ކުޅުދުއްފުށީ ހޮސްޕިޓަލުން ތެލެސީމިއާ ޑީއެންއޭ ޓެސްޓުގެ ޚިދުމަތް
ސޮސައިޓީ ފޮ ހެލްތު އެޑިއުކޭޝަން (ޝީ)އާއި ހދ. ކުޅުދުއްފުށި ރީޖަނަލް ހޮސްޕިޓަލު ގުޅިގެން ތެލެސީމިއާ ޑީއެންއޭ ޓެސްޓުގެ ހިދުމަތް އެ ހޮސްޕިޓަލުގައި މިއަދު ފަށައިފިއެވެ.
މި ޓެސްޓަކީ ތެލެސީމިއާ ސްކްރީން މެދުވެރިކޮށް ނަތީޖާ ޔަގީން ނުވާ މީހުންނަށް ޝީގެ ފަރާތުން ހަދައިދެމުން އަންނަ ޓެސްޓެކެވެ.
ކުޅުދުއްފުށީ ހޮސްޕިޓަލުން މައުލޫމާތު ދީފައިވާ ގޮތުގައި ތެލެސީމިއާ ޑީއެންއޭ ޓެސްޓު ހެދުމަށް ބޭނުންވާ ސުންކު އެ ހޮސްޕިޓަލުގެ ލެބޯޓްރީ މެދުވެރިކޮށް ނެގުމަށް ފަހު މާލެ ފޮނުވުމުގެ އިންތިޒާމުތައް މިހާރު ވަނީ ހަމަޖެހިފައެވެ. މީގެ އިތުރުން، އެ ހިދުމަތް ހޯދަން ބޭނުންވާ މީހުންނަށް ކުޅުދުއްފުށީ ހޮސްޕިޓަލުގެ ވެބްސައިޓް މެދުވެރިކޮށް އެޕޮއިންޓްމަންޓް ހެއްދޭނެ އިންތިޒާމުތައް ވެސް ހަމަޖައްސައިފައިވާނެ ކަމަށް އެ ހޮސްޕިޓަލުން ބުންޏެވެ.
"މިހާރު ތެލަސީމިޔާ ޑީއެންއޭ ޓެސްޓް ހެދުމަށް އެ ކުރާ ދަތުރަށް އެންމެ މަދުން ވެސް އާއިލާއަކަށް 10،000 އެއްހައި ރުފިޔާ ހަރަދު ކުރަން ޖެހޭނެ. އަދި އެކަމުގައި އެ ހޭދަ ކުރަންޖެހޭ ފައިސާގެ އިތުރަށް، އެ ކުރަން ޖެހޭ ދަތުރާއި، އެކަމަށް ހޭދަވާ ވަގުތަށް މިކަމުގެ ސަބަބުން ބޮޑު ލުއެއް ލިބިގެން ދާނެ" ކުޅުދުއްފުށީ ހޮސްޕިޓަލުގެ މެނޭޖަރު އަހުމަދު ދާއޫދު ވިދާޅުވިއެވެ.
ދާއޫދު އިތުރަށް ވިދާޅުވީ އެ ހޮސްޕިޓަލުގެ ލެބޯޓްރީން ނެހެދޭ ޓެސްޓްތައް، އެހެން ލެބޯޓްރީއަކާ ގުޅިގެން ހެދޭނެ އިންތިޒާމެއް ހަމަޖެއްސުމަށް މަސައްކަތް ކުރަމުންދާ ކަމަށެވެ.
Ads by STO
