އިޓަލީ އަދި ޖަރުމަނުން ވެސް ކޮވިޑްގެ އައު ވޭރިއަންޓް ފެނިއްޖެ
ފެތުރެމުން އަންނަ ކޮވިޑް-19ގެ އައު ވޭރިއަންޓް ކަމުގައިވާ "އޮމިކްރޮން"، ޖަރުމަނާއި އިޓަލީން ވެސް ފެނިއްޖެއެވެ.
ބޭރުގެ ރިޕޯޓުތަކުން ބުނާ ގޮތުގައި މި ދެ ޤައުމުން ވެސް ދެ މީހަކު ވަނީ ކޮވިޑްގެ މި އައު ވޭރިއަންޓަށް ފައްސިވެފައެވެ.
ދެކުނު އެފްރިކާއިން ފުރަތަމަ ފެނުނު އޮމިކްރޮން ފެތުރެން ކޮންޓްރޯލް ކުރުމުގެ ގޮތުން ބައެއް ޤައުމުތަކުން މިހާރު ވެސް ވަނީ ފިޔަވަޅުތަށް އަޅަން ފަށައިފައެވެ. އެގޮތުން ބައެއް ޤައުމުތަކުން މިހާރު ވަނީ ދެކުނު އެފްރިކާގެ ޤައުމުތަކަށް ބޯޑަރު ބަންދު ކޮށްފައެވެ. މީގެ އިތުރުން އެހެން ބައެއް ޤައުމުތަކުން ވަނީ އެ ޤައުމުތަށް ފުރަބަންދު ވެސް ކޮށްފައެވެ.
ސައިންޓިސްޓުން ބުނެފައިވާ ގޮތުގައި އެހެން ވޭރިއަންޓުތަކާ އަޅައި ބަލާއިރު، އޮމިކްރޮން ވޭރިއަންޓް ހަލުވިކަމާ އެކު ފެތުރެއެވެ. ދެކުނު އެފްރިކާއިން މި ވޭރިއަންޓް މިދިޔަ ހަފްތާގައި ފެނުން ފަހުން، ބެލްޖިއަމް، އިޒްރޭލު، އިނގިރޭސިވިލާތް، ހޮންގްކޮންގ، އަދި މިހާރު ޖަރުމަނާއި އިޓަލީން ވެސް މިވަނީ އޮމިކްރޮން ވޭރިއަންޓު ފެނިފައެވެ.
އޮމިކްރޮން ވޭރިއަންޓުގެ ސަބަބުން ހަަށިގަނޑުގެ ދިފާއީ ނިޒާމު ބަލިކަށި ކޮށްލާކަމަށް ވެސް ސައިންޓިސްޓުން ވަނީ ބުނެފައެވެ.
Ads by STO
