ކޮޕީ މުޙައްމަދު ރަޝީދު: ޤައުމީ ހިދުމަތްތެރިއެއް، ދިވެހި އަދަބިއްޔާތުގެ މާހިރެއް އަދި ފަންނުވެރިއެއް!
މިއަދަކީ ދިވެހި އަދަބިއްޔާތަށާއި މުނިފޫހިފިލުވުމުގެ ދާއިރާއަށް ވެސް ނުހަނު ހިތާމަވެރި، ބަނަ ދުވަހެކެވެ.
އައު ދުވަހަކަށް ފެށެން ކުޑަ ހިނދުކޮޅަކަށް ވެފައި ވަނިކޮށް، މުޅި ރާއްޖެއަށް ފަޅުކަން ގެނުވީ ދިވެހި އަދަބިއްޔާތަށާއި މުނިފޫހިފިލުވުމުގެ ދާއިރާއަށް ވެސް ގިނަ ގުނަ ހިދުމަތްތަކެއް ކޮށްދެއްވި ޤައުމީ ހިދުމަތްތެރިޔާ މުޙައްމަދު ރަޝީދު (ކޮޕީ މުޙައްމަދު ރަޝީދު) އަވަހާރަވީ ޚަބަރުންނެވެ.
މުޙައްމަދު ރަޝީދަކީ ދިވެހިބަހާއި އަދަބިއްޔާތުގެ ދާއިރާއިން، މިދިޔަ އަހަރު ޝަރަފުވެރިކަމުގެ ޤައުމީ އިނާމު ލިބިވަޑައިގަންނަވާފައިވާ ބޭފުޅެކެވެ. އަދި އެމަނިކުފާނަކީ ދިވެހިބަހާއި އަދަބިއްޔާތަށް، ޚާއްޞަކޮށް ޅެންވެރިކަމުގެ ރޮނގުން ވަރަށްގިނަ ޚިދުމަތްތަކެއް ކޮށްދެއްވައިފައިވާ ބޭފުޅެކެވެ. އެގޮތުން ދިވެހި ޅެން ހެދުމުގެ ރޮނގުން މުޙައްމަދު ރަޝީދަށް ވަނީ 2005ވަނަ އަހަރު އާންމު ހިދުމަތުގެ ހިތްވަރު ދިނުމުގެ އިނާމު ވެސް ލިބިވަޑައިގެންފައެވެ.
މުޙައްމަދު ރަޝީދުގެ ޙަޔާތަށް ކުޑަ ނަޒަރެއް ހިންގައިލާއިރު، ދިވެހި ބަހާއި އަދަބިއްޔާތުގެ ދާއިރާ އެމަނިކުފާނު ފެއްޓެވީ އުމުރުފުޅުން އެންމެ 18 އަހަރުގައެވެ. އެއިރުއްސުރެ އެމަނިކުފާނު ގެންދެވީ އަދަބީ އެކި ރޮނގުރޮނގުން ޤައުމަށް ހިދުމަތް ކުރައްވަމުންނެވެ. އެގޮތުން ރާއްޖޭގައި ކުރިން ނެރުނު ބައެއް ނޫސް މަޖައްލާތަކުން ވެސް ކޮޕީ މުޙައްމަދު ރަޝީދުގެ ޅެންތައް ޝާއިއުކޮށްފައިވެއެވެ. އޭގެ ތެރޭގައި "ފަތްތޫރަ"، "މޫންލައިޓް" އަދި "އެކުވެރިންގެ ރޫހު" ގައި އެމަނިކުފާނުގެ ޅެންތައް ޝާއިއުކޮށްފައިވެއެވެ.
ޅެން ހެދުމުގެ އިތުރުން މުޙައްމަދު ރަޝީދު ވަނީ ޤައުމީ، ޢިލްމީ، އިޖުތިމާޢީ، ތިމާވެށި ފަދަ ރޮނގުތަކުން ލަވަ ވެސް ހައްދަވައިފައެވެ. އަދި ބޮޑުބެރު ގްރޫޕުތަކަށާއި ބަނޑިޔާ ގްރޫޕުތަކަށް ވެސް ލަވަ ހައްދަވައި ދެއްވާފައިވާކަން ފާހަގަ ކުރެވެއެވެ. އެ މަނިކުފާނު ވަނީ ޤައުމީ އެކިއެކި މުނާސަބަތުތަކަށާއި، ސްކޫލު ކުދިންގެ ލަވަ މުބާރާތްތަަކަށާއި އެކިއެކި އަލްބަމްތަކަށް ވެސް ލަވަ ހައްދަވައިދެއްވައިފައެވެ.
ލަވަ ހެއްދެވުމުގެ އިތުރުން، މުޙައްމަދު ރަޝީދު ވަނީ ދީނީ ޅެން ހެދުމުގެ މުބާރާތްތަކުން ވެސް މަތީ ވަނަތައް ހޯދައިފައެވެ. އެމަނިކުފާނު ވަނީ "އަބާރަނަ" ނަމުގައި މަދަޙަ އަލްބަމެއް ވެސް ނެރުއްވައިފައެވެ.
ޅެންބަހުން ބައެއް ތަމްސީލުތަކާއި ޑްރާމާތައް ވެސް މުޙައްމަދު ރަޝީދު ވަނީ ލިޔުއްވާފައި ވެއެވެ. އެގޮތުން އެމަނިކުފާނު ލިޔުއްވި ޑްރާމާތަކުގެ ތެރޭގައި، "ކޯޅުން"، "އަސްލު ނަމުގެ ވަބާ"، "ހަނދާނުގެ ފަތްފުށުން"، "މިހާރު މަރުދީދާށޭ ޤައުމާއިގެން ދީނާ"، "ރ ނުކިޔޭ މައްސަލަ" ހިމެނެއެވެ.
މީގެ އިތުރުން ތަމްސީލު ކުޅުމަކީ ވެސް މުޙައްމަދު ރަޝީދު ފާހަގަ ކޮށްލެވިގެންދިޔަ ދާއިރާއެކެވެ. ސްޓޭޖްމަތިން ކޮޕީ މުޙައްމަދު ރަޝީދު ފުރަތަމަ ފެނިގެންދިޔަ ތަމްސީލަކީ "ތިން އުނދަގޫ" މި ތަމްސީލެވެ.
ކޮޕީ މުޙައްމަދު ރަޝީދު އަވަހާރަވީ، އޭޑީކޭ ހޮސްޕިޓަލުގެ އައިސީޔޫގައި ފަރުވާ ހޯއްދަވަމުން ދަނިކޮށެވެ. އެ މަނިކުފާނު އަވަހާރަވުމުން، އެތައް ބަޔަކު ވަނީ އާއިލާއަށް ތައުޒިޔާ ދަންނަވައި ހިތާމައިގައި ބައިވެރިވެފައެވެ.
