" 'އިންޑިއާ އައުޓް' ކެމްޕެއިނަކީ ޤައުމީ ސަލާމަތަށް ހުރި ނުރައްކަލެއް ކަމަށް ސިފައިން ޤަބޫލުކުރޭ"
ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލައި "އިންޑިއާ އައުޓް"ގެ ނަމުގައި އިދިކޮޅު ފަރާތްތައް ހިންގާ ހަރަކާތްތަކަކީ، ޤައުމީ ސަލާމަތަށް ހުރި ނުރައްކަލެއް ކަމަށް ހުރިހާ ލެވަލެއްގެ ސިފައިން ވެސް ޤަބޫލު ކުރާ ކަމަށް ޑިފެންސް މިނިސްޓަރު މާރިޔާ އަހުމަދު ދީދީއާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލު ވިދާޅުވެއްޖެއެވެ.
ރޭގައި އޮތް 241 ކޮމިޓީ ބައްދަލުވުމުގައި ވާހަކަ ދައްކަވަމުން މިނިސްޓަރު މާރިޔާ ދީދީ ވިދާޅުވީ ނެޝަނަލް ސެކިއުރިޓީ ކައުންސިލްގެ ހުރިހާ މެންބަރުންނާއި އެމްއެންޑީއެފްގެ ލަފާދޭ މަޖިލީހުގެ މެންބަރުން އިއްތިފާގުވެވަޑައިގަންނަވާ ގޮތުގައި، އިދިކޮޅު ލީޑަރ ޢަބްދުﷲ ޔާމީން ޢަބްދުލްޤައްޔޫމް އިސްވެ ހިންގަވައި "އިންޑިއާ އައުޓް" ހަރަކާތަކީ ގައުމީ ސަލާމަތަށް ނުރައްކަލެއް ކަމަށެވެ. އަދި ސީނިއާ ޖެނެރަލް އޮފިސަރުންނާއި ކޮމާންޑް އެންޑް ސްޓާފް ލެވެލްގައި މަސައްކަތް ކުރާ ހުރިހައި އޮފިސަރުންނާއި ރާއްޖެއިން ބޭރުގައި މަސައްކަތް ކުރަމުން ގެންދާ ދިވެހި އަސްކަރިއްޔާގެ ޑިފެންސް އެޑްވައިޒަރުން ވެސް އެކަމަށް އިއްތިފާގުވެވަޑައިގަންނަވާ ކަމަށް ވެސް މިނިސްޓަރ މާރިޔާ ވިދާޅުވިއެވެ.
"އޮފިސަރުންނާއި ކޮމާންޑް އެންޑް ސްޓާފް ލެވެލްގައި މަސައްކަތް ކުރާ ހުރިހައި އޮފިސަރުންނާއި ރާއްޖެއިން ބޭރުގައި މަސައްކަތް ކުރަމުން ގެންދާ ދިވެހި އަސްކަރިއްޔާގެ ޑިފެންސް އެޑްވައިޒަރުން (މި ދެންނެވީ ސްރީލަންކާ، އިންޑިއާ، ޕާކިސްތާން، މެލޭޝިޔާ އަދި އިގިރޭސިވިލާތުގައި ޕޯސްޓްކޮށްފައިވާ ޑިފެންސް އެޑްވައިޒަރުން)ނާ ވެސް އަޅުގަނޑު މަޝްވަރާ ކުރިން. ހުރިހައި ބޭފުޅުން ވެސް އިއްތިފާގުވޭ ރަައީސް ޔާމީންގެ އިންޑިއާ އައުޓް ކެމްޕެއިނަކީ ގައުމީ ސަލާމަތަށް ހުރި ބޮޑު ނުރައްކަލެއް ކަމަށް،" މިނިސްޓަރ މާރިޔާ ވިދާޅުވިއެވެ.
މިނިސްޓަރ މާރިޔާ ވިދާޅުވީ، އެ ހަރަކާތަކީ ހުއްޓުވަން ޖެހިފައިވާ ހަރަކާތެއް ކަމަށާއި އެ ހަރަކާތުން ޓެރަރިޒަމަށް ބާރުދޭ ކަމަށެވެ. ނުހުއްޓުވި އޮތީ ކީއްވެތޯ ސުވާލު ކުރުމުން މިނިސްޓަރ އެދިވަޑަައިގަތީ އެކަން ފުލުހުން މެދުވެރިކޮށް ސާފުކުރުމަށެވެ.
އެ ބައްދަލުވުމުގައި ޗީފް އޮފް ޑިފެންސް ފޯސް އަބްދުﷲ ޝަމާލް ވިދާޅުވީ "އިންޑިއާ އައުޓް" ހަރަކާތުގެ ނުރައްކާ ދެނެގަތުމަށް އެމްއެންޑީއެފްގެ ލަފާދޭ މަޖިލީހާއި ސީނިއާ ޖެނެރަލް އޮފިސަރުންނާއި ކޮމާންޑް އެންޑް ސްޓާފް މަޝްވަރާ ކޮށްފައިވާ ކަމަށާއި އަދި ރާއްޖެއިން ބޭރުގައި މަސައްކަތް ކުރަމުން ގެންދާ ދިވެހި އަސްކަރިއްޔާގެ ޑިފެންސް އެޑްވައިޒަރުންގެ ލަފާ ވެސް ހޯއްދަވައިފައިވާ ކަމަށެވެ.
އިންޑިއާ ސިފައިން ރާއްޖޭގައި ނެތުމުން ގެއްލުންވަނީ ރިޝްވަތު މާރިޔާއަށް.
މާރިޔާ ތިހަދަނީ ހުސްދޮގު. ޔަގީނުންވެސް މަށެއްގަބޫލެއްނުކުރަން ވީމާހުރިހާސިފައިންނެކޭނުބުނެވޭނެ. އިންޑިޔާސިފައިން ރާއްޖޭގަތިބެންޖެހޭނެކަމަށް ގިނަސިފައިންގަބޫލެއްނުކުރޭ.