރާ އަދަދު އިތުރުވަމުން އަންނަ ކަމަށް އެ އެޖެންސީގެ ތަފާސް ހިސާބުތަކުން ދައްކާ ކަމަށެވެ. އެގޮތުން މި އޮކްޓޯބަރު މަހުގެ ތެރޭގައި އަރިދަފުސް ރޯގާ ޖެހިގެން 11008 ވޭދަނަ ރިޕޯޓު ކޮށްފައިވާ ކަމަށާއި އަރިދަފުސް ރޯގާގެ އިތުރުން، ފާއިތުވެ ދިޔަ މަސްތަކުގައި ރިޕޯޓުކޮށްފައިވާ އަދަދުތަކާ އަޅާބަލާއިރު އިންފްލުއެންޒާއަށް ފައްސި ވާ އަދަދު ވެސް ގިނަވެފައިވާ ކަމަށް ބުނެފައި ވެއެވެ.
މިގޮތުން މި މަސް ތެރޭގައި އިންފްލުއެންޒާއަށް ޓެސްޓު ކުރެވުނު 432 ސުންކުގެ ތެރެއިން 192 ސުންކު އެ ބައްޔަށް ފައްސި ވެފައިވާކަމަަށް އެޗްޕީއޭއިން ބުނެފައިވެއެވެ. އަދި މި އަހަރުގެ މިހާ ތަނަށް އިންފްލުއެންޒާއަށް ޓެސްޓު ކުރެވުނު 1198 ސުންކުގެ ތެރެއިން 365 ސުންކު އެ ބައްޔަށް ފައްސި ވެފައިވެއެވެ.
ވީމާ އިންފްލުއެންޒާއާއި އަރިދަފުސް ރޯގާ އިތުރުވަމުން އަންނާތީ މިފަދަ ބަލިތަކުން ރައްކާތެރިވުމަށް ޓަކައި މިދުވަސްވަރު ޚާއްސަ ސަމާލުކަމެއް ދިނުމަށް އެޗްޕީއޭއިން އެދިފައިވެއެވެ.
އަރިދަފުސް ރޯގާއިން ރައްކާތެރިވުމަށް އެޅުން މުހިންމު ފިޔަވަޅުތައް:
▪︎ ފަސް އަހަރުން ދަށުގެ ކުޑަކުދިންނާއި 65 އަހަރުން މަތީގެ މީހުންނާއި ދިގުމުއްތަކަށް ފަރުވާކުރަން ޖެހޭ ބަލިތަކުގެ މީހުންނާއި މާބަނޑުމީހުން އަދި ދިފާއީ ނިޒާމު ބަލިކަށި މީހުން، ރޯގާގެ އަލާމާތެއް ފެނިއްޖެ ނަމަ ލަސްނުކޮށް ފަރުވާ ހޯދުން.
▪︎ ހުންއައުމާއި ކެއްސުން ފަދަ އަލާމާތެއް ފެނިއްޖެ ނަަމަ އޯޕީޑީއަށް ނުގޮސް ފްލޫ ކްލިނިކަށް ދިއުން.
▪︎ ރޯގާގެ އެއްވެސް އަލާމާތެއް ހުރި ނަމަ މީހުންގެ ތެެރެއަށް ނުނިކުތުން.
▪︎ ކޮވިޑް-19އިން ރައްކާތެރިވުުމުގެ ގައިޑްލައިންތަކަށް ތަބާވުން.
▪︎ ކޮވިޑަށް ޓެސްޓްކުރާ އިރު ނައްސި ވިޔަސް، ރޯގާގެ އަލާމާތެއް ހުރި ނަމަ ގޭގައި މަޑުކުރުން.
▪︎ ބަލިމީހުންނަށް ޒިޔާރަތްކުރަން ކުޑަކުދިންނާއި އުމުރުން ދުވަސްވީ މީހުން ނުގެންދިއުން.
- ކޮވިޑްގެ ވެކްސިން ނުޖަހާ ތިބި ފަރާތްތަކުން ވެކްސިން ޖެހުން.
▪︎ ކޮންމެހެން ދާން ޖެހޭ ހާލަތެއްގައި ނޫނީ ހޮސްޕިޓަލަށް ނުދިއުން.
