ޝެއިޚް ހަސީނާ ރާއްޖެއަށް ރަސްމީ ދަތުރުފުޅެއް ކުރައްވަނީ
އަވަށްޓެރި ބަނގްލަދޭޝްގެ ބޮޑު ވަޒީރު، ޝެއިޚް ހަސީނާ ރާއްޖެއަށް ރަސްމީ ދަތުރުފުޅެއް ކުރައްވަން ހަމަޖެހިއްޖެއެވެ.
ނައިބު ރައީސް ފައިސަލް ނަސީމްގެ އަރިހަށް ބަނގްލަދޭޝްގެ ފޮރިން ސެކެޓްރީ މަސްއޫދު ބިން މޫމެން މިއަދު ކުރެއްވި ރަސްމީ ޒިޔާރަތުގައި ވަނީ، ޝެއިޚް ހަސީނާ ރާއްޖެއަށް ޒިޔާރަތް ކުރައްވަން އުޅުއްވާކަން އިއުލާނު ކުރައްވައިފައެވެ.
އެގޮތުން މަސްއޫދު ވިދާޅުވީ މި އަހަރު ތެރޭގައި ޝެއިޚް ހަސީނާ އެ ދަތުރުފުޅު ކުރައްވާނެ ކަމަށެވެ.
ބަނގްލަދޭޝްގެ ފޮރިން ސެކްރެޓަރީ، ނައިބު ރައީސާ އެކު ބޭއްވި މި ބައްދަލު ކުރެއްވުމުގައި، ދެ ޤައުމުގެ ދެމެދުގައި ގުޅުން ބަދަހިކުރެވިދާނެ ދާއިރާތަކާ ބެހޭ ގޮތުން ވެސް މަޝްވަރާކުރެއްވިއެވެ. އެގޮތުން މި ބައްދަލުކުރެއްވުމުގައި ސަރަޙައްދީ ވިޔަފާރިއާއި ގުޅުންތައް އިތުރުކުރުމާއި، އިޤްތިޞާދީ ދާއިރާއިން ގުޅުން ބަދަހިކުރުމާއި، ފަތުރުވެރިކަމާއި ދަނޑުވެރިކަން ފަދަ ދާއިރާތަކުން ގުޅުން ބަދަހިކުރުމާ ބެހޭ ގޮތުން ވެސް ދެ ބޭފުޅުން ވަނީ މަޝްވަރާކުރައްވައިފައެވެ.
Ads by STO
