ސަލްމާން މިސްކިތަށް ހަރަދުކުރި ފައިސާ ސައުދީ ސަރުކާރަކުން ނުލިބޭ: ސަރުކާރު

ސައުދީ އަރަބިއްޔާގެ ހިލޭ އެހީގެ ދަށުން މާލޭގެ އާޓިފިޝަލް ބީޗު ސަރަހައްދުގައި ހަދައި ނިންމައިފައިވާ ރާއްޖޭގެ އެންމެ ބޮޑު މިސްކިތް "ކިންގ ސަލްމާން މިސްކިތް" އިމާރާތް ކުރުމަށް ދިވެހި ދައުލަތުގެ ބަޖެޓުން ބޮޑު ހަރަދެއް ކޮށްފައިވާ ކަމަށާއި އެފައިސާ ސައުދީ ސަރުކާރުން އަދި ނުދޭކަމަށް ސަރުކާރުން ބުނެފިއެވެ.

Ads by Hajj Corporation

އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ހައުސިންގ އެންޑް ޕްލޭނިންގް މިނިސްޓަރު މުހައްމަދު އަސްލަމް ވިދާޅުވީ ސަލްމާން މިސްކިތުގެ މަޝްރޫއު ފެށީ ސައުދީން ފައިސާ ދީގެން ކަމަށެވެ. އެހެން ނަމަވެސް އެ މިސްކިތް ނިންމަން ދިވެހި ދައުލަތުން ބޮޑު ހަރަދެއް ކޮށްފައިވާކަމަށް ވިދާޅުވިއެވެ. ދައުލަތުން ކުރި ހަރަދުގެ ތަފްސީލު އަސްލަމް ވިދާޅެއް ނުވެއެވެ. އެހެން ނަމަވެސް ސަލްމާން މިސްކިތް އެޅުމަށް ހަރަދުކުރި ފައިސާގެ 80 އިންސައްތަ ހަރަދުކުރީ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ދައުލަތުގެ ބަޖެޓުންކަމަށް ދާންދޫ ދާއިރާގެ މެމްބަރު ޔައުގޫބު އަބްދުﷲ ވިދާޅުވިއެވެ. މި އަދަދު ހައުސިންގ މިނިސްޓްރީން ވެސް ކަށަވަރުކޮށްދެއްވައިފައެއް ނުވެއެވެ.

ސަލްމާން މިސްކިތާ ގުޅޭގޮތުން މިނިސްޓަރު އަސްލަމް ވިދާޅުވީ ސަލްމާން މިސްކިތަށް ހަރަދުކުރި ފައިސާ ސައުދީ ސަރުކާރުން ދެއްވުމުގެ ނިޔަތް އެބަ އޮތްކަން ޔަގީންވެވަޑައިގަންނަވާ ކަމަށެވެ. އަދި އާޚިރުގައި އެކަން ނިމޭނީ ވެސް އެ ގޮތަށްކަމަށް އުއްމީދުކުރައްވާކަމަށް އަސްލަމް ވިދާޅުވިއެވެ.

"އެ ވާހަކަތައް ސަރުކާރުގެ ކަމާ ބެހޭ މުއައްސަސާތަކުން ސައުދީ ސަރުކާރާއެކީގައި އެބަ ވާހަކަ ދައްކަމުންދޭ. އަދި ސައުދީ ސަރުކާރުން އެ ހަރަދު ކުރައްވާނެކަން އަޅުގަނޑަށް ހަމަ ޔަގީން" އަސްލަމް ވިދާޅުވިއެވެ.

ކުރީގެ ރައީސް ، ރައީސް އަބްދުﷲ ޔާމީންގެ ސަރުކާރުގައި އަޅަން ފެށި ސަލްމާން މިސްކިތުގެ މަސައްކަތް ނިމިފައިވީ ނަމަވެސް އެމިސްކިތް ނުހުޅުވި ލަސްވަނީ ސައުދީ ސަރުކާރުގެ އިސް ވަފުދެއް ރާއްޖެ އައިސް އެތަން ހުޅުވަންދެންކަމަށް މީގެ ކުރިން ސަރުކާރުން ވަނީ ބުނެފައެވެ. ވަފުދަށް ނާދެވި ލަސްވީ ކޮވިޑް-19 \ގެ ހާލަތާ ގުޅިގެންކަމަށް ވެސް ސަރުކާރުން ބުނެއެވެ.

ސަލްމާން މިސްކިތަކީ ރާއްޖޭގައި މިހާރު ހުރި އެންމެ ބޮޑު މިސްކިތެވެ. ޖާގައިގެ ގޮތުން ތަނަވަސް މި މިސްކިތަކީ އެތެރެ ވެސް ވަރަށް ރީތި މިސްކިތެކެވެ.