މިހައިތަނަށް ނުކުރެވުނު ކަމެއް ދެން ވެސް ނުކުރެވޭނެ، އެމްޑީޕީ ހިންގައިލެވޭނީ ފަޔާއަށް: އަސްލަމް
އެމްޑީޕީ ހިންގާލެވޭނީ އިކޮނޮމިކް މިނިސްޓަރ ފައްޔާޒު އިސްމާޢީލަށްކަމަށް އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވީ އެމްޑީޕީ ޗެއާޕާސަން އިންތިޚާބުގެ ކެމްޕެއިނަށް ކ.އަތޮޅު ކާށިދުއަށް ވަޑައިގެން އެމްޑީޕީގެ މެމްބަރުންނާ ބައްދަލު ކުރައްވައި ދެއްކެވި ވާހަކައިގައެވެ.
އަސްލަމް ވިދާޅުވީ މި ސަރުކާރުގެ މިހައިތަނަށް ނިންމައިފައިވާ ގިނަ މަސައްކަތްތަކާއި ކުރަމުންދާ ގިނަ މަސައްކަތްތަކީ ފައްޔާޒުގެ ބެލުމުގެ ދަށުން ކުރަމުންދާ ކަންކަން ކަމަށާއި އެކަމުން ވެސް ފައްޔާޒު “ހިންގާލާވަރު” ފެންނަ ކަމަށް އަސްލަމް ވިދާޅުވިއެވެ.
މީގެ އިތުރުން އަސްލަމް ވިދާޅުވީ މި ވެރިކަމުގައި ރައްޔިތުންނަށް ވެފައިވާ ވައުދުތައް ފުއްދުމުގައި ފައްޔާޒަކީ އަބަދުވެސް މަސައްކަތް ކުރައްވަމުން ގެންދަވާ ބޭފުޅެއް ކަމަށާއި ކުރިޔަށް އޮތް ދުވަސްތަކުގައި ވެސް އެ ގޮތުގައި ދެމިހުންނަވާނެ ކަމަށެވެ.
އެމްޑީޕީގެ ޗެއާޕާސަންގެ މަގާމަށް ފައްޔާޒާ އެކު ދެން ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)އެވެ.
އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބު ފަސްކުރަން އެ ޕާޓީގެ ޤައުމީ މަޖިލީހުން ވަނީ ނިންމައިފައެވެ. ކުރިން މި އިންތިޚާބު ބޭއްވުމަށް ހަމަޖެހި އޮތީ އޭޕްރީލް 16ވަނަ ދުވަހުއެވެ. ނަމަވެސް މިހާރު އެ އިންތިހާބު ބޭއްވުމަށް ކަނޑައަޅައިފައި ވަނީ މެއި މަހުގެ 14ވާ ހޮނިހިރު ދުވަހުގައެވެ.
Ads by STO
