އިލެކްޓްރޯނިކް ފައިސާ ދޫކުރުމުގެ ލައިސަންސް އުރީދޫއާއި ދިރާގަށް ދީފި
ގައުމީ ޕޭމަންޓް ސިސްޓަމްގެ ގާނޫނުގެ ދަށުން، ދިރާގާއި އުރީދުއަށް ރާއްޖޭގައި ޕޭމަންޓުގެ ހިދުމަތް ދިނުމުގެ ލައިސަންސް ދޫކޮށްފިއެވެ.
އުރީދުއަށް ދީފައި ވަނީ ދިވެހިރާއްޖޭގައި އިލެކްޓްރޯނިކް ފައިސާ ދޫކުރުމާއި ހިދުމަތާއި ރެމިޓަންސް ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސެވެ. އަދި ދިރާގަށް ދޫކޮށްފައި ވަނީ، ދިވެހިރާއްޖޭގައި އިލެކްޓްރޯނިކް ފައިސާ ދޫކުރުމުގެ ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސްއެވެ.
މި ލައިސަންސްގެ ދަށުން އުރީދޫން އަލަށް ތައާރަފްކުރުމަށް ނިންމައިފައިވާ ރެމިޓަންސް ހިދުމަތަކީ، އެ ކުންފުނިން ދެމުންގެންދާ އެމް-ފައިސާ ވޮލެޓް މެދުވެރިކޮށް ރާއްޖެއިން ބޭރަށް ފައިސާ ފޮނުވޭ ގޮތަށް ފަރުމާކުރެވިފައިވާ ހިދުމަތެކެވެ.
ދިރާގަށާއި އުރީދުއަށް ޕޭމަންޓުގެ ހިދުމަތް ދިނުމުގެ ލައިސަންސް ދޫކޮށްފައި ވަނީ މި މަހުގެ 18ވަނަ ދުވަހުއެވެ.
މަރުކަޒީ ބޭންކު އެމްއެމްއޭއިން ބުނީ، ގައުމީ ޕޭމަންޓު ހިދުމަތް ދިނުމުގެ ލައިސަންސް ދިރާގާއި އުރީދުއަށް ދޫކުރުމުން، އެ ދެ ކުންފުނިން ވެސް ޕޭމަންޓުގެ ހިދުމަތްތައް ދެމުންގެންދާނީ އެ ލައިސަންސްގެ ދަށުން ކަމަށެވެ.
