ރައީސް ޔާމީން އުޅުއްވަނީ ދިވެހި ރައްޔިތުންނަށް ދަތިކުރަން: އާޒިމް
ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އުޅުއްވަނީ ދިވެހި ސަރުކާރަށް ޖެއްސުން ކުރައްވަން އެކަނި ނޫން ކަމަށާއި އެމަނިކުފާނު އެ އުޅުއްވަނީ ދިވެހި ރައްޔިތުންނަށް ދަތިކޮށް، އިތުރު ތަކުލީފެއް ޖެއްސުމަށްކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
ބަނގްލަދޭޝްގެ ބޮޑު ވަޒީރު ޝެއިހް ހަސީނާ ރާއްޖެ ވަޑައިގެން މަޖިލީހުގައި ތަގުރީރު ކުރެއްވުމަށް ރުހުން ހޯދުމަށް މިއަދު ބޭއްވި ޖަލްސާގައި މަޖިލީހުގެ މެޖޯރިޓީ ޕާޓީގެ ފަރާތުން ވާހަކަ ދައްކަވަމުން އާޒިމް ވިދާޅުވީ ކުރީގެ ރައީސްކަން ކުރައްވާފައި ހުންނެވި ބޭފުޅަކު މަގުމައްޗަށް ނިކުމެވަޑައިގެން އާދައިގެ ނިކަމެތި ރައްޔިތުންނަށް އުނދަގުލެއް އުފުލަން ޖެހިދާނެ ފަދަ ގޮތަކަށް އަމަލުތަކާއި ބަސްތައް ބައްޓަން ކުރައްވަމުން ގެންދަވާތީ އެކަމާ ކަންބޮޑުވެލައްވާ ކަމަށެވެ. އަދި އެމަނިކުފާނު އެ އުޅުއްވަނީ ސަރުކާރަށް ޖެއްސުންކޮށް ސިޔާސީ ފައިދާ ހާސިލްކުރެއްވުމަށް އެކަނި ނޫން ކަމަށާއި އެ އަމަލުތަކުގެ ސަބަބުން ދިވެހި ރައްޔިތުންނަށް ނިކަމެތިކަމާއި ދަތިކަން އަދި އިތުރު ތަކުލީފެއް އުފުލަން ޖެހޭނެކަމަށް އާޒިމް ވިދާޅުވިއެވެ.
ރައީސް ޔާމީނަކީ ތަފާތު އެކި ތުހުމަތުތައް ކުރެއްވި ޝަރީއަތް ވެސް ހިންގެމުންދާ ބޭފުޅެއްކަން ފާހަގަކުރައްވައި އަލީ އާޒިމް ވިދާޅުވީ އެފަދަ ބޭފުޅަކު ނިކުމެ ދޭދޭ ގައުމުތަކާ މެދު ޖައްސައި، ރައްޔިތުން ތަންތަނަށް ދިޔަ ނުދީ އެގައުމުތަކުގެ ހިދުމަތްތައް ލިބުން ހުއްޓުވަން ކުރައްވާ މަސައްކަތަކީ ވަރަށް ދަށު ދަރަޖައިގެ އަމަލެއްކަމަށެވެ.
އާޒިމް ވަނީ އިންޑިއާ އައުޓު ކެމްޕެއިން ހުއްޓައިލުމަށް ގޮވައިލައްވައިފައެވެ. މީގެ ކުރިން ރައީސް ޔާމީންގެ ސަރުކާރުގައި ކޮމޮންވެލްތުން ވަކިވާން ނިންމި ނިންމުމަށް އިޝާރާތް ކުރައްވައި އާޒިމް ވިދާޅުވީ އެ ފަދަ ގުޅުންތައް ކެނޑުމުގެ ސަބަބުން ދިމާވި ދަތިތަކުން އަރައިގަތުމުގެ ގޮތްތައް މި ސަރުކާރަށް ހޯދަންޖެހޭތީ ރައީސް ޔާމީންގެ އަމަލުތައް ހުއްޓައިލަން ޖެހޭ ކަމަށެވެ.
ބަނގްލަދޭޝްގެ ބޮޑުވަޒީރު ރާއްޖެ ވަޑައިގެން މަޖިލީހުގައި ތަގުރީރު ކުރެއްވުމާ ގުޅޭ ގޮތުން ވާހަކަ ދައްކަވަން އެރުވި ފުރުސަތުގައި މައުޟޫއަށް ވެސް އާޒިމް ވާހަކަ ދެއްކެވިއެވެ. އެގޮތުން ވިދާޅުވީ ބަނގްލަދޭޝްއިން ވަނީ ރާއްޖޭގެ އުމްރާނީ ތަރައްގީއަށް ވަރަށް ގިނަ ހިދުމަތްތަކެއް ކޮށްދެއްވާފައި ކަމަށެވެ.
"ބަނގްލަދޭޝްއަކީ މި ރާއްޖޭގެ، މިފުރަ މާލޭގެ މިހިރަ ބޮޑެތި އުސް އިމާރާތްތަކުގެ ހަގީގަތުގައި ފަހަތުގައިވާ ފަރާތްކަން އަޅުގަނޑުމެން އެންމެން ވެސް ގަބޫލުކުރާނެ. މިރާއްޖޭގެ އިގްތިޞާދުގެ ލޭނާރުކަމުގައިވާ ފަތުރުވެރިކަން، ހަގީގަތުގައި މިރިސޯޓުތައް އަޅުގަނޑުމެންނަށް މި އަގުގައި ވިއްކެމުން މިދާ ދިޔުމުގެ ފަހަތުގައިވާ، އަޅުގަނޑުމެން އެންމެން ވެސް ގަބޫލުކުރާނެ ބަނގްލަދޭޝްގެ މަސައްކަތްތެރިންކަން" އާޒިމް ވިދާޅުވިއެވެ.
އާޒިމް ވިދާޅުވީ ރާއްޖެއަށް ދަތިވާ ކޮންމެ ދަނޑިވަޅެއްގައި އެހީތެރިކަން ފޯރުކޮށްދޭ އެއް ގައުމަކީ ބަނގްލަދޭޝްކަމަށެވެ. އެގޮތުން 2004 ވަނަ އަހަރުގެ ސުނާމީ ކާރިސާގައި އެގައުމުން ރާއްޖެއަށް ފޯރުކޮށްދިން އެހީތެރިކަން އާޒިމް ފާހަގަކުރެއްވިއެވެ. މީގެ އިތުރުން މާލެއަށް ދިމާވި ފެނުގެ ދަތިކަމުގެ ހާދިސާގެ އިތުރުން ކޮވިޑުގެ ތެރޭގައިވެސް ބަނގްލަދޭޝްއިން ރާއްޖެއަށް އެހީތެރިކަން ފޯރުކޮށްދިންކަމަށް ވިދާޅުވިއެވެ.
މިއަދު އޮތް މަޖިލިސް ޖަލްސާގައި ވަނީ ޝެއިހް ހަސީނާ ތަގުރީރު ކުރެއްވުމަށް ރުހުން ދީފައެވެ. އެކަމަނާ މަޖިލީހުގައި ތަގުރީރު ކުރައްވާނީ މިމަހުގެ 23 ވަނަ ދުވަހުގެ ހަވީރު 4:00 ގައެވެ.
