އައިޖީއެމްއެޗުގައި މަސައްކަތް ކުރި ބިދޭސީ ނަރުހެއްގެ މަރާ ގުޅިގެން ތަހުގީގެއް ކުރަނީ
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި މަސައްކަތް ކުރި ބިދޭސީ ނަރުހެއްގެ މަރާ ގުޅިގެން ތަހުގީގެއް ކުރަން ފަށައިފިއެވެ.
"ދެން"އަށް މައުލޫމާތު ލިބިފައިވާ ގޮތުގައި މަރުވެފައި ވަނީ ފިލިޕީންސަށް ނިސްބަތްވާ، އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރާ ބިދޭސީ އަންހެން ނަރުހެކެވެ. އޭނާ މަރުވީ އަމިއްލައަށް ދަންޖެހިގެން ކަމަށް އެއިރު ވާހަކަ ދެކެވެމުން ދިޔައެވެ.
ނަމަވެސް އެ ނަރުސް މީހާ މަރައިލައިފައިވާ ކަމަށް ތުހުމަތުކޮށް، ފުލުހުން އެ މައްސަލަ ތަހުގީގު ކުރަމުން އަންނަކަމަށް މައުލޫމާތު ލިބެއެވެ. އަދި މި މައްސަލައިގައި ތުހުމަތު ކޮށްފައި ވަނީ އެ ބިދޭސީ ނަރުހުގެ ފިރިމީހާއަށްކަން ވެސް އެނގިފައިވެއެވެ.
މިކަމާ ގުޅިގެން ފުލުހުންގެ ފަރާތުން ރަސްމީކޮށް ބަހެއް އަދި ލިބިފައެއް ނުވެއެވެ.
ނަމަވެސް އައިޖީއެމްއެޗްގެ މީޑިއާ އޮފިޝަލު "ދެން"އަށް ވިދާޅުވީ މިއީ ތަހުގީގު ކުރަމުން އަންނަ މައްސަލައަކަށް ވާތީ މިކަމާ ގުޅޭގޮތުން އަދި ވަކި އެއްޗެއް ވިދާޅުވެވެން ނެތް ކަމަށެވެ.
ބިދޭސީ އެ ނަރުސް މީހާ މަރުވެފައި ވަނީ މި މަހުގެ 19ވަނަ ދުވަހުގައެވެ.
