ޓާފް ރޯލު ދަށުވި ޒުވާނާ ހާލު ސީރިއަސްވެ، އައިސީޔޫގައި
އެމްޕީއެލް ސަރަހައްދުގައި ޓާފް ރޯލެއް ދަށުވެ އަނިޔާ ލިބުނު މަޖޫރީގެ ހާލު ސީރިއަސްވެ، އައިސީޔޫގައި ފަރުވާ ދޭން ފަށައިފިއެވެ.
މި މީހާއަށް ފަރުވާ ދެމުން އަންނަނީ އައިޖީއެމްއެޗް އައިސީޔޫގައެވެ.
ފުލުހުން ވިދާޅުވީ މި ހާދިސާގެ ރިޕޯޓު ލިބިފައިވަނީ ރޭގެ ދަންވަރު 2:30 ހާއިރު ކަމަށާއި، މިހާދިސާގައި އަނިޔާވެފައިވަނީ މަޖޫރީއެއްގެ ގޮތުގައި މަސައްކަތްކުރި އުމުރުން 28 އަހަރުގެ ދިވެހި ފިރިހެނަކަށް ކަމަށެވެ.
ފުލުހުން އިތުރަށް ވިދާޅުވި ގޮތުގައި މި މީހާގެ ދެފައި އިރައިގެން ގޮސް މޫނުމައްޗަށް އަނިޔާވެ އަދި އަނގައިން ލޭ އައިސްފައިވެއެވެ.
މި ހާދިސާއާ ގުޅިގެން އެމްޕީއެލް އިން ނެރުނު ނޫސްބަޔާނުގައި ބުނީ މާލޭ ވިޔަފާރި ބަނދަރުގައި 4 ފެބްރުއަރީ 2021 ވަނަ ދުވަހުގެ ރޭގެ ދަންވަރުގެ ވަގުތެއްގައި ހިނގި ހާދިސާއެއްގައި، "މިނާ އިންވެސްޓްމަންޓް" ކްލިއަރަންސް ގުރޫޕްގެ މަޖޫރީއަކަށް ސީރިއަސް އަނިޔާތަކެއް ލިބިފައިވާ ކަމަށާއި މި ހާދިސާ، އެމްޕީއެލްގެ އެކްސިޑެންޓް އެންޑް އިންވެސްޓިގޭޝަން ކޮމެޓީން މިއަދު ތަހުޤީގްކުރަން ފަށާފައިވާ ކަމަށެވެ.
މީގެ އިތުރުން މި ބަޔާނުގައި ވަނީ އެގޮތުން، ހާދިސާގެ ތަހުޤީގުން ވަކި ގޮތެއް ކަނޑައަޅަންދެން، މިނާ އިންވެސްޓްމަންޓް ގުރޫޕާއި، ހާދިސާއާ ގުޅުންހުރި އޮޕަރޭޝަންސްގައި މަސައްކަތް ކުރަމުން ދިޔަ އެމްޕީއެލްގެ މުވައްޒަފުން ސަސްޕެންޑް ކުރުމަށް ކޮމެޓީން ނިންމާފައިވާ ކަމަށް ވެސް ބުނެފައެވެ.
އަނިޔާވި މީހަކީ މިނާ އިންވެސްޓްމަންޓް ގްރޫޕުގައި މަސައްކަތް ކުރާ މީހެކެވެ.
