އިތުރު 20 ރަށަކަށް އެމްބިއުލާންސް ފޮނުވައިފި
އެމްބިއުލާންސްގެ ބޭނުން ޖެހިފައިވާ އިތުރު 20 ރަށަކަށް އެމްބިއުލާންސް ފޮނުވައިފިއެވެ.
އެމްބިއުލާންސް ފޮނުވި ރަށްރަށަކީ ހދ. ފިނޭ، ހދ. ކުރިނބީ، ހދ. ނޭކުރެންދޫ، ށ. ފޭދޫ، ށ. ފީވައް، ރ. މާކުރަތު، ރ. އަނގޮޅިތީމު، ރ. އިންނަމާދޫ، ނ. ވެލިދޫ، ނ. މާޅެންދޫ، ކ. ދިއްފުށި، ކ. ގުރައިދޫ، ކ. ގާފަރު، އއ. ރަސްދޫ، އދ. ދިގުރަށް، ތ. ވިލުފުށި، ގއ. ކަނދޮޅުދޫ، ގދ. ނަޑެއްލާ ޏ. ފުވައްމުލައް، އަދި އައްޑޫ ސިޓީއެވެ.
މީގެ އިތުރުން މާލޭގައި ހުންނަ އިމަރޖެންސީ މެޑިކަލް ސަރވިސަސްއަށް އެމްބިއުލާންސް ފޯރުކޮށްދީފައިވާކަމަށް ހެލްތް މިނިސްޓްރީން ވިދާޅުވިއެވެ.
ރަށްރަށަށް ބޭނުންވާ އެމްބިއުލާންސްތަކުގެ ތެރެއިން ފުރަތަމަ 20 އެމްބިއުލާންސް ރާއްޖެ ގެނެސްފައި ވަނީ މިދިޔަ މަހުގެ 7ވަނަ ދުވަހުއެވެ. ދެވަނަ ޝިޕްމަންޓް ރާއްޖެ ގެނެސްފައި ވަނީ މިދިޔަ އަހަރު ނޮވެމްބަރު މަހުގެ 29ވަނަ ދުވަހުއެވެ. ތިންވަނަ ޝިފްމަންޓް ރާއްޖެ ގެނެސްފައި ވަނީ ފެބްރުއަރީ މަހުގެ 8ވަނަ ދިވަހުއެވެ. އަދި ހަތަރު ވަނަ ޝިޕްމަންޓު ރާއްޖެ ގެނެސްފައި ވަނީ މާޗް މަހުގެ 19ވަނަ ދުވަހު ކަމަށް ހެލްތް މިނިސްޓްރީން ވިދާޅުވިއެވެ.
އެމްބިއުލާންސްގެ ޚިދުމަތަކީ ކޮންމެ ރަށަކަށް ވެސް މުހިންމު ޚިދުމަތެކެވެ. އެމްބިއުލާންސް ހަލާކުވެ ޚިދުމަތް ނުލިބޭކަމުގެ ޝަކުވާ ގިނަ ރަށްރަށުން ކުރެއެވެ. އަދި ޚިދުމަތް މެނދުކެނޑިފައި އޮތުމުގެ ސަބަބުން ރަށްރަށަށް ގިނަ ދަތިތަކާ ކުރިމަތިވަމުންދެއެވެ. އެމްބިއުލޭންސް ދިޔުން ލަސްވެ ފަރުވާ ނުލިބުމުގެ ސަބަބުން ހިތާމަވެރި ހާދިސާތަކެއް ވެސް ވަނީ ހިނގައިފައެވެ.
