ދޫނިތައް މަރައިލި މައްސަލަ ޝަރީފް ދިފާޢު ކުރައްވައިފި

ރާއްޖެއަށް އެތެރެކުރި ގިނަ އަދަދެއްގެ ދޫނިތަކެއް މަރައިލި މަރައިލުން ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އިބްރާހީމް ޝަރީފް ދިފާއު ކުރައްވައިފިއެވެ.

Ads by STELCO

ގަވާއިދާ ހިލާފަށް އެތެރެ ކޮށްފައިވާ ދޫނިތަކެއް ކަމަށް ބުނެ، އިންޖެކްޝަން ޖަހައިގެން 120 ދޫންޏެއް އިއްޔެ މަރައިލައިފައިވާ ވީޑިއޯތަކަކާއި ފޮޓޯތަކެއް މީސްމީޑިއާގައި މިހާރު ދަނީ ދައުރުވަމުންނެވެ. އަދި އެކަމާ މެދު ގިނަ ބަޔަކު ވަނީ ނުރުހުން ވެސް ފާޅުކޮށް، އެއީ ވަރަށް ވެސް ރަހުމް ކުޑަ އަމަލެއް ކަމުގައި ސިފަ ކޮށްފަފައެވެ.

ދޫނިތައް މަރައިލުމުގެ އަމަލާ ގުޅިގެން މިއަދުގެ މަޖިލިސް ޖަލްސާގައި ވެސް ވަނީ ކަންބޮޑުވުން ފާޅުކޮށް، ބަހުސް ކޮށްފައެވެ.

މި އަމަލާ ގުޅިގެން ގިނަ މެންބަރުން ނުރުހުން ފާޅު ކުރި ނަމަވެސް، ކެލާ ދާއިރާގެ މެންބަރު ޝަރީފް ވަނީ އެ އަމަލު ދިފާާއުކޮށް ވާހަކަ ދައްކަވައިފައެވެ. މެންބަރު ޝަރީފް ވިދާޅުވީ މަރައިލި ދޫނިތަކުގެ ކިބައިން ފެތުރިދާނެ ބައްޔެއް ނޭނގޭ ކަމަށާއި މީގެ ކުރިން ވެސް އަމަލުކުރަނީ އެހެން ކަމަށެވެ.

އެގޮތުން ދޫނި ރޯގާއާ ގުޅިގެން ގައުމުތަކުން އަމަލުކުރި ގޮތުގެ މިސާލު ނަންގަވަމުން ޝަރީފް ވިދާޅުވީ އޭރު ވެސް އެތައް ހާސް ދޫންޏެއް މަރައިލި ކަމަށެވެ. އަދި ތާރީހު ބަލައިލުމުން އެގޮތަށް އަމަލުކުރަން ޖެހުނު ސަބަބު ސާފުވާނެ ކަމަށް ވެސް މެންބަރު ޝަރީފް ވިދާޅުވިއެވެ. އަދި އިއްޔެ މަރައިލި ދޫނިތަކުގައި ވެސް އެފަދަ ބައްޔެއް ފެތުރުމުގެ ކެޕޭސިޓީ އެބަހުރި ކަމަށް ޝަރީފް ވިދާޅުވިއެވެ.

"ދެން މިތަނަށް އައިސްގެން އަޅުގަނޑުމެން ދެ ތިން ހަތަރު ދޫންޏެއް މަރައިލައިގެން މިވަރަށް ކަންތައް ބޮޑުވެގެން މިއުޅެނީ. އޭގެއިން ކޮން ކަހަލަ ބައްޔެއް ކަމެއް، ކިހިނެއްތޯ ފެތުރެނީ އަޅުގަނޑުމެންނަކަށް ނޭނގޭ." ކެލާ ދާއިރާގެ މެންބަރު ވިދާޅުވެފައިވެއެވެ.

ފިޝަރީޒް މިނިސްޓްރީން އިއްޔެ ގިނަ އަދަދެއްގެ ދޫނިތަކެއް މަރައިލުމާ ގުޅިގެން އެ މިނިސްޓްރީން ބުނީ، އެގޮތަށް އަމަލުކުރީ ބަންޑާރަނައިބުގެ ލަފާގެ މަތިން ކަމަށެވެ. ނަމަވެސް ބަންޑާރަނައިބުގެ އޮފީހުން އެކަން ދޮގުކޮށް ރޭ ބުނީ ދޫނިތައް މަރައިލުމުގެ ބަދަލުގައި ފޮނުވާލެވެން އޮތް ކަމަށާއި ލަފާ ދީފައި ވާނީ ދިވެހިރާއްޖެއަށް ދޫނިތައް އެތެރެ ކުރުމާ ބެހޭ ގަވާއިދުގައިވާ ގޮތުގެ މަތިން އަމަލު ކުރުމަށް ކަމަށެވެ.

ދޫނިތައް މަރައިލުމުގެ ބަދަލުގައި އަނބުރައި ފޮނުވައިލުމުގެ ފުރުސަތު ދިރޭ ޖަނަވާރު އެތެރެ ކުރުމާ ބެހޭ ގަވާއިދުގެ 10 ވަނަ މާއްދާ (ހ) ވަނަ މާއްދާގެ ދަށުން މިނިސްޓްރީއަށް ލިބޭއިރު، އެ ތަކެތި ނައްތައިލުމުގެ ބާރު ވެސް ލިބެއެވެ. އެ ގަވާއިދު ބަދަލުކޮށް އިސްލާހުކުރަން ޖެހޭކަން ގިނަ މެމްބަރުން ގަބޫލުކުރައްވާ އިރު އެއީ ވަކި މައްސަލައެއްގެ ގޮތުގައި ބަލައި ކަމާ ގުޅުންހުރި އިދާރާތައް ހާޒިރުކޮށް ޖަވާބުދާރީ ކުރުވުމަށް ވެސް މެމްބަރުން ދަނީ ގޮވައިލައްވަމުންނެވެ.