ބޫސްޓާ ޑޯސް ދިނުމަށް އިތުރު 100،000 ވެކްސިން އަންނަ މަހު ގެންނަނީ
ކޮވިޑް-19ގެ އާލަމީ ވަބާއިން ރައްކާތެރިވުމަށް ޖަހާ ވެކްސިންގެ ތިންވަނަ ޑޯޒް (ބޫސްޓާ ޑޯޒް) ޖެހުމަށް އިތުރު 100،000 ވެކްސިން އަންނަ މަހު ގެންނާނެ ކަމަަށް ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ)އިން ވިދާޅުވެއްޖެއެވެ.
ކޮވިޑުން ރައްކާތެރިވުމުގެ ގޮތުން ތިންވަނަ ޑޯޒް (ބޫސްޓާ ޑޯޒް)ގެ ގޮތުގައި ރާއްޖޭގައި އަދި ދެނީ ފައިޒާ ވެކްސިނެވެ.
ދެކުނު އެފްރިކާއިން ފެތުރެން ފެށި ކޮވިޑް-19ގެ އައު ވެރިއަންޓް (އޮމިކްރޮން ވޭރިއަންޓް) ރާއްޖޭގައި ވެސް ފެތުރިދާނެކަމުގެ ކަންބޮޑުވުން އޮތުމާ އެކީ، އެޅިދާނެ ފިޔަވަޅުތަކާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ބޫސްޓާ ޑޯޒް ޖެހުމަށް ޝަރުތު ހަމާ މީހުނަށް ވެކްސިން ޖެހޭ މިންވަރަށް މިވަގުތު ފައިޒާ ވެކްސިން އެބަހުރި ކަމަށެވެ.
"މިވަގުތު ހުރި ކެޓަގަރީސްތަކަށް ދޭ ވަރަށް އަޅުގަނޑުމެން އަތުގައި ވެކްސިން އެބަހުރި. ޑިސެމްބަރު މަހުގެ މެދުތެރޭ ހިސާބުގައި ނުވަތަ 20އާއި ހިސާބުގައި އަޅުގަނޑުމެންނަށް އިތުރު 100،000 ފައިޒާ ވެކްސިން ޑޯޒް ލިބޭނެ" ޑރ. ނަޒްލާ ވިދާޅުވިއެވެ.
މި 100،000 ވެކްސިން ލިބެނީ ކޮވެކްސް މެދުވެރިކޮށް ކަމަށް ވެސް ޑރ. ނަޒްލާ ވިދާޅުވިއެވެ.
ކޮވިޑް ވެކްސިންގެ ބޫސްޓާ ޑޯޒް އެޗްޕީއޭއިން ޖަހަން ފަށައިފައި ވަނީ މި މަހުގެ ހަތަރު ވަނަ ދުވަހުން ފެށިގެންނެވެ. އެއީ އުމުރުން 60 އަހަރުން މަތީގެ މީހުންނާއި ދިފާއީ ނިޒާމު ބަލިކަށި މީހުންނާއި ފްރޮންޓް ލައިންގައި މަސައްކަތް ކުރާ ސިއްހީ މުވައްޒަފުންނަށް އެކަންޏެވެ. މިހާރު މި ވެކްސިން ޖަހަމުންދަނީ 50 އަހަރުން މަތީގެ މީހުނަށެވެ.
