115 މެންބަރުންގެ ތެރެއިން 100 މެންބަރުން ވޯޓް ދިނީ އިންތިޚާބު ފަސް ކުރަން
އެމްޑީޕީގެ ޗެއަަރޕާސަން ހޮވުމަށް ބާއްވާ އިންތިޚާބު ފަސް ކުުރަން އެ ޕާޓީގެ ޤައުމީ މަޖިލީހުން ނިންމައިފިއެވެ.
މިރޭގެ ގައުމީ މަޖިލީހުގެ ޖަލްސާގައި 115 މެންބަރުން ބައިވެރިވެވަޑައިގެންނެވިއެވެ. މީގެ ތެރެއިން އިންތިހާބު ފަސްކުރަން ފެންނަ ކަމަށް 100 މެންބަރުން ވޯޓް ދެއްވިއެވެ. ވޯޓް ނުދެއްވާ ތިއްބެވީ 15 މެންބަރުންނެވެ.
ޗެއާޕާސަން ކަމަށް ވާދަކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލްއާއި މާފަންނު އުތުރު ދާއިރާގެ މެންބަރު އިމްތިޔާޒު ފަހްމީއެވެ.
ކުރިން މި އިންތިޚާބު ބޭއްވުމަށް ހަމަޖެހިފައި ވަނީ އޭޕްރީލް 16 ވަނަ ދުވަހުއެވެ. އިންތިޚާބު ފަސްކުރަން ހުށަހެޅުއްވީ ފައްޔާޒްގެ ކެމްޕެއިނު ޓީމުގެ ފަރާތުން، ކެމްޕެއިން މެނޭޖަރު އިބްރާހިމް ވަހީދު (އިބްރޭ)އެވެ. އެ ހުށައެޅުމަށް ތާއީދު ކުރެއްވީ ކިނބިދޫ ދާއިރާގެ މެންބަރު މުހައްމަދު ނާޝިޒްއެވެ.
އިންތިހާބު ބޭއްވުން ފަސް ކުރުމަށް އެދިލެއްވި ސަބަބެއްގެ ގޮތުގައި ދެއްކެވީ ރޯދަ މަހު އިންތިހާބު ބޭއްވުމަކީ އެ ކަމުން މެންބަރުންނަށް ދަތިތަކެއް ކުރިމަތިވާނެ ކަމެއް ކަމަށާއި ވޯޓްލާ މީހުންގެ އަދަދު މަދުވެދާނެ ކަމަށް ބުނެއެވެ.
މިރޭ ބޭއްވި އެމްޑީޕީގެ ޤައުމީ މަޖިލީހުގެ ޖަލްސާގައި ޗެއާޕަރސަންކަމުގެ އިންތިހާބު ފަސްކުރަން މެޖޯރިޓީ މެންބަރުން ވޯޓު ދެއްވުމުން، މިހާރު އެ އިންތިހާބު ބޭއްވުމަށް ކަނޑައަޅައިފައިވަނީ ރަމަޟާން މަސް ނިމި ޝައްވާލް މަހުގެ ވެސް ފުރަތަމަ ހަތް ދުވަސް ނިމުމަށް ފަހު، މެއި މަހުގެ 14 ވާ ހޮނިހިރު ދުވަހުގައެވެ.
އެމްޑީޕީގެ އަސާސީ ޤަވާޢިދު ބުނާގޮތުން އިންތިޚާބު ބޭއްވުމަށް ކަނޑައަޅައިފައިވާ ތާރީޚަށް ބަދަލު ގެނެވޭނީ ޤައުމީ މަޖިލީހުން ފާސްކޮށްގެންނެވެ.
އެމްޑީޕީގެ އާންމު މަޖިލިސް ޖަލްސާގައި މިރޭ ދެ ޓީމުގެ ދެމެދުގައި ހޫނު ބަހުސްތަކެއް ކުރެވުނެވެ.
އެ ގޮތުން މި ޖަލްސާގައި ވާހަކަ ދައްކަވަމުން މިނިސްޓަރ ފައްޔާޒް ވިދާޅުވީ އިންތިގެ ކެންޕެއިން ޓީމުން ކަންތައް ކުރަމުންދާ ގޮތާ މެދު އެއްޗެއް ނުބުނެވޭތޯ ވަރަށް މަސައްކަތް ކުރެވިއްޖެ ކަމަށެވެ. އަދި ރައީސް ނަޝީދަށާއި އިންތިގެ ޓީމަށް ވަރަށް ބޮޑަށް ފާޑު ވިދާޅުވިއެވެ.
އެ ޖަލްސާގައި ވާހަކަ ދައްކަވަމުން އިންތިޔާޒްގެ ޓީމުގެ ފަރާތުން ވިދާޅުވީ، އިންތިޚާބުގެ ތާރީޚެއް ކުރީބައިގައި ކަނޑައެޅީ އެއީ ރޯދަމަސްކަން އެނގިތިބެ ކަމަށެވެ. އަދި ސަރުކާރުން އިންތިޚާބަށް ނުފޫޒު ފޯރުވަން މަސައްކަތް ކުރައްވާ ކަމަށް ވިދާޅުވިއެވެ.
