ކޮވިޑްގެ ވޭދަނަތައް ގިނަ ނަމަވެސް ބަލި ފެތުރުން ވަނީ ކޮންޓްރޯލް ކުރެވިފައި: ގޮއިދޫ ކައުންސިލް
ކޮވިޑް-19ގެ ވޭދަނަތަކެއް ފެނި މިމަހުގެ 4 ވަނަ ދުވަހު މޮނިޓަރިންއަށް ލައިފައިވާ ށ.ގޮއިދޫގައި މިވަގުތު ބަލި ޖެހިފައިވާ ގިނަ މީހުން ތިބި ނަމަވެސް ބަލި ފެތުރުން ކޮންޓްރޯލް ކުރެވިފައިވާކަމަށް އެ ރަށު ކައުންސިލުން ވިދާޅުވެއްޖެއެވެ.
"ދެން"އަށް މައުލޫމާތު ދެއްވަމުން ގޮއިދޫ ކައުންސިލްގެ ރައީސް އިބްރާހިމް ޝާހިދު ވިދާޅުވީ އެރަށުގައި މިވަގުތު ބަލިޖެހިފައިވާ 34 މީހުން ތިިބި ނަމަވެސް އިއްޔެ ނަތީޖާ ލިބުނު 34 ސުންކުން ވެސް ބައްޔަށް ފައްސިވެފައި ވަނީ އެންމެ މީހެއް ކަމަށެވެ.
"އިއްޔެ ނަތީޖާ ލިބުނު ސާމްޕަލްތަކުން ވެސް ބައްޔަށް ފައްސިވެފައި ވަނީ އެންމެ މީހެއް. އެއީ ވެސް ބަލި ޖެހިގެން ކަރަންޓީނު ކޮށްފައިވާ މީހެއްގެ ޑައިރެކްޓް ކޮންޓެކްޓެއް. އެހެންވީމަ ދެން އަޅުގަނޑުމެން މި ގަބޫލުކުރަނީ ބަލި ފެތުރުން ކޮންޓްރޯލް ކުރެވިފައިވާކަމަށް" ޝާހިދު ވިދާޅުވިއެވެ.
އޭނާ އިތުރަށް ވިދާޅުވީ ކޮވިޑާ އެކު އެރަށުގައި ރައްކާތެރިކަމުގެ ފިޔަވަޅެއްގެ ގޮތުން ގެއިން ބޭރަށް ދިޔުން މަނާ ކޮށްފައިވާ ކަމަށާއި ބޭރަށް ނުކުމެވޭނީ ކައުންސިލުން ދޫކޮށްފައިވާ ކާޑާ އެކުގައި ކަމަށެވެ. އަދި އެކާޑުތައް ކަރަންޓީނުކޮށްފައިވާ ގެތަކަށާއި ބަލިޖެހިފައިވާ މީހުންނާ ގާތުން އެއްތާވި މީހުންނަށް ދޫކޮށްފައި ނުވާ ކަމަށެވެ.
ޝާހިދު ވިދާޅުވީ ރަށުގައި އަޅައިފައިވާ ފިޔަވަޅުތަކަށް ހުރިހާ ރައްޔިތުން ވެސް ކިޔަމަންތެރިކަމާ އެކު ބޯލަނބަމުން އަންނަކަމަށާއި އެހެންކަމުން މާގިނަ ދުވަސްތަކެއް ނުވެ އެރަށުން ކޮވިޑްގެ ނުރައްކާ ފޮހެވިގެން ހިނގައިދާނެކަމަށް އުއްމީދު ކުރައްވާ ކަމަށެވެ.
