ޖަސްޓިން ބީބާ ކޮވިޑަށް ފައްސިވެއްޖެ
ލަވަކިޔުންތެރިޔާ ޖަސްޓިން ބީބާ ކޮވިޑް-19އަށް ފައްސި ވެއްޖެއެވެ.
އޭނާއާއި ޓީމްގެ ބައެއް މެމްބަރުން ކޮވިޑަށް ފައްސިވެފައި މި ވަނީ، ޖަސްޓިން ލަސްވެގަސްގައި އާދިއްތަ ދުވަހު ޕަފޯމް ކުރުމަށް ތައްޔާރުވަމުން ދަނިކޮށެވެ.
އެހެންވެ، މި ޝޯ މިހާރު ވަނީ ފަސް ކޮށްފައެވެ. ޖަސްޓިންގެ ކިބައިން ފެންނަނީ ކޮވިޑްގެ އާދައިގެ އަލާމާތްތަކެއް ކަމަށް ރިޕޯޓްތައް ބުނެއެވެ.
އޭނާ ކޮވިޑަށް ފައްސި ވުމާ ގުޅިގެން "ޖަސްޓިން ވޯލްޑް ޓުއަރ" ޝޯ މިހާރު ވަނީ ޖޫން މަހުގެ 28ވަނަ ދުވަހު ބޭއްވުމަށް ނިންމައިފައެވެ. މި ޝޯ ފަސް ކުރަން ޖެހުމުން، ކުރިން ޓިކެޓު ގަތް މީހުންނަށް ރީފަންޑު ދިނުމަށް ވެސް ވަނީ ނިންމައިފައެެވެ.
ޖަސްޓިން ވޯލްޑް ޓުއަރ ލޯންޗު ކޮށްފައިވަނީ ސެން ޑިއޭގޯގައި، މި ހަފްތާގެ ކުރީކޮޅުގައެވެ. ޖަސްޓިންގެ ޓީމުން ބުނީ، ޝޯ ފަސް ކުރަން ޖެހުމުން އޭނާ ހުރީ ވަރަށް ދެރަ ވެފައި ކަމަށާއި، ވަރަށް އަވަހަށް ފޭނުންނާ ހަމައަށް ފުރިހަމަ ޝޯއެއް ގެެނެސްދޭން އޭނާ އެދޭ ކަމަށެވެ.
