ރައީސް ނަޝީދު މިރޭ މޯލްޓާއަށް ވަޑައިގަންނަވަނީ
މޯލްޓާގައި ބާއްވާ ބައްދަލުވުމެއްގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ އެ ގައުމަށް ފުރާވަޑައިގަންނަވާ ގޮތަށް ހަމަޖެހިއްޖެއެވެ.
މަޖިލީހުގެ މިއަދުގެ ޖަލްސާ ފައްޓަވައި ދެއްވައި ވާހަކަ ދައްކަވަމުން ރައީސް ނަޝީދު ވިދާޅުވީ މި ދަތުރަކީ، ރައްޔިތުންގެ މަޖިލީހަށް ލިބުނު ދައުވަތަކަށް، ވޯލްޑް "ފޯރަމް ފޮރ ކަލްޗަރ އެންޑް ޕީސް، އަބްދުލްއަޒީޒް ސައުދު އަލްބަޓައިން"ގައި ބައިވެރިވެވަޑައިގަތުމަށް ކުރައްވާ ދަތުރެއް ކަމަށެވެ.
މި ދަތުރުގައި ރައީސް ނަޝީދުގެ އަރިހުގައި ހުޅުމާލެ ދާއިރާގެ މެމްބަރު އަލީ ނިޔާޒާއި، ގަލޮޅު ދެކުނު ދާއިރާގެ މެމްބަރު މީކާއީލް ނަސީމް ބައިވެރިވެވަޑައިގަންނަވާނެއެވެ.
"އަޅުގަނޑު މިރޭ ފުރަން، އެހެން ނަަމަވެސް، އާދިއްތަ ދުވަހު އެނބުރި އާދެވޭނެ، މި ދަތުރުގައި ގިނައިން އޮތީ ދަތުރު ކުރުމުގެ ވަގުތު." ރައީސް ނަޝީދު ވިދާޅުވިއެވެ.
ވޯލްޑް ފޯރަމް ފޮރ ކަލްޗަރ އެންޑް ޕީސްގެ 2 ވަނަ އެޑިޝަން މޯލްޓާގައި ބޭއްވުމަށް ހަމަޖެހިފައި ވަނީ މޯލްޓާގެ ރައީސް ޖޯޖް ވެލާގެ ބެެއްލެވުމުގެ ދަށުން މިމަހުގެ 3 އަދި 4 ގައެވެ.
"ލީޑަރޝިޕް ފޮރ ޖަސްޓް ޕީސް"ގެ ނަމުގައި ބާއްވާ މި ފޯރަމްގެ މައިގަނޑު މަގްސަދަކީ ލީޑަރޝިޕް ގާބިލުކަން އިތުރުކުރުމަށް ބޭނުންވާ އިންސްޓިޓިއުޝަނަލް މެކޭނިޒަމްތަކާއި، ތަޢުލީމީ ޕްރޮގްރާމްތަކާއި، އެކްޝަން ޕްލޭންތައް ދިރާސާކޮށް، އެ ޕްލޭންތައް އެކަށައެޅުމެވެ.
