ވެންޓިލޭޓަރުތަކުގެ މައްސަލައިގައި ދައުވާ ކުރަން ޕީޖީއަށް ފޮނުވައިފި
ކޮވިޑް-19އާ ގުޅިގެން ވެންޓިލޭޓަރުތައް ހޯދުމުގައި ކޮރަޕްޝަނުގެ ޢަމަލުތައް ހިންގި ކަމުގެ މައްސަލައިގައި ދައުވާ ކުރަން ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށް އެންޓިކޮރަޕްޝަން ކޮމިޝަން، އޭސީސީން ހާމަކޮށްފިއެވެ.
މިމައްސަލައިގައި މީގެ ކުރިން އޭސީސީން ދައުވާ ކުރަން ފޮނުވުމުން، ތަޙުޤީޤު އިތުރަށް ފުރިހަމަކުރުމަށް ޕީޖީ އޮފީހުން ވަނީ އަންގައިފައެވެ. އޭސީސީން ވިދާޅުވީ، ޕީޖީއިން އެދުނު ގޮތަށް އިތުރަށް ތަޙްޤީޤް ކުރުމަށް ފަހު އިތުރު ދައުވާތަކާ އެކު މައްސަލަ ފޮނުވައިފައިވާ ކަމަށެވެ.
މިމައްސަލަ އަލުން ޕީޖީ އޮފީހަށް ފޮނުވިއިރު، މިމައްސަލައިގައި ދަޢުވާކޮށްދިނުމަށް އެދި ހުށަހަޅައިފައިވާ 11 ފަރާތަށް އިތުރު ދަޢުވާތަކެއް ކޮށްދިނުމަށް ވަނީ އެދިފައެވެ. މިގޮތުން ،ރައްޔިތުންނަށް ނުވަތަ ދައުލަތަށް ފައިދާއެއް ލިބެންއޮތް ކަމެއްގައި އެ ނޫން ގޮތަކަށް ޢަމަލުކުރުމުގެ ކުށުގެ ދަޢުވާކުރުމަށް އޭސީސީން ވަނީ އެދިފައެވެ. މިމައްސަލައިގައި އަލުން ދައުވާއަށް ފޮނުވި ނަމަވެސް، އިތުރު ފަރާތަކަށް ދައުވާކޮށްދިނުމަށް އެދިފައެއް ނުވެއެވެ.
ވެންޓިލޭޓަރުގެ މައްސަލައި އެންމެ ފުރަތަމަ ޕީޖީއަށް ފޮނުވައިފައި ވަނީ 14 އޮކްޓޫބަރު 2020ގައެވެ.
އޭސީސީން ވިދާޅުވީ، މި މައްސަލައިގައި ހިމެނޭ ފައިސާ ދައުރުވެފައިވާ ގޮތާއި އެ ފައިސާއިން އެއްވެސް މިންވަރެއް މި މައްސަލައިގައި ތުހުމަތުކުރެވޭ ފަރާތަކަށް ނުވަތަ އެއިން ފަރާތަކާ ގުޅުން އޮތް ފަރާތަކަށް ލިބިފައިވޭތޯ ބެލުމަށް ކޮށްފައިވާ މަސައްކަތުން މިހައިތަނަށް އޭގެތެރެއިން ފަރާތަކަށް އެފަދަ ފައިސާއެއް ލިބިފައިވާކަމަށް ފާހަގަ ކުރެވިފައި ނުވާ ކަމަށެވެ. އަދި އެފަދަ ކަމެއް ފާހަގަ ވެއްޖެނަމަ އެ މައްސަލައެއްގެ ތަޙުޤީޤު ވަކިން ކުރިއަށް ގެންދަން ނިންމައިފައިވާ ކަމަށް ވެސް ވިދާޅުވިއެވެ.
