ކޮއްކޯއިން ޖާމިނުވާ ގޮތަށް، ކަފާލާތުގެ ދަށުން އައްމަޓީ ދޫކޮށްލައިފި
ކޮއްކޯއިން ޖާމިނުވާ ގޮތަށް، ކަފާލާތުގެ ދަށުން ސީލައިފް ގްލޯބަލް ކުންފުނީގެ މެނޭޖިންގ ޑިރެކްޓަރ އަހުމަދު މޫސާ (އައްމަޓީ) ދޫކޮށްލަން ކްރިމިނަލް ކޯޓުން އަމުރުކޮށްފިއެވެ.
ކްރިމިނަލް ކޯޓުގައި މިއަދު ކުރިއަށް ދިޔަ އަޑުއެހުމުގައި، އައްމަޓީގެ ފަރާތުން ޖާމިނުވީ އޭނާގެ ދެ ކޮއްކޯއިން ކަމަށްވާ އަތީފާ މޫސާއާއި މަރިޔަމް ނައީމާއެވެ. އެ ދެ މީހުން ވެސް މިއަދުގެ އަޑުއެހުމަށް ހާޒިރު ކޮށްފައިވާއިރު، ދެ މީހުން ވެސް ވަނީ އައްމަޓީ ފިލައިގެން ނުދާނެ ކަމުގެ ޔަގީންކަން ދީފައެވެ.
ދައުވާ އުފުލައިފައިވާ ފަރާތުން ފިލައިފި ނަމަ، ޖާމިނުވާ ފަރާތްތަކަށް ހުންނާނެ އަދަބު މިއަދުގެ އަޑުއެހުމުގައި މި މައްސަލަ ބައްލަވާ ގާޒީ ހަސަން ސައީދު ވަނީ ވިދާޅުވެދެއްވައިފައެވެ. އެގޮތުން މައްސަލައިގައި ދައުވާ އުފުލައިފައިވާ ފަރާތް ފިލައިފި ނަމަ، ޖާމިނުވީ ފަރާތްތަކަށް އެއް އަހަރު ދުވަހުގެ ޖަލު ހުކުމެއް ނުވަތަ ދެ އަހަރުގެ ގޭބަންދު ހުކުމެއް ނުވަތަ 15،000 ރުފިޔާ ޖޫރިމަނާގެ ހުކުމެއް އިއްވިދާނެކަން ގާޒީ ފާހަގަ ކުރެއްވިއެވެ.
ކޮއްކޯއިން ޖާމިނުވެ އައްމަޓީ ބަންދުން ދޫކޮށްލި ނަމަވެސް، އޭނާގެ ޕާސްޕޯޓު އަދި އޮތީ ހިފަހައްޓައިފައި ކަމަށް މައުލޫމާތު ލިބެއެވެ.
ހުޅުމާލޭގައި 3،000 ފްލެޓް އަޅައިދޭނެ ކަމަށް ބުނެ އެތައް ބައެއްގެ އަތުން ބުކިން ފީގެ ގޮތުގައި ފައިސާ ނެގުމަށް ފަހު، ފައިސާ އަނބުރާ ނުދީ އައްމަޓީ ފިލައިގެން އުޅެނިކޮށް އޭނާ ރާއްޖެ ގެނެސް 42 ދައުވާއެއް އުފުލައި ބަންދުކުރީ އެ މައްސަލަތަކުގެ ޝަރީއަތް ނިމެންދެންނެވެ.
ޔާމީނު ނޫނީއެތްމެއް ދޫކޮންލާނެކޮއްމެވެސް އެއްޗެކޭކިޔާފަ
ކޮއްކޮ އާފިޔާ މޫސާ